ఎర్రవల్లి నాగుల ఎల్లమ్మ జాతరలో ప్రత్యేక పూజలు నిర్వహించిన డా. ఏ. చంద్రప్రియ

• ప్రజలతో మమేకమైన మాజీ మంత్రి డా. చంద్రశేఖర్ కుమార్తెకు గ్రామస్తుల అపూర్వ స్వాగతం

శ్రీ బల భీమ న్యూస్ / కొడంగల్ :

వికారాబాద్, మే 22:
వికారాబాద్ నియోజకవర్గంలోని వికారాబాద్ మండలం ఎర్రవల్లి గ్రామంలో అత్యంత వైభవంగా నిర్వహించిన శ్రీ నాగుల ఎల్లమ్మ జాతర మహోత్సవం భక్తిశ్రద్ధల నడుమ ఘనంగా జరిగింది. ఈ జాతరలో మాజీ మంత్రి డా. ఏ. చంద్రశేఖర్ గారి కుమార్తె డా. ఏ. చంద్రప్రియ పాల్గొని అమ్మవారికి ప్రత్యేక పూజలు నిర్వహించారు. ఆలయ అర్చకులు వేదమంత్రోచ్చారణల మధ్య ఆమెకు పూర్ణకుంభ స్వాగతం పలికి ప్రత్యేక ఆశీర్వచనాలు అందజేశారు.

జాతరకు విచ్చేసిన డా. చంద్రప్రియ గారిని గ్రామస్తులు, మహిళలు, యువకులు, పెద్దలు ఎంతో ఆత్మీయంగా ఆహ్వానించారు. ఆలయ ప్రాంగణంలో భక్తులతో కలిసి ఆమె ప్రత్యేక పూజల్లో పాల్గొని అమ్మవారి దర్శనం చేసుకున్నారు. అనంతరం గ్రామ ప్రజలతో కలిసిమెలిసి మాట్లాడి వారి సమస్యలు, పరిస్థితులను అడిగి తెలుసుకున్నారు.

ఈ సందర్భంగా గ్రామ పెద్దలు మాట్లాడుతూ, “మేడమ్‌ను చూస్తుంటే గతంలో ఎమ్మెల్యేగా, మంత్రిగా ప్రజలకు సేవలందించిన డా. చంద్రశేఖర్ గారు గుర్తుకు వస్తున్నారు. ఆయన హయాంలో మా ప్రాంతానికి ఎన్నో అభివృద్ధి కార్యక్రమాలు జరిగాయి. ఇప్పుడు మీరు కూడా ప్రజా ప్రతినిధిగా ముందుకు వచ్చి మా ప్రాంత సమస్యలను పరిష్కరించాలని కోరుకుంటున్నాం” అని అభిమానం వ్యక్తం చేశారు.

గ్రామ యువకులు మాట్లాడుతూ, “చంద్రప్రియ గారు ప్రజల మధ్యకు వచ్చి అందరితో కలిసిపోవడం చాలా ఆనందంగా ఉంది. రాజకీయాల్లోకి వచ్చి ప్రజలకు సేవ చేయాలని మా ఆకాంక్ష” అని తెలిపారు. మహిళలు కూడా ఆమెతో ఆత్మీయంగా మాట్లాడి గ్రామ సమస్యలను వివరించారు.

జాతర ప్రాంగణంలో డా. చంద్రప్రియ గారు మహిళలు, వృద్ధులు, చిన్నారులతో కలిసి సందడి చేయడం ప్రత్యేక ఆకర్షణగా నిలిచింది. గ్రామస్తుల యోగక్షేమాలను అడిగి తెలుసుకుంటూ ప్రతి ఒక్కరిని ఆప్యాయంగా పలకరించారు. తండ్రి రాజకీయ వారసత్వాన్ని కొనసాగిస్తూ ప్రజలతో మమేకం అవుతున్న తీరు స్థానికులను ఆకట్టుకుంది.

అమ్మవారిని దర్శించుకున్న అనంతరం డా. చంద్రప్రియ మాట్లాడుతూ, “ఎర్రవల్లి నాగుల ఎల్లమ్మ జాతర ఎంతో ఆధ్యాత్మిక వాతావరణంలో జరుగుతోంది. గ్రామ ప్రజల ప్రేమాభిమానాలు నాకు ఎంతో ఆనందాన్ని కలిగించాయి. ప్రజల ఆశీస్సులు ఎప్పటికీ నా వెంట ఉండాలని కోరుకుంటున్నాను” అని అన్నారు.

ఈ కార్యక్రమంలో గ్రామ నాయకులు, ప్రజాప్రతినిధులు, యువ నాయకులు, మహిళా సంఘాల ప్రతినిధులు, కార్యకర్తలు మరియు భారీ సంఖ్యలో భక్తులు పాల్గొన్నారు. జాతర సందర్భంగా గ్రామంలో భక్తుల రద్దీ నెలకొనగా, ఆలయ పరిసరాలు భక్తి సంగీతం, ప్రత్యేక అలంకరణలతో కళకళలాడాయి.