రేవంత్ రెడ్డి బ్లాక్‌మెయిలర్ల సంఘం అధ్యక్షుడు

• అసెంబ్లీలో కమల్ హాసన్ స్థాయిలో ఏకపాత్రాభినయం చేస్తున్నారు
• సిద్ధిపేటలో వంద ఎకరాల భూ బదలాయింపుపై చర్యలు తీసుకునే దమ్ముందా?
• ఈనెల 20న కొడంగల్‌లో సీఎం పాపాల చిట్టా బయటపెడతాం: కల్వకుంట్ల కవిత

శ్రీ బల భీమ న్యూస్ / కొడంగల్ సెప్టెంబర్ 12 : 

ముఖ్యమంత్రి రేవంత్ రెడ్డి అవినీతి సామ్రాట్ అని, బ్లాక్‌మెయిలర్ల సంఘం ఏర్పాటు చేస్తే దానికి ఆయనే అధ్యక్షుడిగా ఉంటారని తెలంగాణ రక్షణ సేన చీఫ్ కల్వకుంట్ల కవిత తీవ్రస్థాయిలో ఆరోపించారు. ముఖ్యమంత్రి తన కుటుంబ సభ్యులు, మిత్రమండలి, అవినీతిలో ఆరితేరిన మంత్రులతో కలిసి రాష్ట్రాన్ని దోచుకుంటున్నారని విమర్శించారు. అలాంటి వ్యక్తి అసెంబ్లీలో తనకు కమీషన్లు ఎందుకంటూ అమాయకుడిలా మాట్లాడటం ప్రజలను నవ్వుకునేలా చేస్తోందని అన్నారు.

శనివారం ఆమె విడుదల చేసిన వీడియో సందేశంలో కాంగ్రెస్ ప్రభుత్వం, ముఖ్యమంత్రి రేవంత్ రెడ్డి తీరుపై తీవ్ర విమర్శలు చేశారు. ప్రజా సమస్యలను చర్చించాల్సిన అసెంబ్లీని అధికార, ప్రతిపక్షాలు పరస్పరం ఆరోపణలు చేసుకోవడానికి, ఒకరినొకరు విమర్శించుకోవడానికి వేదికగా మార్చేశారని ఆవేదన వ్యక్తం చేశారు.

ఆర్టీఐని అడ్డుపెట్టుకుని బ్లాక్‌మెయిల్ చేశారంటూ ఆరోపణలు

రేవంత్ రెడ్డి అధికారంలోకి రాకముందే ఆర్టీఐ చట్టాన్ని ఉపయోగించుకుని రియల్ ఎస్టేట్ వ్యాపారులను బెదిరించిన చరిత్ర ఉందని కవిత ఆరోపించారు. అప్పట్లో బ్లాక్‌మెయిలింగ్‌కు పాల్పడిన వ్యక్తి ఇప్పుడు అధికారంలోకి వచ్చిన తర్వాత కుటుంబ సభ్యులు, మంత్రులు, మిత్రులతో కలిసి అవినీతి సామ్రాజ్యాన్ని నిర్మిస్తున్నారని విమర్శించారు.

తెలంగాణలో బ్లాక్‌మెయిలర్ల సంఘం పెడితే దానికి రేవంత్ రెడ్డే అధ్యక్షుడవుతారని ఎద్దేవా చేశారు. గతంలో తెలంగాణ ప్రభుత్వాన్ని అస్థిరపరిచేందుకు ఆంధ్రా వ్యక్తులతో కలిసి క్యాష్ డీల్‌లో అడ్డంగా దొరికింది ఎవరో ప్రజలకు తెలుసని అన్నారు. అధికారంలోకి రాకముందు నుంచే అక్రమాలకు పాల్పడిన చరిత్ర రేవంత్ రెడ్డిదేనని కవిత పేర్కొన్నారు.

కమల్ హాసన్‌లా ఏకపాత్రాభినయం

అసెంబ్లీలో తనకు కమీషన్లు ఎందుకు అవసరమని రేవంత్ రెడ్డి మాట్లాడుతున్న తీరు చూస్తుంటే ప్రజలు నవ్వుకుంటున్నారని కవిత అన్నారు. ‘స్వాతిముత్యం’ సినిమాలో కమల్ హాసన్ మాదిరిగా అమాయకుడిలా, సుద్దపూసలా నటిస్తే ప్రజలు నమ్మే పరిస్థితి లేదని విమర్శించారు.

రేవంత్ రెడ్డికి దోచుకునే మిత్రమండలి, భయంకరమైన కుటుంబ వ్యవస్థ, అవినీతిలో ఆరితేరిన మంత్రులు దొరికారని ఆరోపించారు. 22ఏ భూములను పొంగులేటి శ్రీనివాస్ రెడ్డికి, ఇరిగేషన్ ప్రాజెక్టులను ఉత్తమ్ కుమార్ రెడ్డికి, ఇసుక వ్యవహారాలను సీతక్కకు అప్పగించి వారి ద్వారా కమీషన్లు పొందుతున్నారని కవిత తీవ్ర ఆరోపణలు చేశారు. మూసీ ప్రాజెక్టు నుంచి ఇసుక వరకు ప్రతి వ్యవహారంలోనూ అవినీతి చోటుచేసుకుంటోందని మండిపడ్డారు.

సిద్ధిపేటలో వంద ఎకరాల భూ బదలాయింపుపై సవాల్

బీఆర్ఎస్ అధికారంలో ఉన్న సమయంలో సిద్ధిపేటలో నిషేధిత జాబితాలో ఉన్న సుమారు వంద ఎకరాల భూమిని హరీశ్ రావు తన తండ్రి, కుటుంబ సభ్యుల పేర్లకు బదలాయించారని కవిత ఆరోపించారు. దీనికి సంబంధించిన అన్ని ఆధారాలను తాను ముఖ్యమంత్రికి పంపిస్తానని తెలిపారు.

ముఖ్యమంత్రి రేవంత్ రెడ్డి, మంత్రి పొంగులేటి శ్రీనివాస్ రెడ్డికి నిజంగా చిత్తశుద్ధి ఉంటే ఈ భూ బదలాయింపుపై విచారణ జరిపించి చర్యలు తీసుకోవాలని సవాల్ విసిరారు. ‘గుంపు మేస్త్రీ–గుంటనక్క’ మధ్య కుమ్మక్కు లేకపోతే తాను ఇచ్చే ఆధారాలపై వెంటనే స్పందించాలని డిమాండ్ చేశారు.

బీఆర్ఎస్ నాయకులపై కూడా విమర్శలు

బీఆర్ఎస్ నాయకులు అధికారంలో ఉన్నప్పుడే అసెంబ్లీకి వస్తారా? అని కవిత ప్రశ్నించారు. పదేళ్లపాటు అధికారంలో ఉన్న సమయంలో కాంగ్రెస్ కంటే ఎక్కువగా దోచుకున్నారని ఆరోపించారు. ప్రజల కోసం పోరాడాలన్న స్పృహ బీఆర్ఎస్ నాయకుల్లో లేకుండా పోయిందని విమర్శించారు.

ముఖ్యమంత్రి అసెంబ్లీని తన గొప్పలు చెప్పుకునేందుకు, ప్రభుత్వ ప్రకటనల వేదికగా ఉపయోగించుకుంటుంటే బీఆర్ఎస్ నాయకులు ఏం చేస్తున్నారని ప్రశ్నించారు. సీఎం వ్యాఖ్యలకు సమర్థవంతంగా కౌంటర్ ఇచ్చే వారు సభలో లేకపోవడం బాధాకరమన్నారు.

బీఆర్ఎస్ సభ్యులను అసెంబ్లీలో సస్పెండ్ చేస్తే కౌన్సిల్‌లో ఎందుకు మాట్లాడటం లేదని ప్రశ్నించారు. కౌన్సిల్ నుంచి వాకౌట్ చేయాల్సిన అవసరం ఏమొచ్చిందని నిలదీశారు. ప్రజలు బీఆర్ఎస్‌కు ఎందుకు ఓటు వేశారో ఆ పార్టీ నాయకులు ఆత్మపరిశీలన చేసుకోవాలని సూచించారు.

అసెంబ్లీ ప్రజా సమస్యల పరిష్కార వేదికగా ఉండాలి

అసెంబ్లీలో ఇటీవల చోటుచేసుకున్న పరిణామాలు తీవ్ర ఆవేదన కలిగించాయని కవిత అన్నారు. ప్రజా సమస్యలను చర్చించాల్సిన వేదికను అధికార, ప్రతిపక్షాలు దుర్వినియోగం చేస్తున్నాయని మండిపడ్డారు. ప్రజల సమస్యలను పక్కనబెట్టి ఒకరినొకరు తిట్టుకోవడానికే సభను పరిమితం చేశారని విమర్శించారు.

అధికార, ప్రతిపక్షాలు కనీసం పది నిమిషాలు కలిసి పనిచేసినా లక్షలాది మంది ప్రజల సమస్యలకు పరిష్కారం లభిస్తుందని అన్నారు. అయితే ప్రజా సమస్యలపై దృష్టి పెట్టకుండా ప్రజాధనాన్ని, అసెంబ్లీ సమయాన్ని వృథా చేస్తున్నారని ఆవేదన వ్యక్తం చేశారు.

బీజేపీ సభ్యులు కూడా ప్రజా సమస్యలను పక్కనబెట్టి కొందరు కాంగ్రెస్‌కు, మరికొందరు బీఆర్ఎస్‌కు మద్దతుగా వ్యవహరిస్తున్నారని ఆరోపించారు. కాంగ్రెస్, బీఆర్ఎస్, బీజేపీల వైఖరిని ప్రజలు గమనిస్తున్నారని కవిత పేర్కొన్నారు.

కొడంగల్‌లో సీఎం అవినీతి చిట్టా బయటపెడతాం

ముఖ్యమంత్రి రేవంత్ రెడ్డి అవినీతి పాపాల చిట్టాను కొడంగల్ వేదికగా ప్రజల ముందు ఉంచుతామని కల్వకుంట్ల కవిత ప్రకటించారు. ఈ నెల 20న కొడంగల్‌లో ‘పాంచజన్య సంకల్ప సభ’ నిర్వహిస్తున్నామని తెలిపారు.

అదే రోజు కొడంగల్ వేదికగా ముఖ్యమంత్రి అవినీతికి సంబంధించిన అంశాలను ప్రజల ముందుకు తీసుకువస్తామని, ప్రభుత్వ తీరును ఎండగడతామని కవిత స్పష్టం చేశారు. ప్రజా సమస్యలు, భూ వ్యవహారాలు, కమీషన్ల ఆరోపణలు, ప్రభుత్వ అవినీతి అంశాలపై ప్రజలకు పూర్తి వివరాలు వెల్లడిస్తామని తెలిపారు.