కార్మికుల వేతనాల పెంపుపై సీఎం రేవంత్ రెడ్డి స్పష్టీకరణ

• రైతుల అంశంపై బీఆర్ఎస్‌కు సీఎం ఘాటు వ్యాఖ్యలు

శ్రీ బల భీమ న్యూస్ / కొడంగల్ :

ప్రజా సమస్యలు, దేశాల మధ్య యుద్ధాల వంటి కీలక అంశాలను కూడా బీజేపీ, ప్రధాని మోదీ ప్రభుత్వం రాజకీయ కోణంలోనే చూస్తోందని ముఖ్యమంత్రి రేవంత్ రెడ్డి విమర్శించారు. ఎన్నికలు పూర్తవగానే పెట్రోల్, డీజిల్ ధరలను వరుసగా పెంచుతున్నారని ఆరోపించారు.

సచివాలయంలో నిర్వహించిన మీడియా సమావేశంలో సీఎం మాట్లాడుతూ, తమ ప్రభుత్వం మాత్రం ప్రతి అంశాన్ని దీర్ఘకాలిక దృష్టితో పరిశీలిస్తోందని తెలిపారు. అందుకే రాష్ట్రంలోని కార్మికుల కనీస వేతనాల పెంపుపై కీలక నిర్ణయం తీసుకున్నామని వెల్లడించారు.

ధాన్యం కొనుగోళ్లు 80 శాతం పూర్తి

రాష్ట్రంలో ధాన్యం కొనుగోలు ప్రక్రియ ఇప్పటికే 80 శాతం పూర్తయ్యిందని సీఎం తెలిపారు. మిగిలిన 20 శాతం ప్రక్రియను కూడా త్వరలోనే పూర్తి చేస్తామని చెప్పారు. రైతులకు ఎటువంటి ఇబ్బందులు తలెత్తకుండా ప్రభుత్వం చర్యలు తీసుకుంటోందన్నారు.

“రైతులపై బీఆర్ఎస్ శవ రాజకీయాలు”

రైతుల సమస్యల విషయంలో బీఆర్ఎస్ నేతలు మానవత్వం మరిచిపోయి వ్యవహరిస్తున్నారని సీఎం తీవ్ర స్థాయిలో మండిపడ్డారు. రైతుల సమస్యలను పరిష్కరించేందుకు సూచనలు, సలహాలు ఇవ్వాల్సింది పోయి, శవ రాజకీయాలు చేయాలని చూస్తున్నారని విమర్శించారు.

“రాజకీయాల కోసం మరీ ఇంత దిగజారి వ్యవహరిస్తారా?” అని ప్రశ్నించిన సీఎం, నిజంగా రైతులపై చిత్తశుద్ధి ఉంటే ప్రభుత్వానికి సహకరించాలని సూచించారు.

POCSO కేసుపై సీఎం వివరణ

POCSO కేసులో బండి భగీరథ్‌ను పోలీసులు చట్టపరమైన విధానంలోనే అరెస్టు చేశారని సీఎం స్పష్టం చేశారు. బండి సంజయ్ స్వయంగా తన కుమారుడిని పోలీసులకు అప్పగించి ఉంటే, ఇంటి వద్దే విచారణ జరిగేదని వ్యాఖ్యానించారు.

ఈ కేసును రాజకీయంగా మలచి బీఆర్ఎస్ నేతలు శాడిస్టుల్లా వ్యవహరిస్తున్నారని మండిపడ్డారు. రాజకీయాలు చేయాలంటే ఎన్నికల్లో ఓడించాలని, అంతేకాని వ్యక్తిగతంగా దిగజారి ప్రవర్తించడం సరికాదన్నారు.

“డ్రగ్స్ కేసులోనూ నిబంధనల ప్రకారమే విచారణ”

కేటీఆర్ బావమరిది ఫామ్ హౌస్‌లో డ్రగ్స్ దొరికిన సందర్భంలో కూడా నోటీసులు ఇచ్చి విచారణ నిర్వహించామని సీఎం గుర్తు చేశారు. అదే విధంగా బండి భగీరథ్ విషయంలోనూ నోటీసులు ఇచ్చి, చట్ట ప్రకారమే పోలీసులు విచారణ కొనసాగిస్తున్నారని తెలిపారు.

POCSO కేసులో ఎలాంటి రాజకీయ జోక్యం లేదని, పోలీసులు పూర్తిగా ప్రొసీజర్ ప్రకారమే వ్యవహరిస్తున్నారని సీఎం రేవంత్ రెడ్డి స్పష్టం చేశారు.