యంగ్ ఇండియా స్టూడెంట్ కిట్స్ పంపిణీ కార్యక్రమంలో సీఎం రేవంత్ రెడ్డి

• విద్యపై భారీ పెట్టుబడులు.. తెలంగాణను ఎడ్యుకేషన్ హబ్‌గా తీర్చిదిద్దడమే లక్ష్యం

శ్రీ బల భీమ న్యూస్ / కొడంగల్ , జూన్ 19:

తెలంగాణ రాష్ట్ర భవిష్యత్తు తరగతి గదుల్లోనే ఉందని, విద్యార్థుల భవిష్యత్తును తీర్చిదిద్దడమే తమ ప్రభుత్వ ప్రధాన లక్ష్యమని ముఖ్యమంత్రి ఎ. రేవంత్ రెడ్డి స్పష్టం చేశారు. యంగ్ ఇండియా స్టూడెంట్ కిట్స్ పంపిణీ కార్యక్రమంలో పాల్గొన్న ఆయన విద్యార్థులను ఉద్దేశించి ప్రసంగించారు.

తెలంగాణ రాష్ట్రం ఏర్పడటం వెనుక అరవై ఏళ్ల సుదీర్ఘ పోరాటం, వందలాది మంది యువత ఆత్మబలిదానాలు ఉన్నాయని సీఎం గుర్తు చేశారు. తెలంగాణ సాధన కోసం ఎన్నో కుటుంబాలు త్యాగాలు చేశాయని, ఆ త్యాగాల ఫలితంగా వచ్చిన రాష్ట్రాన్ని అన్ని రంగాల్లో అభివృద్ధి చేయాల్సిన బాధ్యత మనందరిపై ఉందన్నారు.

తెలంగాణ భవిష్యత్తు విద్యార్థుల చేతుల్లోనే ఉందని తమ ప్రభుత్వం సంపూర్ణ విశ్వాసంతో ముందుకు సాగుతోందన్నారు. గత పదేళ్లలో విద్యా వ్యవస్థ తీవ్ర నిర్లక్ష్యానికి గురైందని, ప్రభుత్వ పాఠశాలలను బలోపేతం చేయకుండా విద్యారంగాన్ని విధ్వంసం చేశారని విమర్శించారు. విద్యా వ్యవస్థను పునరుద్ధరించి పేదలకు నాణ్యమైన విద్య అందించాలనే సంకల్పంతో విద్యాశాఖను తన వద్దే ఉంచుకున్నట్లు తెలిపారు.

రాష్ట్ర బడ్జెట్‌లో విద్యకు అత్యంత ప్రాధాన్యత ఇచ్చామని, మొత్తం బడ్జెట్‌లో 8.5 శాతం నిధులను విద్య కోసం కేటాయించామని సీఎం వెల్లడించారు. విద్యా అభివృద్ధి కోసం రాష్ట్ర ప్రభుత్వం రూ.26,600 కోట్లను ఖర్చు చేస్తోందని తెలిపారు. ఇది కేవలం ఖర్చు కాదని, భవిష్యత్ తరాల కోసం చేస్తున్న పెట్టుబడిగా భావిస్తున్నామని పేర్కొన్నారు.

పదేళ్లపాటు అధికారంలో ఉన్న గత ప్రభుత్వం విద్యార్థుల సంక్షేమాన్ని పట్టించుకోలేదని, డైట్ మరియు కాస్మోటిక్ చార్జీలను కూడా పెంచలేదని విమర్శించారు. తమ ప్రభుత్వం అధికారంలోకి వచ్చిన వెంటనే విద్యార్థుల అవసరాలను గుర్తించి ఆ చార్జీలను పెంచినట్లు చెప్పారు.

ప్రభుత్వ పాఠశాలలను ప్రైవేట్ విద్యాసంస్థలకు ధీటుగా తీర్చిదిద్దేందుకు పలు సంస్కరణలు చేపట్టామని సీఎం వెల్లడించారు. ప్రీ-ప్రైమరీ విద్యా విధానాన్ని ప్రవేశపెట్టి ప్రభుత్వ పాఠశాలల్లోనే నాణ్యమైన విద్య అందించే దిశగా అడుగులు వేస్తున్నామని చెప్పారు. ఒకప్పుడు ప్రభుత్వ పాఠశాలల్లో విద్యార్థులు లేక మూసివేసే పరిస్థితులు ఉండగా, ఇప్పుడు ప్రభుత్వ పాఠశాలల వద్ద ‘నో అడ్మిషన్’ బోర్డులు పెట్టాల్సిన పరిస్థితి రావడం గొప్ప మార్పుకు నిదర్శనమన్నారు.

ఆరుట్ల పబ్లిక్ స్కూల్ ఏర్పాటు ద్వారా అసాధ్యమనుకున్న లక్ష్యాన్ని సుసాధ్యం చేశామని, ఇది విద్యారంగంలో కొత్త అధ్యాయానికి నాంది పలికిందన్నారు. అలాగే యంగ్ ఇండియా ఇంటిగ్రేటెడ్ రెసిడెన్షియల్ స్కూల్స్ నిర్మాణం ద్వారా తెలంగాణను దేశానికి ఆదర్శంగా నిలబెట్టే ప్రయత్నం చేస్తున్నామని తెలిపారు.

కేవలం విద్య మాత్రమే కాకుండా క్రీడా రంగ అభివృద్ధిపైనా ప్రభుత్వం ప్రత్యేక దృష్టి సారించిందని సీఎం పేర్కొన్నారు. రాబోయే ఒలింపిక్స్‌ను లక్ష్యంగా చేసుకొని యంగ్ ఇండియా స్పోర్ట్స్ యూనివర్సిటీని ఏర్పాటు చేశామని తెలిపారు. తెలంగాణ యువత అంతర్జాతీయ స్థాయిలో రాణించేలా అన్ని వసతులు కల్పిస్తున్నామని చెప్పారు.

ప్రపంచవ్యాప్తంగా కృత్రిమ మేధస్సు (AI) ప్రభావం పెరుగుతున్న నేపథ్యంలో కోట్లాది మంది ఉద్యోగ అవకాశాలను కోల్పోయే పరిస్థితి ఏర్పడుతోందని సీఎం ఆందోళన వ్యక్తం చేశారు. ఈ పరిస్థితులను దృష్టిలో ఉంచుకొని యువతకు నైపుణ్యాభివృద్ధి శిక్షణ అందించే కార్యక్రమాలను విస్తృతంగా అమలు చేస్తున్నామని చెప్పారు. ఇంగ్లీష్‌తో పాటు జర్మన్, జపనీస్ వంటి అంతర్జాతీయ భాషలను నేర్పించే కార్యక్రమాలు చేపట్టామని వెల్లడించారు.

రాష్ట్రంలోని ఐటీఐలను ఆధునిక అవసరాలకు అనుగుణంగా ఏటీసీలుగా మారుస్తున్నామని, స్కిల్ యూనివర్సిటీని ఏర్పాటు చేసి యువతకు ఉపాధి అవకాశాలు కల్పించే దిశగా చర్యలు తీసుకుంటున్నామని తెలిపారు. ప్రతి విద్యార్థిలో ఉన్న ప్రతిభను గుర్తించి, దానికి పదును పెట్టి ప్రపంచ స్థాయిలో పోటీ పడేలా తీర్చిదిద్దడమే ప్రభుత్వ లక్ష్యమన్నారు.

సాంఘిక సంక్షేమ గురుకులాల్లో చదువుతున్న విద్యార్థులు భవిష్యత్తులో డాక్టర్లు, ఐఏఎస్ అధికారులు, ఐపీఎస్ అధికారులు, శాస్త్రవేత్తలు, రాజకీయ నాయకులుగా ఎదగాలని సీఎం ఆకాంక్షించారు. తెలంగాణ పునర్నిర్మాణంలో విద్యార్థులే ప్రధాన భాగస్వాములని, భవిష్యత్తులో దేశాన్ని నడిపించే నాయకత్వ శక్తిగా ఎదగాలని పిలుపునిచ్చారు.

“మీ తలరాతను మార్చేది చదువొక్కటే. మీరు బాగా చదవండి. మీకు ఏం కావాలో ఇచ్చే బాధ్యత మీ రేవంతన్న తీసుకుంటాడు” అంటూ సీఎం విద్యార్థుల్లో ఆత్మవిశ్వాసం నింపారు.

ఈ సందర్భంగా రాష్ట్రవ్యాప్తంగా 27.50 లక్షల మంది విద్యార్థులకు యంగ్ ఇండియా స్టూడెంట్ కిట్స్ పంపిణీ చేస్తున్నట్లు ముఖ్యమంత్రి ప్రకటించారు. విద్యార్థులకు అవసరమైన విద్యా సామగ్రిని అందించి వారి చదువుకు మరింత ప్రోత్సాహం కల్పించడమే ఈ కార్యక్రమం ప్రధాన ఉద్దేశమన్నారు.

తెలంగాణను దేశంలోనే అత్యుత్తమ విద్యా కేంద్రంగా, క్రీడా కేంద్రంగా తీర్చిదిద్దడమే తమ ప్రభుత్వ లక్ష్యమని, ఆ దిశగా నిరంతరం కృషి కొనసాగుతుందని సీఎం రేవంత్ రెడ్డి స్పష్టం చేశారు.