దోమ తహసీల్దార్ కార్యాలయంపై ఏసీబీ దాడులు

• కళ్యాణలక్ష్మి దరఖాస్తు పేరుతో రూ.2 వేల లంచం తీసుకుంటుండగా జీపీఓ పట్టివేత

శ్రీ బల భీమ న్యూస్ /దోమ, జూలై 27 (ప్రతినిధి):

వికారాబాద్ జిల్లా పరిగి మండల పరిధిలోని దోమ తహసీల్దార్ కార్యాలయంలో అవినీతి నిరోధక శాఖ (ఏసీబీ) అధికారులు సోమవారం ఆకస్మికంగా దాడులు నిర్వహించారు. కళ్యాణలక్ష్మి పథకం దరఖాస్తుకు సంబంధించిన పనిని పూర్తి చేయడానికి మోత్కూర్ గ్రామానికి చెందిన జీపీఓ జగదీశ్ లంచం డిమాండ్ చేసినట్లు వచ్చిన ఫిర్యాదుపై అధికారులు ఉచ్చుపన్ని చర్యలు చేపట్టారు.

ఫిర్యాదు ప్రకారం, బాధితుల నుంచి మొత్తం రూ.6,000 లంచం కోరిన జగదీశ్, తొలి విడతగా రూ.2,000 నగదు స్వీకరిస్తుండగా ఏసీబీ అధికారులు రెడ్‌హ్యాండెడ్‌గా పట్టుకున్నారు. బాధితులు ముందుగా అవినీతి నిరోధక శాఖను ఆశ్రయించడంతో అధికారులు పక్కా ప్రణాళికతో ఈ ఆపరేషన్ నిర్వహించారు.

జగదీశ్‌ను అదుపులోకి తీసుకున్న అధికారులు, నగదును స్వాధీనం చేసుకుని కేసు నమోదు చేసి విచారణ చేపట్టారు. ఈ ఘటనతో దోమ తహసీల్దార్ కార్యాలయంలో కొంతసేపు కలకలం నెలకొంది.

ప్రభుత్వ కార్యాలయాల్లో అవినీతికి తావులేకుండా చర్యలు కొనసాగిస్తామని, ఎవరైనా ప్రభుత్వ ఉద్యోగులు లంచం డిమాండ్ చేస్తే వెంటనే ఏసీబీ అధికారులకు సమాచారం అందించాలని అధికారులు ప్రజలకు సూచించారు. ప్రస్తుతం ఈ కేసుకు సంబంధించిన పూర్తి వివరాలను అధికారులు సేకరిస్తున్నారు.