ఆడపిల్లల భవిష్యత్తుకు కల్యాణలక్ష్మి, షాదీ ముబారక్ భరోసా

• అర్హులైన లబ్ధిదారులకు చెక్కుల పంపిణీ చేసిన తాండూరు ఎమ్మెల్యే బుయ్యని మనోహర్ రెడ్డి

శ్రీ బల భీమ న్యూస్ / కొడంగల్ , జూన్ 18:

ఆడపిల్లల భవిష్యత్తు భద్రంగా ఉండాలనే లక్ష్యంతో రాష్ట్ర ప్రభుత్వం అమలు చేస్తున్న కల్యాణలక్ష్మి, షాదీ ముబారక్ పథకాలు వేలాది నిరుపేద కుటుంబాలకు అండగా నిలుస్తున్నాయని తాండూరు ఎమ్మెల్యే బుయ్యని మనోహర్ రెడ్డి అన్నారు. గురువారం తాండూరు పట్టణంతో పాటు యాలాల్, బషీరాబాద్ మండల కేంద్రాల్లో నిర్వహించిన కార్యక్రమాల్లో అర్హులైన లబ్ధిదారులకు కల్యాణలక్ష్మి, షాదీ ముబారక్ చెక్కులను పంపిణీ చేశారు.

ఈ సందర్భంగా నిర్వహించిన సమావేశాల్లో ఎమ్మెల్యే మాట్లాడుతూ, గత ప్రభుత్వంలో కల్యాణలక్ష్మి, షాదీ ముబారక్ పథకాల అమలులో తీవ్ర జాప్యం జరిగేదని, పెళ్లిళ్లు జరిగి పిల్లలు పుట్టి వారి పుట్టినరోజులు వచ్చినా చెక్కులు అందని పరిస్థితులు ఉండేవని గుర్తు చేశారు. అయితే ముఖ్యమంత్రి రేవంత్ రెడ్డి నాయకత్వంలోని ప్రజాపాలన ప్రభుత్వం అధికారంలోకి వచ్చిన తర్వాత సంక్షేమ పథకాల అమలులో వేగం పెరిగిందని తెలిపారు. దరఖాస్తు చేసుకున్న వెంటనే అర్హులైన లబ్ధిదారులకు చెక్కులు అందేలా ప్రభుత్వం చర్యలు చేపట్టిందన్నారు.

ప్రజల సంక్షేమమే ప్రభుత్వ ప్రధాన లక్ష్యమని పేర్కొన్న ఎమ్మెల్యే, గత ప్రభుత్వంలో అమలైన మంచి పథకాలను కొనసాగిస్తూనే ప్రజల అవసరాలకు అనుగుణంగా కొత్త సంక్షేమ కార్యక్రమాలను కూడా అమలు చేస్తున్నామని చెప్పారు. ముఖ్యమంత్రి ఆదేశాల మేరకు ప్రజలకు ఎలాంటి ఇబ్బందులు కలగకుండా సంక్షేమ పథకాలను పారదర్శకంగా అమలు చేస్తున్నామన్నారు.

తాండూరు నియోజకవర్గ అభివృద్ధికి ప్రభుత్వం పెద్ద ఎత్తున నిధులు మంజూరు చేస్తోందని ఎమ్మెల్యే వెల్లడించారు. తాండూరు ప్రాంతానికి రూ.2 కోట్ల టిడిఆర్ నిధులు మంజూరు కాగా, బషీరాబాద్ మండలానికి రూ.60 లక్షలు, యాలాల్ మండలానికి మరో రూ.60 లక్షలు కేటాయించినట్లు తెలిపారు. ఈ నిధులతో గ్రామాలు, పట్టణాల్లో మౌలిక వసతుల అభివృద్ధి, రోడ్ల నిర్మాణం, ప్రజా అవసరాల పనులు చేపడుతున్నామని చెప్పారు.

విద్యా రంగానికి ప్రభుత్వం అత్యంత ప్రాధాన్యత ఇస్తోందని ఎమ్మెల్యే పేర్కొన్నారు. గ్రామీణ ప్రాంతాల్లోని పేద, బడుగు బలహీన వర్గాల విద్యార్థులు కార్పొరేట్ పాఠశాలల విద్యార్థులకు ఏమాత్రం తీసిపోకుండా ఉండేందుకు ప్రభుత్వం ప్రత్యేక చర్యలు చేపడుతోందన్నారు. విద్యార్థులకు అవసరమైన విద్యా కిట్లు అందించడంతో పాటు నాణ్యమైన విద్యను అందించేందుకు కృషి చేస్తున్నామని చెప్పారు. దూర ప్రాంతాలకు పిల్లలను పంపలేక అనేక కుటుంబాలు విద్యకు దూరమవుతున్న పరిస్థితులను దృష్టిలో ఉంచుకొని స్థానికంగానే మెరుగైన విద్యా సౌకర్యాలు కల్పించేందుకు ప్రభుత్వం కృషి చేస్తోందన్నారు.

ప్రభుత్వ పాఠశాలల్లో విద్యార్థులకు అక్షరపాత్ర కార్యక్రమం ద్వారా అల్పాహారం అందిస్తున్నామని, మధ్యాహ్న భోజన పథకాన్ని కూడా సమర్థవంతంగా అమలు చేస్తున్నామని తెలిపారు. ప్రతి విద్యార్థికి పోషకాహారం అందేలా ప్రభుత్వం ప్రత్యేక శ్రద్ధ చూపుతోందన్నారు.

ఆరోగ్య రంగంలో కూడా అనేక సంస్కరణలు తీసుకొచ్చామని ఎమ్మెల్యే వివరించారు. ప్రభుత్వ ఆసుపత్రుల్లో 24 గంటల పాటు వైద్య సేవలు అందుబాటులో ఉండేలా వైద్య సిబ్బందిని ఏర్పాటు చేసినట్లు తెలిపారు. గ్రామీణ ప్రజలకు మెరుగైన వైద్య సేవలు అందించడమే ప్రభుత్వ లక్ష్యమన్నారు.

నియోజకవర్గంలో రోడ్ల విస్తరణ పనులు వేగంగా జరుగుతున్నాయని, ఈ పనుల విజయవంతమైన అమలులో స్థానిక నాయకులు, ప్రజాప్రతినిధుల కృషి ఎనలేనిదని కొనియాడారు. గ్రామాల్లో అవసరమైన చోట సీసీ రోడ్ల నిర్మాణానికి ప్రతిపాదనలు పంపించాలని, తాను నిధులు మంజూరు చేసేలా కృషి చేస్తానని హామీ ఇచ్చారు.

ఇళ్లులేని పేద కుటుంబాలకు ఇళ్లను అందించేందుకు ప్రభుత్వం కట్టుబడి ఉందని ఎమ్మెల్యే స్పష్టం చేశారు. అర్హులైన ప్రతి కుటుంబానికి ప్రభుత్వ సంక్షేమ పథకాల ప్రయోజనాలు చేరేలా చర్యలు తీసుకుంటామని తెలిపారు.

గ్రామాల అభివృద్ధిలో సర్పంచ్‌ల పాత్ర కీలకమని పేర్కొన్న ఎమ్మెల్యే, ప్రజాప్రతినిధులు బాధ్యతాయుతంగా వ్యవహరించి ప్రజల సమస్యల పరిష్కారానికి కృషి చేయాలని సూచించారు. ఎమ్మెల్యేగా తాను తన బాధ్యతలను సమర్థవంతంగా నిర్వర్తిస్తానని, అదే విధంగా గ్రామ సర్పంచ్‌లు కూడా ప్రజల పట్ల బాధ్యతగా పనిచేయాలని కోరారు.

ప్రజల అభివృద్ధే తమ ప్రభుత్వ ధ్యేయమని, పార్టీలకు అతీతంగా ప్రతి ఒక్కరికీ సేవలు అందిస్తున్నామని ఎమ్మెల్యే తెలిపారు. అర్హులైన లబ్ధిదారులు కల్యాణలక్ష్మి, షాదీ ముబారక్ చెక్కులను నేరుగా తమ బ్యాంకు ఖాతాల్లో జమ చేసుకోవాలని సూచించారు. ఈ పథకాల పేరుతో ఎవరైనా డబ్బులు డిమాండ్ చేస్తే వెంటనే తన దృష్టికి తీసుకురావాలని హెచ్చరించారు.

ప్రజల సంక్షేమం, గ్రామాల అభివృద్ధి, విద్యా పురోగతి, ఆరోగ్య సేవల విస్తరణ లక్ష్యంగా ప్రజాపాలన ప్రభుత్వం ముందుకు సాగుతోందని ఎమ్మెల్యే బుయ్యని మనోహర్ రెడ్డి పేర్కొన్నారు.వీరితోపాటు తాండూర్ మున్సిపల్ చైర్మన్ నీరజ బాల్ రెడ్డి , మార్కెట్ కమిటీ చైర్మన్ నర్సిములు ఆయా గ్రామాల సర్పంచులు, ప్రజా ప్రతినిధులతో పాటు పార్టీ నాయకులు కార్యకర్తలు తదితరులు పాల్గొన్నారు