అంతర్రాష్ట్ర కరుడుగట్టిన దొంగ వికాస్ సింగ్ అరెస్ట్

• 61 చోరీ కేసుల్లో నిందితుడు – కోట్ల విలువైన బంగారం,
• వెండి దోపిడీలకు తెరదించిన వికారాబాద్ పోలీసులు

శ్రీ బల భీమ న్యూస్ / కొడంగల్ : వికారాబాద్, జూన్ 4:
వికారాబాద్ జిల్లా పోలీసులు అత్యంత చాకచక్యంగా వ్యవహరించి అంతర్రాష్ట్ర స్థాయిలో వరుస చోరీలకు పాల్పడుతున్న కరుడుగట్టిన నేరస్థుడు వికాస్ సింగ్ అలియాస్ తేజా సింగ్‌ను అరెస్ట్ చేశారు. నిందితుడిపై గతంలో నమోదైన కేసులతో పాటు తాజాగా ఒప్పుకున్న కేసులను కలుపుకుని మొత్తం 61 కేసులు ఉన్నట్లు జిల్లా ఎస్పీ శ్రీమతి స్నేహ మెహ్రా వెల్లడించారు. నిందితుడి అరెస్టుతో వికారాబాద్, సైబరాబాద్, మల్కాజ్‌గిరి కమిషనరేట్ పరిధుల్లో జరిగిన పలు రాత్రిపూట దొంగతనాల మిస్టరీకి తెరపడింది.

మణికంఠ నగర్ చోరీ కేసు దర్యాప్తులో కీలక మలుపు

వికారాబాద్ పట్టణంలోని మణికంఠ నగర్ కాలనీలో గత నెల మే 1వ తేదీ రాత్రి ఒక ఇంట్లోకి చొరబడి సుమారు ఒకటిన్నర తులాల బంగారు ఆభరణాలు, రూ.2.10 లక్షల నగదును అపహరించిన ఘటన సంచలనం సృష్టించింది. బాధితుల ఫిర్యాదు మేరకు కేసు నమోదు చేసిన పోలీసులు దర్యాప్తును వేగవంతం చేశారు.

జిల్లా ఎస్పీ స్నేహ మెహ్రా ఆదేశాల మేరకు డీఎస్పీ అంజయ్య పర్యవేక్షణలో సీసీఎస్ ఇన్‌స్పెక్టర్ బల్వంత్ రాయ్, వికారాబాద్ టౌన్ ఇన్‌స్పెక్టర్ రఘుకుమార్ నేతృత్వంలోని ప్రత్యేక బృందం రంగంలోకి దిగింది. సీసీ కెమెరా దృశ్యాలు, సాంకేతిక ఆధారాలు, నిఘా సమాచారం ఆధారంగా లోతైన విచారణ జరిపి చివరకు ప్రధాన నిందితుడిని గుర్తించి అదుపులోకి తీసుకుంది.

ఉత్తరప్రదేశ్‌కు చెందిన వికాస్ సింగ్‌గా గుర్తింపు

నేరస్థుడు ఉత్తరప్రదేశ్ రాష్ట్రానికి చెందిన వికాస్ సింగ్ అలియాస్ తేజా సింగ్‌గా పోలీసులు గుర్తించారు. ప్రస్తుతం సంగారెడ్డి జిల్లా ఐడీఏ బొల్లారం, పోచమ్మ బస్తీ, గాంధీనగర్, సూరారం ప్రాంతాల్లో నివాసం ఉంటూ కూలీ పనులు చేస్తున్నట్లు నటిస్తూ రాత్రి వేళల్లో తాళాలు వేసి ఉన్న ఇళ్లను లక్ష్యంగా చేసుకుని చోరీలకు పాల్పడుతున్నట్లు దర్యాప్తులో తేలింది.

16 ఏళ్ల వయసులోనే నేర జీవితం ప్రారంభం

వికాస్ సింగ్ నేరచరిత్ర పోలీసులను సైతం ఆశ్చర్యానికి గురిచేసింది. కేవలం 16 ఏళ్ల వయసులోనే దొంగతనాలను ప్రారంభించిన అతనిపై సంగారెడ్డి, బొల్లారం తదితర ప్రాంతాల్లో అనేక కేసులు నమోదయ్యాయి. 2018లో నాలుగు కేసులు, 2021లో తొమ్మిది కేసులు, 2022లో 21 కేసుల్లో అరెస్టై జైలు శిక్ష అనుభవించాడు. 2024 జూన్ 26న జైలు నుంచి విడుదలైనప్పటికీ ప్రవర్తనలో ఎలాంటి మార్పు రాకపోవడంతో మళ్లీ నేరాలకు పాల్పడ్డాడు.

27 కొత్త కేసులు ఒప్పుకున్న నిందితుడు

జైలు నుంచి విడుదలైన తర్వాత వికారాబాద్ జిల్లా, సైబరాబాద్, మల్కాజ్‌గిరి పరిధుల్లో మొత్తం 27 రాత్రిపూట చోరీ కేసులకు పాల్పడినట్లు విచారణలో ఒప్పుకున్నాడు. ఈ కేసుల్లో సుమారు 157 తులాల బంగారం, 256 తులాల వెండి, రూ.8.22 లక్షల నగదును అపహరించినట్లు వెల్లడించాడు.

సినిమా స్టైల్ జీవితం.. దొంగసొమ్ముతో సేవా కార్యక్రమాలు

పోలీసుల విచారణలో వెలుగులోకి వచ్చిన అంశాలు సంచలనం సృష్టిస్తున్నాయి. దొంగతనాల ద్వారా వచ్చిన డబ్బుతో వికాస్ సింగ్ విలాసవంతమైన జీవితం గడిపేవాడని తేలింది. అంతేకాకుండా తన స్వగ్రామంలో “హెల్పింగ్ హ్యాండ్” పేరుతో ఒక స్వచ్ఛంద సంస్థను నిర్వహిస్తూ పేద విద్యార్థులకు స్కూల్ బ్యాగులు, నోట్‌బుక్స్ పంపిణీ చేసేవాడు.

ఇదే కాకుండా తన స్నేహితులను చెన్నై, గోవా, విజయవాడ, విశాఖపట్నం, బెంగళూరు, రాజస్థాన్, డెహ్రాడూన్ వంటి ప్రాంతాలకు విహారయాత్రలకు తీసుకెళ్లి స్థానిక ప్రజల్లో మంచి వ్యక్తిగా గుర్తింపు పొందేందుకు ప్రయత్నించినట్లు పోలీసులు గుర్తించారు. దీంతో అతడిపై స్థానికంగా ఎవరికీ అనుమానం రాకుండా ఒక సామాజిక రక్షణ వలయం ఏర్పడినట్లు తెలుస్తోంది.

దొంగసొమ్మును కొనుగోలు చేసిన బంగారం వ్యాపారుల ముఠా

విచారణలో మరో కీలక అంశం వెలుగులోకి వచ్చింది. వికాస్ సింగ్ దొంగిలించిన బంగారు ఆభరణాలను ఉత్తరప్రదేశ్ రాష్ట్రంలోని సుల్తాన్‌పూర్ జిల్లాకు చెందిన పలువురు బంగారం వ్యాపారులకు విక్రయిస్తున్నట్లు తేలింది.

కుర్వర్ ప్రాంతానికి చెందిన శ్యామ్ మోహన్, సూరజ్ మోహన్, అశోక్ సోని, భగ్వాన్‌పూర్ ప్రాంతానికి చెందిన వికాస్ అగ్రహారి అనే జ్యువెలరీ వ్యాపారులు నిందితుడి నుంచి దొంగసొమ్మును కొనుగోలు చేస్తున్నట్లు పోలీసులు గుర్తించారు.

నేరాలకు ప్రోత్సహించిన వ్యాపారులు

మైనర్ వయసులో చేసిన దొంగతనాల నుంచే ఈ వ్యాపారులు తనతో సంబంధాలు కొనసాగించారని వికాస్ సింగ్ విచారణలో వెల్లడించాడు. ఇతర రాష్ట్రాల్లో చోరీలు చేసినా తమకు బంగారం అమ్మితే ఎలాంటి ఇబ్బందులు ఉండవని చెప్పి ప్రోత్సహించారని తెలిపాడు.

అంతేకాకుండా ఒక దశలో దొంగతనాలు చేయడానికి భయపడుతున్న సమయంలో ఈ వ్యాపారులే తలా రూ.10 వేల చొప్పున మొత్తం రూ.40 వేలు ఇచ్చి అక్రమంగా తుపాకీ కొనుగోలు చేయడానికి సహకరించారని సంచలన విషయాలు బయటపెట్టాడు.

తుపాకీతో పాటు బంగారు ఆభరణాల స్వాధీనం

నిందితుడి వద్ద నుంచి ఒకటిన్నర తులాల బంగారు ఆభరణాలు, 5 ఎంఎం పిస్టల్‌ను పోలీసులు స్వాధీనం చేసుకున్నారు. దర్యాప్తు కొనసాగుతున్న నేపథ్యంలో మరిన్ని చోరీ కేసులు వెలుగులోకి వచ్చే అవకాశం ఉందని అధికారులు భావిస్తున్నారు.

రిసీవర్లపై కఠిన చర్యలు

దొంగసొమ్ము కొనుగోలు చేసిన వ్యాపారులు ఒక వ్యవస్థీకృత ముఠాగా ఏర్పడి నేరాలకు ప్రోత్సహిస్తున్నట్లు తేలడంతో వారిపై ఆర్గనైజ్డ్ క్రైమ్, ఆర్మ్స్ యాక్ట్ తదితర చట్టాల కింద కేసులు నమోదు చేయనున్నట్లు ఎస్పీ తెలిపారు. అవసరమైతే పీడీ యాక్ట్ కూడా ప్రయోగిస్తామని హెచ్చరించారు.

ఈ వ్యాపారులను అరెస్ట్ చేసేందుకు ప్రత్యేక దర్యాప్తు బృందాన్ని ఏర్పాటు చేసినట్లు వెల్లడించారు.

ప్రజలకు ఎస్పీ సూచనలు

జిల్లాలో శాంతిభద్రతల పరిరక్షణకు ప్రజల సహకారం అవసరమని ఎస్పీ స్నేహ మెహ్రా పేర్కొన్నారు. కాలనీలు, గ్రామాల్లో అనుమానాస్పద వ్యక్తులు కనిపిస్తే వెంటనే పోలీసులకు సమాచారం అందించాలని సూచించారు. ఇళ్ల వద్ద సీసీ కెమెరాలు ఏర్పాటు చేసుకోవడం ద్వారా నేరాలను అరికట్టవచ్చన్నారు.

పోలీసు బృందానికి ప్రశంసలు

అంతర్రాష్ట్ర స్థాయిలో నేరాలకు పాల్పడుతున్న నిందితుడిని పట్టుకోవడంలో కీలక పాత్ర పోషించిన డీఎస్పీ అంజయ్య, సీసీఎస్ ఇన్‌స్పెక్టర్ బల్వంత్ రాయ్, టౌన్ ఇన్‌స్పెక్టర్ రఘుకుమార్ మరియు వారి బృంద సభ్యులను జిల్లా ఎస్పీ ప్రత్యేకంగా అభినందించారు. వారి ప్రతిభను గుర్తిస్తూ రివార్డులను కూడా ప్రకటించారు.