రైతు కాలనీ అభివృద్ధికి కృషి చేస్తా

• సీసీ రోడ్డు నిర్మాణానికి చర్యలు తీసుకుంటాం
• షాద్‌నగర్ ఎమ్మెల్యే వీర్లపల్లి శంకర్
• నవరాత్రి ఉత్సవాల్లో కోట మైసమ్మ అమ్మవారికి ప్రత్యేక పూజలు..
• ఎమ్మెల్యేకు ఘన స్వాగతం, సన్మానం

శ్రీ బల భీమ న్యూస్ / షాద్‌నగర్, అక్టోబర్ 17 :

పట్టణంలోని రైతు కాలనీ అభివృద్ధికి, ప్రజలకు అవసరమైన మౌలిక సదుపాయాల కల్పనకు ప్రత్యేక కృషి చేస్తానని షాద్‌నగర్ ఎమ్మెల్యే, రాష్ట్ర ప్రభుత్వ రంగ సంస్థల చైర్మన్ వీర్లపల్లి శంకర్ హామీ ఇచ్చారు. రైతు కాలనీలో సీసీ రోడ్డు నిర్మాణానికి త్వరలోనే చర్యలు తీసుకుంటామని తెలిపారు.

షాద్‌నగర్ పట్టణంలోని రైతు కాలనీలో దసరా నవరాత్రి ఉత్సవాలు భక్తిశ్రద్ధలతో కొనసాగుతున్నాయి. ఈ సందర్భంగా శనివారం కోట మైసమ్మ అమ్మవారిని మహాలక్ష్మి రూపంలో అలంకరించి ప్రత్యేక పూజలు, హోమ కార్యక్రమాలు నిర్వహించారు. ఈ కార్యక్రమానికి ముఖ్య అతిథిగా హాజరైన ఎమ్మెల్యే వీర్లపల్లి శంకర్ అమ్మవారిని దర్శించుకొని ప్రత్యేక పూజలు నిర్వహించారు. ఆలయ కమిటీ నిర్వాహకులు ఆయనకు పూర్ణకుంభంతో ఘన స్వాగతం పలికారు.

అమ్మవారి ఆశీస్సులు అందరిపై ఉండాలి

ఈ సందర్భంగా ఎమ్మెల్యే వీర్లపల్లి శంకర్ మాట్లాడుతూ, దసరా నవరాత్రి ఉత్సవాల్లో భక్తిశ్రద్ధలతో అమ్మవారిని పూజించే ప్రతి ఒక్కరిపై అమ్మవారి ఆశీస్సులు ఉండాలని ఆకాంక్షించారు. రైతు కాలనీలో వచ్చే ఏడాది నాటికి మరిన్ని అభివృద్ధి కార్యక్రమాలు చేపట్టేందుకు అమ్మవారి ఆశీస్సులు లభించాలని కోరుకున్నట్లు పేర్కొన్నారు.

కాలనీ సమస్యల పరిష్కారానికి హామీ

ఎమ్మెల్యే ఆలయానికి వచ్చిన సందర్భంగా రైతు కాలనీ వాసులు, మహిళలు ఆయనను కలిసి తమ ప్రాంతంలోని సమస్యలను వివరించారు. ముఖ్యంగా కాలనీలో సీసీ రోడ్డు నిర్మించాలని విజ్ఞప్తి చేశారు. దీనిపై స్పందించిన ఎమ్మెల్యే, కాలనీలో రోడ్డు నిర్మాణ పనులు చేపట్టేందుకు త్వరలోనే అవసరమైన చర్యలు తీసుకుంటామని హామీ ఇచ్చారు. ఈ సందర్భంగా కాలనీవాసులు, మహిళలు ఎమ్మెల్యేతో ఫొటోలు దిగారు.

పాల్గొన్న ప్రజాప్రతినిధులు, నాయకులు

ఈ కార్యక్రమంలో పురపాలక చైర్మన్ అగ్గనూరు బసవేశ్వర్, మార్కెట్ కమిటీ వైస్ చైర్మన్ మహమ్మద్ అలీ ఖాన్ బాబర్, చెంది తిరుపతిరెడ్డి, మార్కెట్ కమిటీ డైరెక్టర్ కరుణాకర్, కాంగ్రెస్ పార్టీ పట్టణ అధ్యక్షుడు శ్రీధర్, కౌన్సిలర్లు కొప్పునూరు ప్రవీణ్ కుమార్, మురళీమోహన్ (అప్పి), పెంటయ్య, దిలీప్ కుమార్, రాజు నాయక్, కాంగ్రెస్ నాయకులు పురుషోత్తం రెడ్డి, ఎండీ ఇబ్రహీం, చంద్రశేఖర్, లింగారెడ్డిగూడ అశోక్, జితేందర్ రెడ్డి, సాధిక్ తదితరులు పాల్గొన్నారు.

అలాగే రైతు కాలనీ సంక్షేమ సంఘం, కోట మైసమ్మ సేవా సమితి నాయకులు చెరుకు శివ, శుక్రవర్ధన్ రెడ్డి, మల్లేష్ గౌడ్, విజయకుమార్ గౌడ్, గోపాల్ రెడ్డి తదితరులు పాల్గొన్నారు. రైతు కాలనీ సంక్షేమ సంఘం ప్రతినిధులు ఎమ్మెల్యే వీర్లపల్లి శంకర్‌ను సన్మానించారు.