కులగణనపై సుప్రీంకోర్టు తీర్పుకు సీఎం రేవంత్ రెడ్డి స్వాగతం

• “తెలంగాణ దేశానికి దిక్సూచిగా నిలిచింది”

శ్రీ బల భీమ న్యూస్ / కొడంగల్ :

బీఆర్ఎస్ వర్కింగ్ ప్రెసిడెంట్ కేటీఆర్ ఇంకా “కల్వకుంట రాజ్యాంగం”లోనే ఉన్నానని భావిస్తున్నారని ముఖ్యమంత్రి రేవంత్ రెడ్డి ఘాటుగా వ్యాఖ్యానించారు. మాజీ ముఖ్యమంత్రి కేసీఆర్ అధికారంలో నుంచి దిగిపోయి చాలా రోజులైనా ఇంకా ప్రజల మధ్యకు రావడం లేదని విమర్శించారు.

మీడియాతో మాట్లాడిన సీఎం, పార్టీ సమావేశం కోసం జగిత్యాలకు వెళ్లిన కేసీఆర్ రాష్ట్రంలో ఇంత పెద్ద సంఘటన జరిగినప్పటికీ ఎందుకు స్పందించలేదని ప్రశ్నించారు. ప్రజా సమస్యలపై స్పందించాల్సిన బాధ్యత ప్రతిపక్ష నాయకులకు కూడా ఉంటుందని సూచించారు.

కులగణనపై సుప్రీంకోర్టు తీర్పుకు స్వాగతం

కులగణన అంశంలో సుప్రీంకోర్టు ఇచ్చిన తీర్పును తెలంగాణ ప్రభుత్వం స్వాగతిస్తోందని సీఎం రేవంత్ రెడ్డి తెలిపారు. తెలంగాణ ప్రభుత్వం తీసుకున్న నిర్ణయాన్ని అత్యున్నత న్యాయస్థానం కూడా సమర్థించడం తమ ప్రభుత్వానికి దక్కిన గౌరవంగా భావిస్తున్నామని పేర్కొన్నారు.

తెలంగాణలో జనగణనతో పాటు కులగణన నిర్వహించి అన్ని వర్గాల వివరాలను ప్రజల ముందుంచామని సీఎం వెల్లడించారు. దేశంలోనే తొలిసారిగా సమగ్ర కులగణన నిర్వహించిన రాష్ట్రంగా తెలంగాణ నిలిచిందన్నారు.

“దేశానికి తెలంగాణ దిక్సూచి”

జనగణనలో కులగణన నిర్వహించడం ద్వారా తెలంగాణ దేశానికి దిక్సూచిగా మారిందని సీఎం పేర్కొన్నారు. బలహీన వర్గాలకు న్యాయం చేయాలంటే వారి సామాజిక, ఆర్థిక పరిస్థితులపై పూర్తి వివరాలు అవసరమని చెప్పారు.

ఈ నేపథ్యంలో కేంద్రంలోని మోదీ ప్రభుత్వం వెంటనే జాతీయ జనగణనలో కులగణనను చేర్చాలని సీఎం డిమాండ్ చేశారు. బలహీన వర్గాలకు విద్య, ఉద్యోగాలు, రాజకీయాలు సహా అన్ని రంగాల్లో సముచిత స్థానం కల్పించాలంటే కులగణన తప్పనిసరి అని స్పష్టం చేశారు.