జూన్ 20న త్రిపుర మాజీ ముఖ్యమంత్రి మాణిక్ సర్కార్ రాక

• తెలంగాణ వ్యవసాయ కార్మిక సంఘం రాష్ట్ర నాలుగో మహాసభలను విజయవంతం చేయాలి:
• రాష్ట్ర ప్రధాన కార్యదర్శి ఆర్. వెంకట్రాములు

శ్రీ బల భీమ న్యూస్ /మహబూబ్‌నగర్, జూన్ 18:

తెలంగాణ వ్యవసాయ కార్మిక సంఘం రాష్ట్ర నాలుగో మహాసభల్లో పాల్గొనేందుకు త్రిపుర మాజీ ముఖ్యమంత్రి, ప్రముఖ వామపక్ష నాయకుడు మాణిక్ సర్కార్ ఈ నెల 20వ తేదీన తెలంగాణకు రానున్నట్లు సంఘం రాష్ట్ర ప్రధాన కార్యదర్శి ఆర్. వెంకట్రాములు తెలిపారు. గురువారం జిల్లా కార్యాలయంలో ఏర్పాటు చేసిన విలేకరుల సమావేశంలో ఆయన మాట్లాడారు.

తెలంగాణ వ్యవసాయ కార్మిక సంఘం రాష్ట్ర నాలుగో మహాసభలు మహబూబ్‌నగర్ జిల్లా కేంద్రంలో ఘనంగా నిర్వహించనున్నట్లు తెలిపారు. ఈ మహాసభలకు రాష్ట్రంలోని అన్ని జిల్లాల నుంచి సుమారు 800 మంది ప్రతినిధులు హాజరుకానున్నారని పేర్కొన్నారు. అలాగే జూన్ 20న నిర్వహించే భారీ బహిరంగ సభలో 10 వేల మందికి పైగా వ్యవసాయ కార్మికులు, రైతులు, ప్రజలు పాల్గొనేలా ఏర్పాట్లు చేస్తున్నామని వెల్లడించారు.

దేశవ్యాప్తంగా వ్యవసాయ కార్మికులు, కూలీలు ఎదుర్కొంటున్న సమస్యలు, కేంద్ర ప్రభుత్వం అమలు చేస్తున్న కార్మిక-కర్షక వ్యతిరేక విధానాలపై ఈ మహాసభల్లో సమగ్ర చర్చ జరగనుందని వెంకట్రాములు తెలిపారు. కార్మికుల జీవన ప్రమాణాలు మెరుగుపడేలా, గ్రామీణ ప్రాంతాల్లో ఉపాధి అవకాశాలు పెరిగేలా పోరాట కార్యాచరణను రూపొందించనున్నట్లు చెప్పారు.

ఉపాధి హామీ కార్మికులకు వరంగా నిలిచిన మహాత్మా గాంధీ జాతీయ గ్రామీణ ఉపాధి హామీ పథకంలో కేంద్ర ప్రభుత్వం మార్పులు తీసుకువస్తోందని ఆయన విమర్శించారు. గ్రామీణ పేదల జీవనాధారంగా ఉన్న ఉపాధి హామీ చట్టాన్ని బలహీనపరిచే ప్రయత్నాలు జరుగుతున్నాయని ఆరోపించారు. దేశంలో ఇప్పటికీ పెద్ద సంఖ్యలో ప్రజలు కూలీ పనులపైనే ఆధారపడి జీవిస్తున్నారని, అలాంటి పరిస్థితుల్లో ఉపాధి హామీ చట్టాన్ని నిర్వీర్యం చేసే చర్యలు సమంజసం కాదన్నారు.

దేశవ్యాప్తంగా వ్యవసాయ కార్మికులు ఎదుర్కొంటున్న భూ సమస్యలు, కనీస వేతనాల అమలు, ఉపాధి హక్కు, సామాజిక భద్రత, సంక్షేమ పథకాల విస్తరణ వంటి అంశాలపై మహాసభల్లో తీర్మానాలు ఆమోదించనున్నట్లు తెలిపారు. కేంద్ర ప్రభుత్వ ప్రజా వ్యతిరేక విధానాలకు వ్యతిరేకంగా ఉద్యమాలను మరింత బలోపేతం చేయడానికి ఈ మహాసభలు దిశానిర్దేశం చేయనున్నాయని పేర్కొన్నారు.

రాష్ట్ర ప్రభుత్వంపై కూడా వెంకట్రాములు విమర్శలు గుప్పించారు. భూమిలేని వ్యవసాయ కార్మికులకు సంవత్సరానికి రూ.12 వేల ఆర్థిక సాయం అందిస్తామని ప్రభుత్వం హామీ ఇచ్చిందని, అయితే అది కేవలం కొద్ది ప్రాంతాల్లో మాత్రమే అమలైందని అన్నారు. మహబూబ్‌నగర్, రంగారెడ్డి జిల్లాల్లో మాత్రమే ఒకసారి చెల్లింపులు జరిగాయని, రాష్ట్రవ్యాప్తంగా అర్హులైన కార్మికులకు ఈ పథకం ప్రయోజనం అందలేదని ఆవేదన వ్యక్తం చేశారు.

మహిళా వ్యవసాయ కార్మికుల సమస్యలపై కూడా మహాసభల్లో ప్రత్యేకంగా చర్చ జరగనుందని తెలిపారు. పని ప్రదేశాల్లో మహిళలకు తాగునీరు, విశ్రాంతి గదులు, మరుగుదొడ్లు వంటి కనీస వసతులు కల్పించాల్సిన అవసరం ఉందన్నారు. పురుషులతో సమానంగా మహిళలకు సమాన వేతనం అందేలా చట్టాలను కఠినంగా అమలు చేయాలని డిమాండ్ చేశారు. మహిళా కూలీల భద్రత, ఆరోగ్యం, సంక్షేమం వంటి అంశాలపై ప్రత్యేక తీర్మానాలు తీసుకురానున్నట్లు చెప్పారు.

వ్యవసాయ కార్మికుల హక్కుల పరిరక్షణ, సామాజిక న్యాయం సాధన, గ్రామీణ పేదల జీవనోన్నతి లక్ష్యంగా నిర్వహిస్తున్న ఈ రాష్ట్ర మహాసభలను విజయవంతం చేయడానికి జిల్లా ప్రజలు, కార్మికులు, రైతులు పెద్ద సంఖ్యలో పాల్గొనాలని వెంకట్రాములు పిలుపునిచ్చారు.

ఈ విలేకరుల సమావేశంలో మహిళా కూలీల రాష్ట్ర కన్వీనర్ పద్మ, ఆహ్వాన సంఘం కార్యదర్శి, కోశాధికారి ఏ. రాములు, ప్రచార కార్యదర్శి కడియాల మోహన్, హన్మంతు తదితరులు పాల్గొన్నారు.