మెట్రో ఫేజ్-2కు కేంద్రం సహకరించాలి.. లేదంటే NOC ఇవ్వాలి: సీఎం రేవంత్ రెడ్డి

శ్రీ బల భీమ న్యూస్ / కొడంగల్

 తెలంగాణ రాష్ట్ర అభివృద్ధికి అత్యంత కీలకమైన హైదరాబాద్ మెట్రో రైలు విస్తరణ ప్రాజెక్టుపై కేంద్ర ప్రభుత్వం స్పష్టత ఇవ్వాలని ముఖ్యమంత్రి రేవంత్ రెడ్డి డిమాండ్ చేశారు. సచివాలయంలో ఏర్పాటు చేసిన మీడియా సమావేశంలో ఆయన మాట్లాడుతూ మెట్రో ఫేజ్-2 ప్రాజెక్టు అమలులో కేంద్రం సహకరించకపోవడం వల్ల రాష్ట్ర ప్రజల ప్రయోజనాలు దెబ్బతింటున్నాయని ఆవేదన వ్యక్తం చేశారు.

జంటనగరాల ప్రజలకు, ముఖ్యంగా CURE పరిధిలోని ప్రజలకు అంతర్జాతీయ ప్రమాణాలతో కూడిన రవాణా సౌకర్యాలు అందించడం ప్రభుత్వ లక్ష్యమని సీఎం స్పష్టం చేశారు. హైదరాబాద్‌ను ప్రపంచ స్థాయి నగరంగా తీర్చిదిద్దే క్రమంలో మెట్రో విస్తరణ అత్యవసరమని పేర్కొన్నారు.

ఆనాటి కాంగ్రెస్ ప్రభుత్వ హయాంలోనే హైదరాబాద్‌కు మెట్రో రైలు ప్రాజెక్టును తీసుకురావడానికి ప్రణాళికలు రూపొందించారని గుర్తు చేశారు. మాజీ ముఖ్యమంత్రి వైఎస్ రాజశేఖర రెడ్డి హయాంలో అప్పటి కేంద్ర పట్టణాభివృద్ధి శాఖ మంత్రి జైపాల్ రెడ్డి కృషితో మెట్రో ప్రాజెక్టు రూపుదిద్దుకుందని తెలిపారు. వైఎస్ మరణానంతరం రోశయ్య ముఖ్యమంత్రిగా ఉన్న సమయంలో మెట్రో తొలి దశ ఒప్పందాలు కుదిరాయని వెల్లడించారు.

2017 నాటికి మెట్రో తొలి దశ పూర్తి చేయాలన్న లక్ష్యంతో పనులు ప్రారంభమైనప్పటికీ, తెలంగాణ ఏర్పడిన తర్వాత కొన్ని చారిత్రక కట్టడాల పరిరక్షణ పేరుతో ప్రాజెక్టుకు ఆటంకాలు కల్పించారని సీఎం ఆరోపించారు. దీంతో మెట్రో పనులు మూడేళ్లు ఆలస్యమయ్యాయని, రూ.15 వేల కోట్లతో పూర్తి కావాల్సిన ప్రాజెక్టు వ్యయం రూ.22 వేల కోట్లకు చేరిందని తెలిపారు.

ప్రాజెక్టు ఆలస్యం, అనంతరం కోవిడ్ ప్రభావం కారణంగా మెట్రో నిర్మాణ సంస్థ ఎల్ అండ్ టీ తీవ్ర ఆర్థిక ఇబ్బందుల్లో పడిందన్నారు. పదేళ్ల పాటు అధికారంలో ఉన్న గత ప్రభుత్వం మెట్రో విస్తరణపై సరైన దృష్టి పెట్టలేదని విమర్శించారు. ప్రజా అవసరాల కంటే వ్యక్తిగత ప్రయోజనాలకే ప్రాధాన్యం ఇచ్చారని ఆరోపించారు.

ఒకప్పుడు దేశంలో అగ్రస్థానాల్లో ఉన్న హైదరాబాద్ మెట్రో ప్రస్తుతం తొమ్మిదో స్థానానికి పడిపోయిందని సీఎం ఆవేదన వ్యక్తం చేశారు. అందుకే ప్రజా ప్రభుత్వం అధికారంలోకి వచ్చిన వెంటనే మెట్రో విస్తరణకు ప్రాధాన్యం ఇచ్చిందన్నారు.

మెట్రో ఫేజ్-2 కోసం ప్రధానమంత్రి సహా పలువురు కేంద్ర మంత్రులను కలిసి విజ్ఞప్తి చేశామని రేవంత్ రెడ్డి వెల్లడించారు. అయితే కేంద్ర ప్రభుత్వం విధించిన నిబంధనల ప్రకారం ఫేజ్-1 నిర్మించిన ఎల్ అండ్ టీ సంస్థే ఫేజ్-2ను కూడా నిర్మించాలని పేర్కొనగా, ఎల్ అండ్ టీ ఇందుకు అంగీకరించలేదని చెప్పారు.

ఇప్పటికే భారీ నష్టాల్లో ఉన్నందున ఫేజ్-2 నిర్మాణం చేపట్టడం తమ వల్ల కాదని ఎల్ అండ్ టీ స్పష్టం చేసిందన్నారు. రూ.30 వేల కోట్ల విలువైన ఆస్తులు ఉన్నప్పటికీ ఏటా సుమారు రూ.400 కోట్ల నష్టం వస్తోందని సంస్థ తెలిపిందన్నారు. భవిష్యత్ నిర్వహణ బాధ్యతలు కూడా స్వీకరించేందుకు నిరాకరించిందని వెల్లడించారు.

ఈ పరిస్థితుల్లో కేంద్ర ప్రభుత్వాన్ని సంప్రదించగా, మెట్రోను రాష్ట్ర ప్రభుత్వం స్వాధీనం చేసుకోవడమే సరైన పరిష్కారమని సూచించిందని సీఎం తెలిపారు. దాంతో రూ.30 వేల కోట్ల విలువైన మెట్రో ఆస్తులను రాష్ట్ర ప్రభుత్వం రూ.15 వేల కోట్లకే స్వాధీనం చేసుకుందని చెప్పారు.

ఎల్ అండ్ టీ మెట్రోపై రూ.13,600 కోట్ల రుణం 8.25 శాతం వడ్డీతో బ్యాంకుల నుంచి తీసుకుందని, ఆ రుణాన్ని రాష్ట్ర ప్రభుత్వానికి బదిలీ చేయాలని కేంద్రాన్ని కోరినట్లు వెల్లడించారు. అదే సమయంలో భారతీయ రైల్వే ఫైనాన్స్ కార్పొరేషన్ (IRFC) ద్వారా తక్కువ వడ్డీకి రుణాలు పొందేందుకు చర్యలు తీసుకున్నట్లు తెలిపారు.

గత ప్రభుత్వ హయాంలో పీఎఫ్‌సీ, ఆర్‌ఈసీ ద్వారా భారీగా అప్పులు తీసుకున్నప్పటికీ, ఇప్పుడు రాష్ట్ర ప్రయోజనాల కోసం తీసుకొస్తున్న రుణాల విషయంలో కేంద్రం సహకరించడం లేదని విమర్శించారు. జపాన్ సంస్థల సహకారంతో 4 శాతం వడ్డీకే రూ.13,600 కోట్ల రుణం సమకూర్చామని చెప్పారు.

ఇప్పటికే రాష్ట్ర ప్రభుత్వం రూ.1,400 కోట్లు చెల్లించిందని, రుణం విడుదల కావాల్సిన దశలో కేంద్ర మంత్రి కిషన్ రెడ్డి అడ్డుకుంటున్నారని ఆరోపించారు. మే 20న కేంద్ర మంత్రి మనోహర్ లాల్ ఖట్టర్‌ను, మే 21న కేంద్ర మంత్రి అశ్విని వైష్ణవ్‌ను కలిసి రుణ బదిలీని నిలిపివేయాలని ప్రయత్నించారని పేర్కొన్నారు.

జపాన్ సంస్థ ఇప్పటికే నిధులను IRFCకు విడుదల చేసినప్పటికీ రాష్ట్ర ప్రభుత్వానికి బదిలీ కావడం లేదని సీఎం తెలిపారు. ఈ ఆలస్యంతో పెరుగుతున్న వడ్డీ భారాన్ని ఎవరు భరిస్తారని ప్రశ్నించారు. రిజర్వ్ బ్యాంక్ అనుమతులకు సంబంధించిన పత్రాలు కూడా అందజేసినా రుణ బదిలీ నిలిచిపోయిందని ఆరోపించారు.

కేంద్ర ప్రభుత్వం మెట్రో ఫేజ్-2లో 50 శాతం భాగస్వామ్యం చేయలేకపోతే కనీసం నిరభ్యంతర పత్రం (NOC) ఇవ్వాలని సీఎం కోరారు. రాష్ట్ర ప్రభుత్వం స్వంతంగా మెట్రో విస్తరణ చేపట్టేందుకు సిద్ధంగా ఉందని స్పష్టం చేశారు.

సికింద్రాబాద్ ఎంపీగా ఉన్న కిషన్ రెడ్డి తన నియోజకవర్గ ప్రజల ప్రయోజనాల కోసం బాధ్యత వహించాలని కోరారు. వరంగల్ విమానాశ్రయం అభివృద్ధి విషయంలో కూడా కేంద్రం నిర్లక్ష్య వైఖరి అవలంబిస్తోందని ఆరోపించారు.

మెట్రో ఫేజ్-2కు సంబంధించి కేంద్ర ప్రభుత్వం స్పష్టమైన నిర్ణయం తీసుకోవాలని, 122 కిలోమీటర్ల విస్తరణ ప్రాజెక్టులో భాగస్వామ్యం చేస్తుందా లేదా తేల్చి చెప్పాలని డిమాండ్ చేశారు. లేకపోతే NOC ఇచ్చి రాష్ట్ర ప్రభుత్వానికి పూర్తి స్వేచ్ఛ కల్పించాలని విజ్ఞప్తి చేశారు.

కిషన్ రెడ్డి పట్ల గౌరవం ఉన్నప్పటికీ, ఆయన వ్యవహార శైలిపై అసహనం ఉందని సీఎం పేర్కొన్నారు. తెలంగాణ పట్ల కేంద్రం వివక్ష చూపుతోందని ఆరోపిస్తూ, అహ్మదాబాద్, ఉత్తరప్రదేశ్, విశాఖపట్నం వంటి ప్రాంతాలకు మెట్రో ప్రాజెక్టులకు అనుమతులు ఇచ్చి తెలంగాణకు ఇవ్వకపోవడం అన్యాయమన్నారు.

రాజకీయ ప్రయోజనాల కోసం తాను మాట్లాడటం లేదని, హైదరాబాద్ మెట్రో తొలి దశను స్వాధీనం చేసుకుని మెట్రో ఫేజ్-2ను పూర్తి చేయడమే రాష్ట్ర ప్రభుత్వ లక్ష్యమని ముఖ్యమంత్రి రేవంత్ రెడ్డి స్పష్టం చేశారు.