ఆర్టీసీ యాజమాన్యం జేఏసీ నాయకులతో చర్చలు సఫలం

శ్రీ బల భీమ న్యూస్ / కొడంగల్ :

తెలంగాణ రాష్ట్ర రోడ్డు రవాణా సంస్థ ఉద్యోగుల సమస్యల పరిష్కార దిశగా మరో కీలక అడుగు పడింది. ఈ రోజు తేదీ 21-05-2026న హైదరాబాద్‌లోని బస్ భవన్‌లో ఈడీలు (ఎగ్జిక్యూటివ్ డైరెక్టర్లు), ఎఫ్‌ఏ (ఫైనాన్స్ అడ్వైజర్)లతో కలిసి అన్ని కార్మిక సంఘాల అధ్యక్షులు, ప్రధాన కార్యదర్శులతో విస్తృత స్థాయి చర్చలు నిర్వహించారు. ఈ సమావేశంలో కార్మిక సంఘాలు చాలా కాలంగా పెండింగ్‌లో ఉన్న పలు ప్రధాన సమస్యలను అధికారుల దృష్టికి తీసుకెళ్లగా, వాటిలో కొన్ని కీలక అంశాలపై ఈడీల కమిటీ సానుకూల నిర్ణయాలు తీసుకుందని తెలంగాణ జాతీయ మజ్దూర్ యూనియన్ రాష్ట్ర ప్రధాన కార్యదర్శి కే. హనుమంతు ముదిరాజ్ తెలిపారు.

సమావేశం అనంతరం మీడియాతో మాట్లాడిన ఆయన, ఆర్టీసీ ఉద్యోగులు ఎన్నో ఏళ్లుగా ఎదురుచూస్తున్న 2021 వేతన సవరణ అంశంపై ప్రభుత్వం కీలక నిర్ణయం తీసుకుందని వెల్లడించారు. 11 శాతం ఫిట్‌మెంట్‌తో వేతన సవరణను జూన్ నెలలో అమలు చేస్తూ, జులై 1వ తేదీ జీతంతో కలిపి చెల్లించేందుకు ప్రభుత్వం అంగీకరించిందని తెలిపారు. ఈ నిర్ణయం వల్ల వేలాది మంది ఉద్యోగులు, కార్మికులకు ఆర్థికంగా ఉపశమనం కలుగుతుందని పేర్కొన్నారు. దీర్ఘకాలంగా పెండింగ్‌లో ఉన్న ఈ అంశం పరిష్కార దిశగా అడుగులు పడటంపై ఉద్యోగ సంఘాలు సంతృప్తి వ్యక్తం చేశాయి.

అలాగే బ్రెడ్ విన్నర్ స్కీమ్ కింద ప్రస్తుతం విధులు నిర్వహిస్తున్న వారందరినీ రెగ్యులర్ చేయడానికి అధికారులు అంగీకరించినట్లు హనుమంతు ముదిరాజ్ తెలిపారు. ఉద్యోగుల నియామక తేదీ నుంచి చేసిన సేవలను కూడా పరిగణలోకి తీసుకుని సర్వీసులో కలపడానికి సిద్ధమయ్యారని చెప్పారు. ఇకపై తాత్కాలిక విధానానికి బదులుగా రెగ్యులర్ ప్రాతిపదికన ఉద్యోగ నియామకాలు చేపడతామని అధికారులు స్పష్టం చేసినట్లు పేర్కొన్నారు. ఈ నిర్ణయం వల్ల అనేక కుటుంబాలకు భరోసా లభించనుందని ఆయన అభిప్రాయపడ్డారు.

ఉద్యోగులు, రిటైర్డ్ సిబ్బంది ఆరోగ్య సమస్యలపై కూడా సమావేశంలో చర్చ జరిగినట్లు వెల్లడించారు. తార్నాక హాస్పిటల్ నుంచి ఉద్యోగుల తల్లిదండ్రులకు సూపర్ స్పెషాలిటీ హాస్పిటల్‌లో వైద్యం అందించే అంశంపై ఎండీతో చర్చించి తుది నిర్ణయం తీసుకుంటామని అధికారులు హామీ ఇచ్చారని తెలిపారు. రిటైర్డ్ ఉద్యోగులకు రెండు నెలలకు సరిపడా మందులు అందించేందుకు కూడా అంగీకారం తెలిపినట్లు చెప్పారు. అదనంగా తార్నాక ఆస్పత్రిలో రోగుల వెంట వచ్చే అటెండర్ల కోసం రూ.40 లక్షల వ్యయంతో వసతి సదుపాయాలు ఏర్పాటు చేయాలని నిర్ణయించారని వెల్లడించారు. ఈ చర్యలు ఉద్యోగుల సంక్షేమానికి దోహదపడతాయని పేర్కొన్నారు.

ఇక రిటైర్ అయిన ఉద్యోగులకు సంబంధించిన 2017 వేతన సవరణ బకాయిల అంశంపైనా సమావేశంలో చర్చ జరిగిందని తెలిపారు. ఆ బకాయిలను దశలవారీగా చెల్లించేందుకు ప్రభుత్వానికి ప్రతిపాదనలు పంపించి త్వరితగతిన పరిష్కారం తీసుకురావడానికి ప్రయత్నిస్తామని అధికారులు చెప్పినట్లు వెల్లడించారు. రిటైర్డ్ ఉద్యోగులు చాలాకాలంగా ఎదురుచూస్తున్న ఈ అంశంపై ప్రభుత్వం సానుకూలంగా స్పందించడం శుభపరిణామమని ఆయన అన్నారు.

ఇంకా మిగిలిన పలు సమస్యలపై తదుపరి సమావేశంలో చర్చించి నిర్ణయాలు తీసుకుంటామని అధికారులు తెలిపారని హనుమంతు ముదిరాజ్ పేర్కొన్నారు. ఉద్యోగుల హక్కుల సాధన కోసం అన్ని యూనియన్లు ఐక్యంగా పోరాడుతున్నాయని, ప్రభుత్వం కూడా సమస్యల పరిష్కారానికి ముందుకు రావడం సంతోషకరమని అన్నారు. సమావేశం అనంతరం తదుపరి చర్చల వరకు సమావేశాన్ని వాయిదా వేసినట్లు తెలిపారు.ఉద్యోగుల సంక్షేమం కోసం తమ యూనియన్ నిరంతరం కృషి చేస్తుందని, పెండింగ్‌లో ఉన్న అన్ని సమస్యలను కూడా త్వరలో పరిష్కరించే దిశగా పోరాటం కొనసాగుతుందని స్పష్టం చేశారు.
ED (A) వెంకన్న గారు, హైదరాబాద్ జోన్ ED కుష్రోషా ఖాన్, గ్రేటర్ హైదరాబాద్ ఈడి రాజశేఖర్ గారు, కరీంనగర్ జోన్ ED సోలేమాన్ గారు, FA విజయపుష్ప కుమారి, CPM ఉషా దేవి, విజిలెన్స్ డైరెక్టర్ నర్మదా, తార్నాక సూపర్ ఇండెంట్ శైలజ మూర్తి పాల్గొన్నారు