కొడంగల్ వ్యవసాయ శాఖలో ఖాళీ కుర్చీలే దర్శనం…

•  అధికారుల కొరతతో రైతుల అవస్థలు
• ముఖ్యమంత్రి సొంత నియోజకవర్గంలో వ్యవసాయ శాఖ పనితీరుపై ప్రశ్నలు
• ఇన్‌చార్జ్ అధికారులతో నెట్టుకొస్తున్న పాలన –
• రైతులకు అందని సేవలు – ఎరువుల దుకాణాల పర్యవేక్షణపై విమర్శలు

శ్రీ బల భీమ న్యూస్ / కొడంగల్, ప్రత్యేక ప్రతినిధి :

రాష్ట్ర ముఖ్యమంత్రి రేవంత్ రెడ్డి ప్రాతినిధ్యం వహిస్తున్న కొడంగల్ నియోజకవర్గంలో వ్యవసాయ శాఖ పనితీరుపై రైతుల నుంచి తీవ్ర అసంతృప్తి వ్యక్తమవుతోంది. వ్యవసాయ శాఖ కార్యాలయాల్లో అధికారులు అందుబాటులో లేకపోవడం, కీలక పోస్టులు నెలల తరబడి ఖాళీగా ఉండటం, ఇన్‌చార్జ్ అధికారులతోనే పరిపాలన కొనసాగుతుండటంతో రైతులు తీవ్ర ఇబ్బందులు ఎదుర్కొంటున్నట్లు ఆరోపిస్తున్నారు. రైతు సంక్షేమానికి సంబంధించిన అనేక పథకాలు, సేవలు ఆలస్యమవుతున్నాయని, కార్యాలయాలకు పలుమార్లు వెళ్లినా అధికారులు అందుబాటులో లేక ఖాళీ కుర్చీలే కనిపిస్తున్నాయని రైతులు వాపోతున్నారు.

వ్యవసాయ సమస్యల పరిష్కారం కోసం ప్రతిరోజూ కార్యాలయాలకు వచ్చే రైతులు అధికారుల కోసం గంటల తరబడి వేచి చూడాల్సిన పరిస్థితి నెలకొంది. కొందరు రైతులు ఉదయం నుంచే కార్యాలయానికి చేరుకున్నప్పటికీ సాయంత్రం వరకు సంబంధిత అధికారులు రాకపోవడంతో నిరాశగా వెనుదిరుగుతున్నామని చెబుతున్నారు. సమస్యలు చెప్పుకునేందుకు అధికారి లేకపోవడంతో రైతులు తీవ్ర ఆవేదన వ్యక్తం చేస్తున్నారు.

అధికారుల కొరతతో కుంటుపడుతున్న వ్యవసాయ సేవలు

కొడంగల్ నియోజకవర్గ పరిధిలో కొడంగల్, బొమ్రాస్‌పేట, దౌల్తాబాద్, దుద్యాల మండలాలు ఉన్నాయి. ఈ నాలుగు మండలాల్లో మొత్తం 23 వ్యవసాయ క్లస్టర్లు ఉండగా, వాటిలో ఎనిమిది ఏఈఓ (వ్యవసాయ విస్తరణ అధికారి) పోస్టులు ప్రస్తుతం ఖాళీగా ఉన్నట్లు సమాచారం.

మండలాల వారీగా పరిస్థితి

కొడంగల్ మండలం:

• మొత్తం 7 క్లస్టర్లు.
• అందులో 2 ఏఈఓ పోస్టులు ఖాళీ.

దౌల్తాబాద్ మండలం:

• మొత్తం 7 క్లస్టర్లు.
• 2 పోస్టులు ఖాళీ.
• మిగిలిన క్లస్టర్లలో అవుట్‌సోర్సింగ్ ఏఈఓలే విధులు నిర్వహిస్తున్నారు.

బొమ్రాస్‌పేట మండలం:

• మొత్తం 5 క్లస్టర్లు.
• 3 క్లస్టర్లలో అవుట్‌సోర్సింగ్ సిబ్బంది.
• 2 పోస్టులు ఖాళీ.

దుద్యాల మండలం:

• మొత్తం 4 క్లస్టర్లు.
• 2 రెగ్యులర్ పోస్టులు లేకపోవడంతో అవుట్‌సోర్సింగ్ సిబ్బందే బాధ్యతలు నిర్వహిస్తున్నారు.

ఇటీవల అవినీతి ఆరోపణలు, శాఖాపరమైన చర్యల నేపథ్యంలో ఐదుగురు అవుట్‌సోర్సింగ్ ఏఈఓలను విధుల నుంచి తొలగించగా, మరో ముగ్గురు ఏఈఓలు సస్పెండ్ అయినట్లు సమాచారం. దీంతో మొత్తం ఎనిమిది మంది సిబ్బంది ఒకేసారి విధులకు దూరమవడంతో వ్యవసాయ శాఖలో సిబ్బంది కొరత మరింత తీవ్రరూపం దాల్చింది.

ఇన్‌చార్జ్ పాలనతో రైతుల కష్టాలు

కొడంగల్ వ్యవసాయ శాఖలో రెగ్యులర్ అసిస్టెంట్ డైరెక్టర్ ఆఫ్ అగ్రికల్చర్ (ఏడీఏ) లేకపోవడంతో ప్రస్తుతం వికారాబాద్ ఏడీఏకు అదనపు బాధ్యతలు అప్పగించినట్లు తెలుస్తోంది. అయితే ఇన్‌చార్జ్ అధికారి వారానికి ఒకటి లేదా రెండు రోజులు మాత్రమే కార్యాలయానికి వస్తున్నారని, దీంతో రోజువారీ పరిపాలన పూర్తిగా దెబ్బతింటోందని రైతులు ఆరోపిస్తున్నారు.

ఇదే సమయంలో కొడంగల్ వ్యవసాయ అధికారి (ఏవో) కూడా గత నెల రోజులుగా విధులకు దూరంగా ఉండడం, అనంతరం దీర్ఘకాలిక సెలవు దరఖాస్తు సమర్పించడం చర్చనీయాంశంగా మారింది. రైతులు కార్యాలయానికి వచ్చిన సమయంలో అధికారి లేకపోవడంతో మీడియా ప్రతినిధులు సమాచారం ఇవ్వగా, అనంతరం సెలవు పత్రం సమర్పించినట్లు తెలిసింది.

దుద్యాల మండలానికి ఇప్పటికీ రెగ్యులర్ ఏవో నియామకం జరగకపోవడంతో అక్కడ కూడా ఇన్‌చార్జ్ విధానమే కొనసాగుతోంది. ఈ పరిస్థితుల వల్ల వ్యవసాయ శాఖ పనితీరు ప్రభావితమవుతోందని రైతులు చెబుతున్నారు.

ఎరువుల దుకాణాలపై పర్యవేక్షణ లేకపోవడంపై విమర్శలు

వ్యవసాయ శాఖ అధికారులు అందుబాటులో లేకపోవడంతో కొందరు ఎరువుల వ్యాపారులు ఇష్టారాజ్యంగా వ్యవహరిస్తున్నారనే ఆరోపణలు వినిపిస్తున్నాయి. యూరియా, డీఏపీ వంటి ఎరువులను అధిక ధరలకు విక్రయిస్తున్నారని రైతులు ఆరోపిస్తున్నారు.

ఇటీవల జిల్లాలో నకిలీ డీఏపీ, నకిలీ యూరియా, నకిలీ పురుగుమందుల విక్రయాలపై పలు వార్తలు వెలువడినప్పటికీ, కొడంగల్ నియోజకవర్గంలోని ఎరువుల దుకాణాలపై పెద్ద ఎత్తున తనిఖీలు జరగలేదని రైతులు ప్రశ్నిస్తున్నారు.

కొంతమంది రైతులు, స్థానికులు అధికారులు ఎరువుల దుకాణాలపై పర్యవేక్షణ పెంచాలని, అక్రమాలకు పాల్పడుతున్న వారిపై కఠిన చర్యలు తీసుకోవాలని డిమాండ్ చేస్తున్నారు. అయితే “మామూలు”లు తీసుకుంటున్నారనే ఆరోపణలు కూడా వినిపిస్తున్నాయి. ఈ ఆరోపణలపై అధికారుల స్పందన రావాల్సి ఉంది.

అవుట్‌సోర్సింగ్ ఏఈఓల తొలగింపుపై అసంతృప్తి

జిల్లాలో మొత్తం 36 మంది అవుట్‌సోర్సింగ్ ఏఈఓలు విధులు నిర్వహిస్తుండగా, వారిలో 12 మందిని ఇటీవల విధుల నుంచి తొలగించినట్లు సమాచారం. గత రెండు, మూడు సంవత్సరాలుగా సేవలందిస్తున్న తమను ఎలాంటి ముందస్తు నోటీసు లేకుండా, వివరణ అడగకుండా, కేవలం ఫోన్ ద్వారా విధులకు రావద్దని చెప్పడం అన్యాయమని తొలగింపునకు గురైన సిబ్బంది ఆవేదన వ్యక్తం చేస్తున్నారు.

నోటీసులు ఇవ్వకుండా ఉద్యోగాల నుంచి తొలగించడం న్యాయబద్ధమేనా అనే ప్రశ్నలు కూడా వ్యక్తమవుతున్నాయి.

రైతు సేవల అమలులో తీవ్ర జాప్యం

వ్యవసాయ శాఖలో సిబ్బంది కొరత కారణంగా రైతులకు అందాల్సిన అనేక కీలక సేవలు ప్రభావితమవుతున్నాయని సమాచారం.

వాటిలో ముఖ్యంగా:

• రైతు భరోసా దరఖాస్తుల పరిశీలన
• రైతు బీమా సంబంధిత సేవలు
• పీఎం కిసాన్ పథకం నమోదు
• క్రాప్ బుకింగ్
• పంటల నమోదు
• ఎల్‌ఈఎన్‌ఓ అవగాహన కార్యక్రమాలు
• క్షేత్రస్థాయి పర్యవేక్షణ
• ఎరువుల నాణ్యత తనిఖీలు

వంటి కార్యక్రమాలు ఆలస్యమవుతున్నాయని రైతులు చెబుతున్నారు.

ముఖ్యమంత్రి ఆదేశాలు అమలవుతున్నాయా?

రాష్ట్ర ముఖ్యమంత్రి రేవంత్ రెడ్డి రైతులకు ఎలాంటి ఇబ్బందులు కలగకుండా వ్యవసాయ శాఖ సమర్థంగా పనిచేయాలని పలుమార్లు అధికారులకు సూచించినప్పటికీ, ఆయన సొంత నియోజకవర్గంలోనే ఈ పరిస్థితులు నెలకొనడం చర్చనీయాంశంగా మారింది.

రాష్ట్ర, జిల్లా స్థాయి ఉన్నతాధికారులు తక్షణమే స్పందించి ఖాళీ పోస్టులను భర్తీ చేయాలని, రెగ్యులర్ ఏడీఏ, ఏవో, ఏఈఓలను నియమించాలని, రైతులకు అందాల్సిన సేవలను సకాలంలో అందించాలని రైతు సంఘాలు, స్థానిక ప్రజాప్రతినిధులు డిమాండ్ చేస్తున్నారు.

జిల్లా వ్యవసాయ శాఖాధికారి కవిత స్పందన

ఈ అంశంపై జిల్లా వ్యవసాయ శాఖాధికారి కవిత మాట్లాడుతూ, కొడంగల్ నియోజకవర్గంలో సిబ్బంది కొరత ఉన్న విషయం తమ దృష్టిలో ఉందని తెలిపారు. రెగ్యులర్ ఏడీఏ, ఏవో, ఏఈఓ పోస్టుల భర్తీ కోసం ఇప్పటికే రాష్ట్రస్థాయి ఉన్నతాధికారులకు సమగ్ర నివేదిక పంపించినట్లు చెప్పారు.

త్వరలో ఖాళీ పోస్టులను భర్తీ చేస్తామని ఉన్నతాధికారులు హామీ ఇచ్చినట్లు వెల్లడించారు. అవుట్‌సోర్సింగ్ ఏఈఓల తొలగింపు విషయంలో రాష్ట్ర ప్రభుత్వం జారీ చేసిన మార్గదర్శకాలు, అవసరానికి మించిన పోస్టుల కారణంగానే 12 మందిని విధుల నుంచి తొలగించాల్సి వచ్చిందని ఆమె వివరించారు.

రైతుల ప్రధాన డిమాండ్లు

• ఖాళీగా ఉన్న ఏడీఏ, ఏవో, ఏఈఓ పోస్టులను వెంటనే భర్తీ చేయాలి.
• ప్రతి మండలానికి రెగ్యులర్ వ్యవసాయ అధికారులను నియమించాలి.
• ఎరువుల దుకాణాలపై ప్రత్యేక తనిఖీలు నిర్వహించాలి.
• రైతు భరోసా, రైతు బీమా, పీఎం కిసాన్ తదితర సేవలను వేగవంతం చేయాలి.
• గ్రామస్థాయిలో వ్యవసాయ విస్తరణ సేవలను బలోపేతం చేయాలి.
• వ్యవసాయ శాఖలో పారదర్శక పరిపాలనకు చర్యలు చేపట్టాలి.

రాష్ట్ర ప్రభుత్వ రైతు సంక్షేమ కార్యక్రమాలు గ్రామీణ స్థాయికి సమర్థవంతంగా చేరాలంటే, కొడంగల్ వంటి కీలక నియోజకవర్గాల్లో వ్యవసాయ శాఖలో ఖాళీ పోస్టులను వెంటనే భర్తీ చేసి, పూర్తి స్థాయి అధికారులను నియమించడం అత్యవసరమని రైతులు, వ్యవసాయ నిపుణులు అభిప్రాయపడుతున్నారు.