ఎస్‌ఐఆర్‌ ప్రక్రియ పారదర్శకంగా జరగాలి

• అర్హుల పేర్లు ఓటరు జాబితా నుంచి తొలగించకుండా చూడాలి
• కొడంగల్ మున్సిపల్ చైర్మన్ నందారం ప్రశాంత్

శ్రీ బల భీమ న్యూస్ /కొడంగల్, జూలై 12 (ప్రతినిధి):

ఓటరు జాబితా రూపకల్పనలో పారదర్శకతకు అత్యంత ప్రాధాన్యం ఇవ్వాలని, అర్హులైన ఒక్క ఓటరు పేరు కూడా జాబితా నుంచి తొలగించబడకుండా అధికారులు, బీఎల్‌ఓలు, రాజకీయ పార్టీల బీఎల్‌ఏలు అప్రమత్తంగా వ్యవహరించాలని కొడంగల్ మున్సిపల్ చైర్మన్ నందారం ప్రశాంత్ సూచించారు. ఎన్నికల సంఘం ప్రతిష్ఠాత్మకంగా చేపట్టిన స్పెషల్ ఇంటెన్సివ్ రివిజన్ (ఎస్‌ఐఆర్) కార్యక్రమం ప్రజలకు ఎలాంటి ఇబ్బందులు కలగకుండా పారదర్శకంగా, నిష్పక్షపాతంగా నిర్వహించాలని ఆయన పేర్కొన్నారు.

ఆదివారం కొడంగల్ మండలంలోని పర్సాపూర్ , నాగారం, టేకులకోడ్, చిట్లపల్లి తదితర గ్రామాల్లో కొనసాగుతున్న ఎస్‌ఐఆర్‌ ప్రక్రియను ఆయన ప్రత్యక్షంగా పరిశీలించారు. ఈ సందర్భంగా బీఎల్‌ఓలు, బీఎల్‌ఏలతో సమావేశమై ప్రక్రియ పురోగతిపై సమగ్రంగా ఆరా తీశారు. గ్రామాల్లో ఓటర్లకు ఎన్యూమరేషన్ ఫారాలు పూర్తిస్థాయిలో పంపిణీ అయ్యాయా, వాటిని సక్రమంగా నింపించారా, ఇంటింటికీ వెళ్లి వివరాలు సేకరిస్తున్నారా అనే అంశాలపై అధికారులను ప్రశ్నించారు.

ఈ సందర్భంగా నందారం ప్రశాంత్ మాట్లాడుతూ, ప్రజాస్వామ్య వ్యవస్థకు ఓటరు జాబితానే పునాది అని పేర్కొన్నారు. అలాంటి కీలకమైన జాబితా తయారీలో నిర్లక్ష్యం చోటుచేసుకోకుండా ప్రతి ఒక్కరూ బాధ్యతాయుతంగా వ్యవహరించాలని సూచించారు. ఓటర్లు సమర్పిస్తున్న ఎన్యూమరేషన్ ఫారాల్లోని వివరాలను క్షుణ్ణంగా పరిశీలించి, ఆధారాలతో సరిపోల్చి మాత్రమే నమోదు చేయాలని బీఎల్‌ఓలకు సూచించారు.

అర్హత ఉన్న ప్రతి పౌరుడి పేరు ఓటరు జాబితాలో తప్పనిసరిగా ఉండేలా చర్యలు తీసుకోవాలని, అలాగే మరణించిన వారు, ఇతర ప్రాంతాలకు శాశ్వతంగా వెళ్లిపోయిన వారు, అనర్హుల పేర్లను నిబంధనల ప్రకారం తొలగించాలని తెలిపారు. అయితే ఈ ప్రక్రియలో అర్హులైన ఓటర్ల పేర్లు పొరపాటున తొలగిపోకుండా ప్రత్యేక శ్రద్ధ తీసుకోవాలని స్పష్టం చేశారు.

ప్రతి గ్రామంలో బీఎల్‌ఓలు ప్రజలకు అందుబాటులో ఉండి, ఓటరు నమోదు, మార్పులు, చేర్పులు, తొలగింపులకు సంబంధించిన సందేహాలను నివృత్తి చేయాలని కోరారు. ఓటర్లకు ఎలాంటి ఇబ్బందులు కలగకుండా ఎన్నికల సంఘం మార్గదర్శకాలను కచ్చితంగా అమలు చేయాలని సూచించారు.

అనంతరం ఆయన ఆన్‌లైన్‌ పోర్టల్‌ ద్వారా ఎస్‌ఐఆర్‌ ప్రక్రియ పురోగతిని పరిశీలించారు. ఇప్పటివరకు ఎంత శాతం ప్రక్రియ పూర్తయింది, ఎన్ని ఎన్యూమరేషన్ ఫారాలు పంపిణీ చేశారు, ఎన్ని తిరిగి స్వీకరించారు, పెండింగ్‌లో ఉన్న దరఖాస్తుల సంఖ్య ఎంత, ఇంటింటి సర్వే పనులు ఏ స్థాయిలో కొనసాగుతున్నాయనే వివరాలను అధికారులను అడిగి తెలుసుకున్నారు.

నిర్దేశిత గడువులోగా ఎస్‌ఐఆర్‌ ప్రక్రియను పూర్తిచేసి ఖచ్చితమైన, పారదర్శకమైన, తప్పులులేని ఓటరు జాబితాను సిద్ధం చేయాలని అధికారులకు సూచించారు. ప్రతి దరఖాస్తును జాగ్రత్తగా పరిశీలించి మాత్రమే తుది నిర్ణయం తీసుకోవాలని పేర్కొన్నారు.

ఈ సందర్భంగా బీఎల్‌ఏలకు అవసరమైన ఎస్‌ఐఆర్‌ ప్రక్రియ కిట్లను అందజేశారు. ప్రజాస్వామ్య పరిరక్షణలో రాజకీయ పార్టీలు, అధికారులు, ప్రజలు సమన్వయంతో పనిచేస్తేనే విశ్వసనీయమైన ఓటరు జాబితా రూపొందుతుందని ఆయన అభిప్రాయపడ్డారు.

ఈ కార్యక్రమంలో కొడంగల్ నియోజకవర్గ ఎస్‌ఐఆర్‌ కన్వీనర్ మల్లేష్ యాదవ్, పార్టీ నాయకులు, బీఎల్‌ఓలు, బీఎల్‌ఏలు, స్థానిక ప్రజాప్రతినిధులు, కార్యకర్తలు తదితరులు పాల్గొన్నారు.