కార్మికుల సంక్షేమానికి చారిత్రాత్మక నిర్ణయం

• కనీస వేతనాల పెంపుపై సీఎం రేవంత్ రెడ్డి కీలక ప్రకటన

శ్రీ బల భీమ న్యూస్ / కొడంగల్ :
రాష్ట్రంలోని కార్మికుల సంక్షేమం కోసం తెలంగాణ ప్రభుత్వం చారిత్రాత్మక నిర్ణయం తీసుకుందని ముఖ్యమంత్రి రేవంత్ రెడ్డి తెలిపారు. సచివాలయంలో ఏర్పాటు చేసిన మీడియా సమావేశంలో ఆయన మాట్లాడుతూ, గత ప్రభుత్వ నిర్లక్ష్యంతో రాష్ట్రంలోని 1 కోటి 11 లక్షల మంది కార్మికులు తీవ్రంగా నష్టపోయారని విమర్శించారు.

కార్మికుల కనీస వేతనాల పెంపుపై ఉప ముఖ్యమంత్రి భట్టి విక్రమార్క ఆధ్వర్యంలో కేబినెట్ సబ్ కమిటీని ఏర్పాటు చేసి విస్తృతంగా చర్చించిన అనంతరం ప్రభుత్వం ఈ నిర్ణయం తీసుకుందని సీఎం వెల్లడించారు.

కార్మికులకు నాలుగు కేటగిరీలు

ప్రభుత్వం కార్మికులను నాలుగు వర్గాలుగా విభజించింది.

• అన్ స్కిల్డ్
• సెమీ స్కిల్డ్
• స్కిల్డ్
• హైలీ స్కిల్డ్

అలాగే రాష్ట్రాన్ని మూడు జోన్లుగా విభజించి కనీస వేతనాలు నిర్ణయించినట్లు తెలిపారు.

• జోన్-1: మున్సిపల్ కార్పొరేషన్లు
• జోన్-2: మున్సిపాలిటీలు
• జోన్-3: గ్రామీణ ప్రాంతాలు

పెరిగిన కనీస వేతనాలు

కార్మికులకు కనీస వేతనాలను గణనీయంగా పెంచినట్లు సీఎం వివరించారు.

• అన్ స్కిల్డ్ కార్మికుల వేతనం రూ.12,750 నుంచి రూ.16 వేలుకు
• సెమీ స్కిల్డ్ వేతనం రూ.13,152 నుంచి రూ.17 వేలుకు
• స్కిల్డ్ వేతనం రూ.13,772 నుంచి రూ.18,500కు
• హైలీ స్కిల్డ్ వేతనం రూ.14,607 నుంచి రూ.20 వేలుకు పెంచినట్లు తెలిపారు.

ఈ నిర్ణయంతో రాష్ట్రంలోని 1 కోటి 11 లక్షల మంది కార్మికులకు నేరుగా లాభం చేకూరుతుందని సీఎం పేర్కొన్నారు. కొత్త వేతనాలు 2026 జూన్ 1 నుంచి అమల్లోకి వస్తాయని వెల్లడించారు.

“కార్మికుల కోసం ఇదే తొలి పెద్ద నిర్ణయం”

రాష్ట్ర ఆవిర్భావం తర్వాత కార్మికుల సంక్షేమం కోసం తీసుకున్న మొట్టమొదటి కీలక నిర్ణయం ఇదేనని సీఎం రేవంత్ రెడ్డి అన్నారు. గత ప్రభుత్వం తన బాధ్యతను విస్మరించిందని, తమ ప్రభుత్వం మాత్రం బాధ్యతతో కార్మికుల ప్రయోజనాలను దృష్టిలో పెట్టుకుని ఈ నిర్ణయం తీసుకుందని చెప్పారు.

కార్మిక నాయకుడు జి. వెంకటస్వామి సేవలను స్మరించుకుంటూ, ఆయన వారసత్వాన్ని కొనసాగిస్తూ మంత్రి వివేక్ కార్మికుల సంక్షేమానికి కృషి చేస్తున్నారని ప్రశంసించారు.

యువతకు సీఎం సూచనలు

యువతకు సీఎం రేవంత్ రెడ్డి కీలక సూచనలు చేశారు. కేవలం ఐటీ ఉద్యోగాలు, అమెరికా అవకాశాలపైనే దృష్టి పెట్టకుండా సాంకేతిక నైపుణ్యాలను అభివృద్ధి చేసుకోవాలని సూచించారు.

“ఉద్యోగాలు రాని చదువులు వ్యర్థం. జర్మనీ, జపాన్, సింగపూర్ వంటి దేశాల్లో సాంకేతిక నైపుణ్యం కలిగిన వారికి అనేక అవకాశాలు ఉన్నాయి” అని సీఎం అన్నారు.

ఈ నేపథ్యంలోనే రాష్ట్ర ప్రభుత్వం స్కిల్స్ యూనివర్సిటీ ఏర్పాటు చేసి యువతను ప్రోత్సహిస్తోందని తెలిపారు. యువత భవిష్యత్తును దృష్టిలో పెట్టుకుని నైపుణ్యాభివృద్ధిపై దృష్టి సారించాలని సీఎం పిలుపునిచ్చారు.