పట్నం నివాసంలో నీవు పాలేరువి..

• కాంగ్రెస్‌పై విమర్శలు మానుకో
• దౌల్తాబాద్ కాంగ్రెస్ నాయకుల ఆగ్రహం

శ్రీ బల భీమ న్యూస్ / కొడంగల్ :
కొడంగల్ నియోజకవర్గంలో రాష్ట్ర ముఖ్యమంత్రి రేవంత్ రెడ్డి, ఆయన సోదరుడు తిరుపతి రెడ్డిపై అనుచిత వ్యాఖ్యలు చేయడం సరికాదని, నోటికి వచ్చినట్లు మాట్లాడే రాజకీయాలకు స్వస్తి పలకాలని దౌల్తాబాద్ మండల కాంగ్రెస్ పార్టీ నాయకులు మాజీ జెడ్పీటీసీ కోట్ల మైపాల్‌కు ఘాటుగా హెచ్చరించారు. ఇటీవల ఆయన చేసిన ఆరోపణలు, వ్యాఖ్యలపై మండల కాంగ్రెస్ నాయకులు తీవ్ర ఆగ్రహం వ్యక్తం చేస్తూ మీడియా సమావేశంలో స్పందించారు.

ఈ సందర్భంగా వారు మాట్లాడుతూ, కొడంగల్ నియోజకవర్గంలో జరుగుతున్న అభివృద్ధి పనులపై ఆధారాలు లేకుండా ఆరోపణలు చేయడం బాధ్యతారాహిత్యమని పేర్కొన్నారు. రాష్ట్ర ముఖ్యమంత్రి రేవంత్ రెడ్డి నేతృత్వంలో కొడంగల్ నియోజకవర్గాన్ని రాష్ట్రానికే కాకుండా దేశానికే ఆదర్శంగా తీర్చిదిద్దేందుకు వేల కోట్ల రూపాయలతో అభివృద్ధి కార్యక్రమాలు అమలు చేస్తున్నారని తెలిపారు. రహదారులు, విద్య, వైద్యం, సాగునీరు, తాగునీటి సదుపాయాలు, గ్రామీణ మౌలిక వసతుల అభివృద్ధి కోసం ప్రభుత్వం ప్రత్యేక శ్రద్ధతో పనిచేస్తోందని వివరించారు.

అలాంటి సమయంలో రాజకీయ లబ్ధి కోసం కొందరు నాయకులు ప్రజలను తప్పుదోవ పట్టించే ప్రయత్నం చేస్తున్నారని విమర్శించారు. మాజీ జెడ్పీటీసీ కోట్ల మైపాల్ తన రాజకీయ ఉనికిని కాపాడుకోవడానికి, వ్యక్తిగత ప్రయోజనాల కోసం, అలాగే బీఆర్ఎస్ నాయకత్వం దృష్టిని ఆకర్షించేందుకు ఆధారరహిత ఆరోపణలు చేస్తున్నారని ఆరోపించారు. అభివృద్ధి పనుల్లో కాంగ్రెస్ నాయకులు, కాంట్రాక్టర్లు కుమ్మక్కై కమిషన్లు తీసుకుంటున్నారనే వ్యాఖ్యలకు ఎలాంటి ఆధారాలు ఉన్నా ప్రజల ముందుంచాలని సవాల్ విసిరారు.

“ఎక్కడ, ఎవరు, ఎంత కమిషన్ తీసుకున్నారో స్పష్టమైన ఆధారాలతో నిరూపించాలి. లేకపోతే ప్రజలను తప్పుదోవ పట్టించే ప్రయత్నం చేసినందుకు చట్టపరమైన చర్యలు తప్పవు” అని కాంగ్రెస్ నాయకులు హెచ్చరించారు. ప్రజాప్రతినిధిగా పనిచేసిన వ్యక్తి బాధ్యతాయుతంగా వ్యవహరించాల్సిందిపోయి వ్యక్తిగత విమర్శలకు దిగడం దురదృష్టకరమని పేర్కొన్నారు.

ఇంకా మాట్లాడుతూ, “నీవు పట్నం నివాసంలో పాలేరు పని చేస్తూ ఇక్కడి ప్రజలను మోసం చేసేలా మాట్లాడితే నమ్మే పరిస్థితి లేదని” మండిపడ్డారు. ప్రజల విశ్వాసాన్ని సంపాదించుకోవాలంటే అభివృద్ధి కార్యక్రమాలకు సహకరించాలని, ప్రజా సమస్యల పరిష్కారానికి కృషి చేయాలని సూచించారు. విమర్శల పేరుతో అసత్య ప్రచారం చేయడం వల్ల ప్రజలకు ఎలాంటి ప్రయోజనం ఉండదని స్పష్టం చేశారు.

రాష్ట్ర ముఖ్యమంత్రి రేవంత్ రెడ్డి నాయకత్వంలో దౌల్తాబాద్ మండలంతో పాటు మొత్తం కొడంగల్ నియోజకవర్గం అభివృద్ధి దిశగా వేగంగా ముందుకు సాగుతోందని పేర్కొన్నారు. గ్రామీణ ప్రాంతాల్లో మౌలిక వసతుల అభివృద్ధి, రైతులకు మద్దతు, యువతకు ఉపాధి అవకాశాలు, మహిళా సంక్షేమ పథకాల అమలులో ప్రభుత్వం ప్రత్యేక దృష్టి సారించిందన్నారు. ఈ అభివృద్ధిని చూసి ఓర్వలేక కొందరు రాజకీయ నాయకులు అసత్య ప్రచారానికి దిగుతున్నారని విమర్శించారు.

అభివృద్ధి కోసం ప్రతి ఒక్కరూ సహకరించాల్సిన అవసరం ఉందని, రాజకీయ విభేదాలను పక్కనబెట్టి ప్రజా ప్రయోజనాల కోసం పని చేయాలని కాంగ్రెస్ నాయకులు పిలుపునిచ్చారు. దౌల్తాబాద్ మండల అభివృద్ధికి ప్రజలు, ప్రజాప్రతినిధులు, అధికారులు అందరూ కలిసి పనిచేస్తున్న సమయంలో ఇలాంటి ఆరోపణలు అభివృద్ధికి ఆటంకంగా మారే ప్రమాదం ఉందన్నారు.

ఇకనైనా కోట్ల మైపాల్ తన వైఖరిని మార్చుకొని, ప్రజలను తప్పుదోవ పట్టించే రాజకీయాలకు దూరంగా ఉండి అభివృద్ధి కార్యక్రమాలకు సహకరించాలని కాంగ్రెస్ నాయకులు సూచించారు. ప్రజా సంక్షేమం, నియోజకవర్గ అభివృద్ధే తమ లక్ష్యమని, అసత్య ప్రచారాలను ప్రజలు నమ్మబోరని స్పష్టం చేశారు.