మండుటెండలో ఉపాధి హామీ కూలీలకు చల్లని మజ్జిగ ప్యాకెట్ల పంపిణీ

• నాగారం గ్రామ సర్పంచ్ ప్రశాంతకుమారి మదనసింహారెడ్డి ఆధ్వర్యంలో ఉపశమన చర్యలు

శ్రీ బల భీమ న్యూస్ / కొడంగల్ :

కొడంగల్ మండల పరిధిలోని నాగారం గ్రామంలో మండుతున్న ఎండల మధ్య ఉపాధి హామీ పనుల్లో నిమగ్నమై జీవనోపాధి పొందుతున్న కూలీలకు గ్రామ పంచాయతీ ఆధ్వర్యంలో ప్రత్యేక ఉపశమన చర్యలు చేపట్టారు. శనివారం గ్రామ సర్పంచ్ పట్లోళ్ల ప్రశాంతకుమారి, మదనసింహారెడ్డి ఆధ్వర్యంలో ఉపాధి హామీ కూలీలకు చల్లని మజ్జిగ ప్యాకెట్లను పంపిణీ చేశారు. ఈ కార్యక్రమంలో ఉపాధిహామీ ఏపీవో రాములు, టెక్నికల్ అసిస్టెంట్ వెంకటరెడ్డి తదితరులు పాల్గొన్నారు.వేసవి ఉష్ణోగ్రతలు రోజురోజుకు పెరుగుతున్న నేపథ్యంలో ఉపాధి హామీ పనుల్లో పాల్గొంటున్న కూలీలు తీవ్ర ఇబ్బందులు ఎదుర్కొంటున్నారు. మండుటెండలో గంటల తరబడి పనిచేయడం వల్ల అలసట, దాహం, వడదెబ్బ వంటి సమస్యలు తలెత్తే ప్రమాదం ఉండటంతో ప్రభుత్వం ప్రత్యేక చర్యలు చేపట్టాలని ఆదేశాలు జారీ చేసిన విషయం తెలిసిందే. ఈ నేపథ్యంలో నాగారం గ్రామ పంచాయతీ అధికారులు కూలీలకు అవసరమైన సౌకర్యాలను కల్పిస్తూ ఆదర్శంగా నిలుస్తున్నారు.ఈ సందర్భంగా గ్రామ సర్పంచ్ పట్లోళ్ల ప్రశాంతకుమారిమదనసింహారెడ్డి మాట్లాడుతూ, “ప్రభుత్వ ఆదేశాల మేరకు ఉపాధి హామీ పనుల్లో పాల్గొంటున్న ప్రతి కూలీ ఆరోగ్యం, భద్రతకు అత్యంత ప్రాధాన్యత ఇస్తున్నాం. కూలీలు ఉదయం వేళల్లోనే పనులు పూర్తి చేసుకుని ఎండ తీవ్రత పెరగకముందే తమ ఇళ్లకు చేరుకునేలా ప్రత్యేకంగా చర్యలు తీసుకుంటున్నాం” అని తెలిపారు.అదేవిధంగా , ఉపాధి హామీ పథకం గ్రామీణ పేదల జీవనాధారంగా మారిందని, ముఖ్యంగా కూలీలు ఆరోగ్యంగా ఉంటేనే పనులు సక్రమంగా కొనసాగుతాయని అన్నారు. కూలీలకు తాగునీరు, నీడ కోసం టెంట్లు, విశ్రాంతి కోసం ప్రత్యేక ఏర్పాట్లు చేయడంతో పాటు మండుటెండలో శరీరానికి చల్లదనం కలిగించే మజ్జిగ ప్యాకెట్లను అందించడం జరిగిందన్నారు.

ఉపాధి హామీ ఏపీవో రాములు మాట్లాడుతూ, ప్రభుత్వం ఉపాధి హామీ పథకాన్ని మరింత సమర్థవంతంగా అమలు చేసేందుకు కూలీల సంఖ్యను పెంచడంతో పాటు పనుల నిర్వహణలో పలు జాగ్రత్తలు తీసుకుంటోందన్నారు. వేసవి కాలంలో కూలీలకు ఎలాంటి ఇబ్బందులు తలెత్తకుండా ప్రతి పనిస్థలంలో త్రాగునీరు, ప్రథమ చికిత్స సామగ్రి, విశ్రాంతి ఏర్పాట్లు అందుబాటులో ఉంచుతున్నట్లు తెలిపారు.

మజ్జిగ ప్యాకెట్లు అందుకున్న ఉపాధి హామీ కూలీలు గ్రామ సర్పంచ్ ప్రశాంతకుమారి, మదనసింహారెడ్డి మరియు అధికారులకు ప్రత్యేక కృతజ్ఞతలు తెలిపారు. మండుటెండలో పనిచేస్తున్న సమయంలో చల్లని మజ్జిగ అందించడం వల్ల ఎంతో ఉపశమనం కలిగిందని వారు ఆనందం వ్యక్తం చేశారు.

గ్రామంలో చేపట్టిన ఈ చర్యలు ఇతర గ్రామ పంచాయతీలకు ఆదర్శంగా నిలుస్తున్నాయని గ్రామస్థులు అభిప్రాయపడ్డారు. ప్రజల ఆరోగ్యం, సంక్షేమం పట్ల ప్రజాప్రతినిధులు మరియు అధికారులు చూపుతున్న చొరవ అభినందనీయమని పలువురు పేర్కొన్నారు.