బొంరాస్ పేట చెరువులో గుర్తుతెలియని వ్యక్తి మృతదేహం లభ్యం

• పోలీసుల దర్యాప్తు ప్రారంభం..
• వివరాలు తెలిసిన వారు సమాచారం ఇవ్వాలని విజ్ఞప్తి

శ్రీ బల భీమ న్యూస్ / కొడంగల్ :

బొమ్రస్‌పేట మండల పరిధిలోని పెద్ద చెరువులో గుర్తుతెలియని వ్యక్తి మృతదేహం లభ్యమైన ఘటన స్థానికంగా కలకలం రేపింది. చెరువు సమీపానికి వెళ్లిన గ్రామస్తులు నీటిపై ఒక వ్యక్తి మృతదేహం తేలియాడుతున్నట్లు గమనించి వెంటనే పోలీసులకు సమాచారం అందించారు. సమాచారం అందుకున్న పోలీసులు సంఘటనా స్థలానికి చేరుకుని మృతదేహాన్ని చెరువులో నుంచి బయటకు తీశారు.

పోలీసులు తెలిపిన వివరాల ప్రకారం, మృతుడు సుమారు 60 నుంచి 65 సంవత్సరాల మధ్య వయస్సు కలిగిన వ్యక్తిగా గుర్తించారు. మృతుడు లైట్ కలర్ షర్ట్ ధరించి ఉన్నట్లు పోలీసులు వెల్లడించారు. మృతదేహంపై ప్రాథమికంగా ఎటువంటి గుర్తింపు పత్రాలు లభించకపోవడంతో అతని వివరాలు ఇంకా తెలియరాలేదని పేర్కొన్నారు.

ఈ ఘటనపై కేసు నమోదు చేసి దర్యాప్తు ప్రారంభించినట్లు పోలీసులు తెలిపారు. మృతుడు ప్రమాదవశాత్తు చెరువులో పడి మృతి చెందాడా? లేక మరేదైనా కారణాలు ఉన్నాయా? అనే కోణాల్లో విచారణ కొనసాగిస్తున్నట్లు సమాచారం. మృతదేహాన్ని పోస్టుమార్టం నిమిత్తం ప్రభుత్వ ఆసుపత్రికి తరలించినట్లు పోలీసులు పేర్కొన్నారు.

ఈ ఘటన విషయం తెలిసిన స్థానికులు చెరువు వద్దకు చేరుకుని ఆందోళన వ్యక్తం చేశారు. గ్రామంలో ఇలాంటి ఘటన జరగడం పట్ల ప్రజలు విచారం వ్యక్తం చేస్తున్నారు. మృతుడి ఆచూకీ కోసం పోలీసులు పరిసర గ్రామాల్లో కూడా సమాచారం సేకరిస్తున్నారు.

మృతుడిని ఎవరైనా గుర్తించినా లేదా అతనికి సంబంధించిన ఎటువంటి సమాచారం ఉన్నా వెంటనే బొమ్రస్‌పేట పోలీస్ స్టేషన్ ఎస్ఐ సెల్ నెంబర్ 8712670047 లేదా కొడంగల్ సీఐ సెల్ నెంబర్ 8712670045కు సమాచారం అందించాలని పోలీసులు ప్రజలను కోరారు.