వడదెబ్బతో ఉపాధిహామీ కూలి మృతి

• కొడంగల్ మండలం నాగారం గ్రామంలో విషాదం
• బాధిత కుటుంబాన్ని ఆదుకోవాలని గ్రామస్తుల వినతి

శ్రీ బల భీమ న్యూస్ /కొడంగల్, జూన్ 6:

మండుతున్న ఎండలు మరో కుటుంబంలో విషాదాన్ని నింపాయి. కుటుంబ పోషణ కోసం ఉపాధిహామీ పనులకు వెళ్లిన ఓ మహిళ వడదెబ్బకు గురై మృతి చెందడంతో నాగారం గ్రామంలో విషాద ఛాయలు అలుముకున్నాయి. ఈ ఘటన కొడంగల్ మండలంలోని నాగారం గ్రామంలో చోటుచేసుకుంది.

గ్రామస్తులు, కుటుంబ సభ్యులు తెలిపిన వివరాల ప్రకారం నాగారం గ్రామానికి చెందిన మ్యాతరి నర్సమ్మ (45) తన భర్త మల్లప్పతో కలిసి కూలి పనులు చేస్తూ కుటుంబాన్ని పోషించుకుంటున్నారు. వీరికి ఒక కుమారుడు ఉన్నాడు . ఆరుగాలం కష్టపడుతూ కుటుంబాన్ని నెట్టుకొస్తున్న ఈ దంపతులు ప్రభుత్వం అమలు చేస్తున్న మహాత్మా గాంధీ జాతీయ గ్రామీణ ఉపాధి హామీ పథకం (ఎంజీఎన్‌ఆర్‌ఈజీఎస్‌) పనులకు ప్రతిరోజూ హాజరవుతూ జీవనం సాగిస్తున్నారు.

ఈ క్రమంలో శనివారం ఉదయం నర్సమ్మ ఉపాధిహామీ పనులకు వెళ్లారు. ప్రభుత్వ మార్గదర్శకాల ప్రకారం ఎండ తీవ్రత దృష్ట్యా ఉదయం వేళల్లోనే పనులు నిర్వహిస్తున్నారు. ఉదయం పని చేస్తున్న సమయంలో కొద్దిసేపు విరామం తీసుకుని భోజనం చేసిన అనంతరం మళ్లీ పనిలో పాల్గొన్నారు. అయితే ఎండ తీవ్రత ఎక్కువగా ఉండటంతో ఆమెకు అస్వస్థత కలిగింది.

పనిలో ఉండగానే ఒక్కసారిగా నర్సమ్మ కుప్పకూలి పడిపోవడంతో తోటి కూలీలు వెంటనే స్పందించారు. ఆమెను సమీప గ్రామంలోని ఓ ప్రైవేటు వైద్యుని వద్దకు తీసుకెళ్లగా, పరిస్థితి విషమంగా ఉందని గుర్తించిన వైద్యుడు వెంటనే కొడంగల్ ప్రభుత్వ ఆసుపత్రికి తరలించాలని సూచించారు. దీంతో 108 అంబులెన్స్‌కు సమాచారం అందించి ఆసుపత్రికి తరలించే ప్రయత్నం చేశారు. అయితే ఆసుపత్రికి చేరుకునేలోపే మార్గమధ్యంలోనే నర్సమ్మ మృతి చెందినట్లు కుటుంబ సభ్యులు తెలిపారు.

నర్సమ్మ మృతితో కుటుంబం తీవ్ర విషాదంలో మునిగిపోయింది. కుటుంబ పోషణలో కీలక పాత్ర పోషిస్తున్న ఆమె ఆకస్మిక మరణం భర్త, పిల్లలను దిక్కుతోచని స్థితిలోకి నెట్టిందని గ్రామస్తులు ఆవేదన వ్యక్తం చేశారు. పేద కుటుంబానికి చెందిన నర్సమ్మ మరణంతో వారి కుటుంబ భవిష్యత్తు ప్రశ్నార్థకంగా మారిందని పేర్కొన్నారు.

గ్రామ సర్పంచ్ పట్లోళ్ల  ప్రశాంతకుమారిమదనసింహారెడ్డి మాట్లాడుతూ ఉపాధిహామీ కూలీల కోసం గ్రామపంచాయతీ తరఫున అన్ని జాగ్రత్తలు తీసుకున్నామని తెలిపారు. కూలీలకు చల్లని తాగునీరు, మజ్జిగ, విశ్రాంతి కోసం నీడతో కూడిన సౌకర్యాలు కల్పించామని చెప్పారు. వడదెబ్బపై అవగాహన కార్యక్రమాలు కూడా నిర్వహిస్తున్నప్పటికీ ఇలాంటి దురదృష్టకర ఘటన చోటుచేసుకోవడం బాధాకరమని పేర్కొన్నారు.సమాచారం అందుకున్న గ్రామపంచాయతీ కార్యదర్శి, ఉపాధిహామీ ఏపీఓ రాములు సంఘటన స్థలానికి చేరుకుని బాధిత కుటుంబ సభ్యులను పరామర్శించారు. ప్రభుత్వం దృష్టికి ఈ విషయాన్ని తీసుకెళ్లి బాధిత కుటుంబానికి నష్టపరిహారం, ఇతర ప్రభుత్వ సహాయాలు అందేలా కృషి చేస్తామని హామీ ఇచ్చారు.

  నర్సమ్మ కుటుంబం ఆర్థికంగా ఎంతో బలహీనంగా ఉందని, ప్రభుత్వం ప్రత్యేకంగా స్పందించి తక్షణ ఆర్థిక సహాయం అందించాలని కోరారు. కుటుంబ సభ్యులకు ఉపాధి అవకాశాలు కల్పించడంతో పాటు పిల్లల విద్యాభ్యాసానికి సహకారం అందించాలని విజ్ఞప్తి చేశారు.

ఇదిలా ఉండగా ప్రస్తుతం జిల్లాలో ఉష్ణోగ్రతలు అధికంగా నమోదవుతున్న నేపథ్యంలో ప్రజలు అప్రమత్తంగా ఉండాలని అధికారులు సూచిస్తున్నారు. ముఖ్యంగా ఉపాధిహామీ కూలీలు, రైతులు, వ్యవసాయ కార్మికులు ఎండలో ఎక్కువసేపు పనిచేయకుండా మధ్య మధ్యలో విశ్రాంతి తీసుకోవాలని, తగినంత నీరు, మజ్జిగ, ఓఆర్‌ఎస్ ద్రావణాలు తీసుకోవాలని వైద్యులు సూచిస్తున్నారు.

వడదెబ్బ లక్షణాలు కనిపించిన వెంటనే సమీప వైద్యులను సంప్రదించాలని, నిర్లక్ష్యం ప్రాణాంతకంగా మారే అవకాశం ఉందని అధికారులు హెచ్చరిస్తున్నారు.