ముఖ్య అతిథిగా పాల్గొన్న జిల్లా గ్రంథాలయ సంస్థ చైర్మన్ సేరి రాజేష్ రెడ్డి
శ్రీ బల భీమ న్యూస్ ప్రతినిధి / కొడంగల్ :
ప్రభుత్వ డిగ్రీ కళాశాల, కొడంగల్ 18వ వార్షికోత్సవాన్ని ప్రిన్సిపాల్ డా. బి. శ్రీనివాస్ రెడ్డి అధ్యక్షతన ఘనంగా నిర్వహించారు. ఈ కార్యక్రమానికి జిల్లా గ్రంథాలయ సంస్థ చైర్మన్ సేరి రాజేష్ రెడ్డి ముఖ్య అతిథిగా హాజరయ్యారు.
ఈ సందర్భంగా ఆయన మాట్లాడుతూ ప్రభుత్వ కళాశాలల్లో అత్యున్నత అర్హతలు కలిగిన అధ్యాపకులు, సరైన మౌలిక వసతులు, ప్రయోగశాలలు, గ్రంథాలయాలు అందుబాటులో ఉండటం వల్ల విద్యార్థుల సర్వతోముఖ అభివృద్ధికి విస్తృత అవకాశాలు ఉన్నాయని తెలిపారు.
ప్రభుత్వ డిగ్రీ కళాశాల కొడంగల్ సిబ్బంది విద్యార్థుల అభ్యున్నతికి అహర్నిశలు కృషి చేస్తున్నారని కొనియాడారు. విద్యార్థులను ప్రోత్సహించేందుకు ప్రిన్సిపాల్ మరియు వైస్ ప్రిన్సిపాల్ అందిస్తున్న క్యాష్ అవార్డులు, గోల్డ్ మెడల్స్ అభినందనీయమన్నారు.
ప్రతి విద్యార్థికి లైబ్రరీ ఎంతో ముఖ్యమని, గ్రంథాలయాలను సద్వినియోగం చేసుకుంటే గొప్ప విజయాలు సాధించవచ్చని చెప్పారు. వికారాబాద్ జిల్లాలో గ్రంథాలయాల అభివృద్ధికి కృషి చేస్తున్నట్లు తెలిపారు. విద్యార్థులు కష్టపడి చదివి తల్లిదండ్రుల ఆశయాలను నెరవేర్చాలని సూచించారు. కళాశాల లైబ్రరీ అభివృద్ధికి తమ వంతు సహకారం అందిస్తామని హామీ ఇచ్చారు.
కళాశాల ప్రగతి విశేషాలు
కళాశాల ప్రిన్సిపాల్ డా. బి. శ్రీనివాస్ రెడ్డి వార్షిక నివేదికను సమర్పిస్తూ, 2008లో కొద్దిమంది విద్యార్థులతో ప్రారంభమైన ఈ కళాశాల నేడు వికారాబాద్ జిల్లాలో అగ్రగామిగా నిలిచిందని తెలిపారు.
గత విద్యా సంవత్సరంలో బి.ఎస్సీ (ఎంపీసీ) తెలుగు మీడియంను ప్రవేశపెట్టగా, ఈ సంవత్సరం ఉద్యోగావకాశాలు ఉన్న బి.ఎస్సీ హెల్త్ కేర్ కోర్సును నూతనంగా ప్రారంభిస్తున్నట్లు తెలిపారు.
ఈ సంవత్సరం:
- ముగ్గురు విద్యార్థులు జాతీయ స్థాయి పోటీల్లో పాల్గొన్నారు
- ఒక విద్యార్థిని జిల్లా స్థాయిలో మొదటి బహుమతి సాధించింది
- 9 మంది విద్యార్థులు ఈపిటీఆర్ఐ పోటీల్లో విజయం సాధించారు
- 18 మంది విద్యార్థులు బీఎఫ్ఎస్ఐ స్కిల్ డెవలప్మెంట్లో శిక్షణ పొందారు
- 50 మంది విద్యార్థులు టాస్క్ శిక్షణ పూర్తి చేశారు
యంగ్ ఇండియా స్కిల్ యూనివర్సిటీ సహకారంతో “ప్రాజెక్ట్ విక్టర్” పేరుతో జాబ్ మేళా నిర్వహించామని తెలిపారు. కళాశాల ఫలితాలు యూనివర్సిటీ సగటు కంటే మెరుగ్గా ఉన్నాయని, అధిక సంఖ్యలో విద్యార్థులు ఉన్నత విద్యలో ప్రవేశం పొందారని పేర్కొన్నారు.
విద్యార్థులకు అవార్డులు
ఈ కార్యక్రమంలో ప్రతిభ కనబరిచిన విద్యార్థులకు నగదు బహుమతులు, గోల్డ్ మెడల్స్ అందజేశారు.
డా. బి. శ్రీనివాస్ రెడ్డి తన తండ్రి బి. మోహన్ రెడ్డి జ్ఞాపకార్థం ఒక్కొక్కటి రూ.5,000 విలువైన మూడు అవార్డులను అందించారు.
- బి.ఏ టాపర్: ఆర్. విజయలక్ష్మి
- బి.కాం టాపర్: ఎస్. కృష్ణ
- బి.ఎస్సీ టాపర్: పి. ప్రమీల
వైస్ ప్రిన్సిపాల్ రఫియా ఖానం అందించిన అవార్డులు:
- మహమ్మది బేగం మెమోరియల్ అవార్డు (బోటనీ టాపర్): యం. శివనీల
- మొహమ్మద్ సిద్దిక్ అహ్మద్ మెమోరియల్ అవార్డు (ఔట్స్టాండింగ్ స్టూడెంట్): టి. నవీన
అదేవిధంగా కబడ్డీ, ఖోఖో, వాలీబాల్, చెస్, క్రికెట్ వంటి క్రీడా పోటీలలో మరియు సాహితీ పోటీలలో గెలుపొందిన విద్యార్థులకు ట్రోఫీలు, మెడల్స్ అందజేశారు.
సాంస్కృతిక కార్యక్రమాలు
అనంతరం విద్యార్థులచే వివిధ సాంస్కృతిక కార్యక్రమాలు నిర్వహించారు.
ఈ కార్యక్రమంలో వైస్ ప్రిన్సిపాల్ రఫియా ఖానం, ఐక్యూఏసీ కోఆర్డినేటర్ టి. రాంబాబు, అకాడమిక్ కోఆర్డినేటర్ డా. ఆర్. శ్రీనివాస్, గేమ్స్ అండ్ స్పోర్ట్స్ ఇన్చార్జ్ డా. వి. శ్రీధర్ కుమార్, డా. కె. రమేష్ బాబు, డా. ఇ. సోమ్లా, యం. హరిప్రియ తదితర అధ్యాపకులు, సిబ్బంది మరియు విద్యార్థులు పాల్గొన్నారు.
పరిగిలో టాస్క్ ఫోర్స్ మెరుపు దాడులు: అక్రమ గ్యాస్, కుళ్ళిన మాంసం, కల్తీ ఐస్క్రీమ్ కేంద్రాలు సీజ్!
పరిగిలో టాస్క్ ఫోర్స్ మెరుపు దాడులు: అక్రమ గ్యాస్, కుళ్ళిన మాంసం, కల్తీ ఐస్క్రీమ్ కేంద్రాలు సీజ్!
రీసెర్చ్ మెథడాలజీతో విద్యార్థుల నైపుణ్యాలు మెరుగు
