కొడంగల్‌లో వైన్ షాపులో భారీ చోరీ

• మద్యం, నగదు, సీసీటీవీ హార్డ్‌డిస్క్‌ల అపహరణ
• క్లూస్ టీంతో దర్యాప్తు చేపట్టిన పోలీసులు

కొడంగల్, జూన్ 4: కొడంగల్ పట్టణంలో అర్ధరాత్రి చోటుచేసుకున్న భారీ చోరీ ఘటన స్థానికంగా కలకలం రేపింది. పట్టణంలోని శ్రీ నాగ ఎల్లమ్మ మద్యం దుకాణంలో గుర్తు తెలియని దుండగులు చోరీకి పాల్పడి నగదు, మద్యం సీసాలు, సీసీటీవీ కెమెరాల హార్డ్‌డిస్క్‌లను అపహరించారు. ఈ ఘటనపై సమాచారం అందుకున్న పోలీసులు సంఘటనా స్థలానికి చేరుకుని కేసు నమోదు చేసి దర్యాప్తు ప్రారంభించారు.

వివరాల్లోకి వెళితే.. కొడంగల్ పట్టణంలోని శ్రీ నాగ ఎల్లమ్మ వైన్ షాప్‌ను యజమానులు ప్రతిరోజులాగే బుధవారం రాత్రి సుమారు 10 గంటలకు మూసివేసి వెళ్లిపోయారు. అనంతరం అర్ధరాత్రి సమయంలో గుర్తు తెలియని దుండగులు దుకాణంలోకి ప్రవేశించేందుకు పక్కా ప్రణాళికతో ప్రయత్నించారు. ముందుగా వైన్ షాప్ వెనుక భాగంలో గోతిని తవ్వి రేకులను కట్ చేసి లోపలికి వెళ్లేందుకు యత్నించారు. అయితే అక్కడ ఇనుప జాలి ఉండటంతో వారి ప్రయత్నం విఫలమైంది.

దీంతో దుండగులు మరోవైపు ఉన్న డాబాపైకి ఎక్కి, పైకప్పు రేకులను కత్తిరించి లోపలికి ప్రవేశించారు. అనంతరం షాపులో ఉన్న చిల్లర నగదుతో పాటు కొంత మద్యం సీసాలను అపహరించినట్లు తెలుస్తోంది. అంతేకాకుండా తమ ఆనవాళ్లు బయటపడకుండా ఉండేందుకు షాపులో ఏర్పాటు చేసిన సీసీటీవీ కెమెరాల హార్డ్‌డిస్క్‌లను కూడా తీసుకెళ్లినట్లు సమాచారం.

చోరీకి ముందు దుండగులు అత్యంత చాకచక్యంగా విద్యుత్ సరఫరాను నిలిపివేసేందుకు షాపుకు కరెంటు అందించే సర్వీస్ వైర్‌ను కట్ చేసి, విద్యుత్ మీటర్‌ను పక్కకు పడేసినట్లు పోలీసులు గుర్తించారు. దీంతో సీసీటీవీ వ్యవస్థ పనిచేయకుండా చేసి చోరీకి పాల్పడినట్లు ప్రాథమిక విచారణలో వెల్లడైంది.

గురువారం ఉదయం పక్కనే ఉన్న దుకాణాల యజమానులు షాప్ పరిస్థితిని గమనించి వెంటనే వైన్ షాప్ యజమానులకు సమాచారం అందించారు. హుటాహుటిన అక్కడికి చేరుకున్న యజమానులు దుకాణంలో జరిగిన చోరీని గుర్తించి పోలీసులకు ఫిర్యాదు చేశారు. సమాచారం అందుకున్న కొడంగల్ పోలీసులు సంఘటనా స్థలానికి చేరుకుని పరిశీలించారు.

యజమానులు ఇచ్చిన ఫిర్యాదు మేరకు కేసు నమోదు చేసిన పోలీసులు క్లూస్ టీంను రంగంలోకి దింపారు. గురువారం ఉదయం 11 గంటల సమయంలో క్లూస్ టీం సంఘటనా స్థలానికి చేరుకుని వేలిముద్రలు, ఇతర ఆధారాలను సేకరించింది. దొంగలు ఉపయోగించిన మార్గాలు, వారి ఆనవాళ్లపై క్షుణ్ణంగా పరిశీలనలు చేపట్టింది.

ఈ ఘటనపై పోలీసులు మాట్లాడుతూ, చోరీకి పాల్పడిన దుండగులను త్వరలోనే గుర్తించి అరెస్టు చేస్తామని తెలిపారు. సీసీటీవీ ఫుటేజ్‌లు లేకపోయినప్పటికీ ఇతర సాంకేతిక ఆధారాలు, స్థానిక సమాచారంతో కేసును ఛేదించేందుకు ప్రత్యేక చర్యలు చేపట్టినట్లు వెల్లడించారు.

కొడంగల్ పట్టణ నడిబొడ్డున ఉన్న వైన్ షాప్‌లో జరిగిన ఈ భారీ చోరీ స్థానిక వ్యాపార వర్గాల్లో ఆందోళన కలిగించింది. రాత్రి వేళల్లో భద్రతా చర్యలను మరింత కట్టుదిట్టం చేయాలని వ్యాపారులు పోలీసులను కోరుతున్నారు.