బీరు బాటిల్‌లో కండోమ్ ప్యాకెట్.. సిద్దిపేటలో కలకలం

• బీరు బాటిల్‌లో కనిపించిన కండోమ్ ప్యాకెట్
• అది చూసి కంగుతిన్న మందుబాబు
• ఎక్సైజ్ పోలీసులకు ఫిర్యాదుతో విచారణ

శ్రీ బల భీమ న్యూస్ / కొడంగల్ :

సిద్దిపేట జిల్లాలో చోటుచేసుకున్న ఓ షాకింగ్ ఘటన ప్రస్తుతం రాష్ట్రవ్యాప్తంగా తీవ్ర చర్చనీయాంశంగా మారింది. ఓ బీరు బాటిల్‌లో ఏకంగా కండోమ్ ప్యాకెట్ కనిపించడం కలకలం రేపుతోంది. ఈ ఘటనతో మందుబాబులు ఒక్కసారిగా భయాందోళనకు గురవుతున్నారు. బీరు తాగేందుకు కొనుగోలు చేసిన వ్యక్తి.. బాటిల్‌లో అనుమానాస్పద వస్తువు కనిపించడంతో అవాక్కయ్యాడు. అనంతరం వైన్స్ షాపు వద్దకు వెళ్లి ఆగ్రహం వ్యక్తం చేయడంతో అక్కడ ఉద్రిక్త పరిస్థితులు నెలకొన్నాయి. ప్రస్తుతం ఈ ఘటనకు సంబంధించిన వీడియో సోషల్ మీడియాలో వైరల్‌గా మారింది.

ప్రస్తుతం వేసవి కాలం కావడంతో రాష్ట్రవ్యాప్తంగా బీర్ల అమ్మకాలు భారీగా పెరిగాయి. చల్లదనం కోసం అనేక మంది బీర్లను అధికంగా వినియోగిస్తున్నారు. ఈ క్రమంలో మద్యం దుకాణాల్లో స్టాక్ వచ్చిన వెంటనే బీర్లు అమ్ముడవుతున్న పరిస్థితి నెలకొంది. అయితే ఇప్పటికే పలు సందర్భాల్లో బీరు బాటిళ్లలో బల్లి, చెత్త, పురుగులు, ఎలుక వంటి వస్తువులు కనిపించిన ఘటనలు వెలుగుచూశాయి. ఇప్పుడు తాజాగా కండోమ్ ప్యాకెట్ బయటపడటం మరింత సంచలనంగా మారింది.

సిద్దిపేట జిల్లా అక్బర్‌పేట్ భూంపల్లిలో ఉన్న లక్ష్మీ నరసింహ వైన్ షాప్‌లో ఈ ఘటన చోటుచేసుకున్నట్లు సమాచారం. ఓ వ్యక్తి ఆ వైన్ షాప్‌లో కింగ్ ఫిషర్ లైట్ బీర్లు కొనుగోలు చేసి ఇంటికి తీసుకెళ్లాడు. అందులో కొన్ని బీర్లు తాగిన అనంతరం మరో బాటిల్ తెరవగా.. అందులో కండోమ్ ప్యాకెట్ కనిపించినట్లు గుర్తించాడు. దీంతో ఒక్కసారిగా షాక్‌కు గురైన అతడు వెంటనే ఆ బాటిల్‌ను తీసుకుని తిరిగి వైన్స్ షాపు వద్దకు వెళ్లి సిబ్బందిని ప్రశ్నించాడు.

అయితే వైన్స్ సిబ్బంది సరైన సమాధానం ఇవ్వకపోవడంతో ఆ వ్యక్తి తీవ్ర ఆగ్రహానికి గురయ్యాడు. ఈ విషయంపై బాధ్యతారాహిత్యంగా స్పందించారని ఆరోపిస్తూ అక్కడే నిరసన వ్యక్తం చేశాడు. ఈ సందర్భంగా స్థానికులతో వాగ్వాదం చోటుచేసుకున్నట్లు తెలుస్తోంది. విషయం తెలుసుకున్న పలువురు అక్కడికి చేరుకుని బీరు బాటిల్‌ను పరిశీలించారు. కొందరు ఈ ఘటనను తమ మొబైల్ ఫోన్లలో చిత్రీకరించగా.. ఆ వీడియోలు ఇప్పుడు సోషల్ మీడియాలో విస్తృతంగా వైరల్ అవుతున్నాయి.

ఘటనపై బాధితుడు స్థానిక ఎక్సైజ్ పోలీసులకు ఫిర్యాదు చేశాడు. వెంటనే స్పందించిన అధికారులు వైన్ షాప్‌కు చేరుకుని దర్యాప్తు ప్రారంభించారు. బీరు బాటిల్‌లో కండోమ్ ప్యాకెట్ ఎలా వచ్చింది..? ఇది తయారీ సమయంలో జరిగిన నిర్లక్ష్యమా..? లేక ఎవరైనా కావాలనే పెట్టారా..? అనే కోణాల్లో విచారణ చేపట్టారు. సంబంధిత బీరు కంపెనీ ప్రతినిధులను కూడా సంప్రదించే అవకాశం ఉందని సమాచారం.

ఈ ఘటన వెలుగులోకి రావడంతో మద్యం నాణ్యత, వినియోగదారుల భద్రతపై తీవ్ర ఆందోళనలు వ్యక్తమవుతున్నాయి. ఫుడ్ అండ్ బేవరేజ్ ఉత్పత్తుల విషయంలో నాణ్యత ప్రమాణాలు ఎంతవరకు అమలవుతున్నాయనే ప్రశ్నలు తలెత్తుతున్నాయి. ముఖ్యంగా బాటిలింగ్ ప్లాంట్లలో తనిఖీలు, నాణ్యత నియంత్రణ ప్రక్రియలపై అనుమానాలు వ్యక్తమవుతున్నాయి.

ఇప్పటికే ఇలాంటి ఘటనలు అనేకసార్లు వెలుగుచూసినా సంబంధిత అధికారులు కఠిన చర్యలు తీసుకోవడంలో విఫలమవుతున్నారనే విమర్శలు వినిపిస్తున్నాయి. వినియోగదారుల ప్రాణాలతో చెలగాటమాడే ఘటనలను అరికట్టేందుకు కఠిన నిబంధనలు అమలు చేయాలని ప్రజలు డిమాండ్ చేస్తున్నారు. బాధ్యులపై తక్షణ చర్యలు తీసుకోవడంతో పాటు రాష్ట్రవ్యాప్తంగా మద్యం ఉత్పత్తులపై ప్రత్యేక తనిఖీలు చేపట్టాలని కోరుతున్నారు.

ఈ ఘటనపై పూర్తి స్థాయి విచారణ అనంతరం అసలు నిజాలు వెలుగులోకి వచ్చే అవకాశం ఉంది. అప్పటి వరకు ఈ వ్యవహారం రాష్ట్రవ్యాప్తంగా చర్చనీయాంశంగానే కొనసాగే అవకాశాలు కనిపిస్తున్నాయి.