రుద్రారం క్లస్టర్‌లో రెడ్‌గ్రామ్ విత్తనాల పంపిణీ

శ్రీ బల భీమ న్యూస్ / కొడంగల్, జూన్ 12:

రైతులకు అధిక దిగుబడులు అందించాలనే లక్ష్యంతో కోడంగల్ మండలంలోని రుద్రారం క్లస్టర్ పరిధిలో రెడ్‌గ్రామ్ (కందులు) విత్తనాల పంపిణీ కార్యక్రమం నిర్వహించినట్లు వ్యవసాయ విస్తరణ అధికారి (AEO) శ్రీపతి రెడ్డి తెలిపారు. ఈ కార్యక్రమంలో రైతులకు అధిక దిగుబడులు ఇచ్చే TDRG-59 రకానికి చెందిన విత్తనాలను అందజేశారు.

ఈ సందర్భంగా ఆయన మాట్లాడుతూ, ప్రతి రైతుకు 4 కిలోల బరువున్న ఒక విత్తన ప్యాకెట్‌ను అందిస్తున్నామని, ఒక ఎకరానికి ఒక ప్యాకెట్ సరిపోతుందని వివరించారు. రైతులు విత్తనాలను నేరుగా విత్తకుండా ముందుగా విత్తన శుద్ధి చేయడం ద్వారా పంటను వ్యాధుల నుంచి రక్షించుకోవచ్చని సూచించారు.

విత్తన శుద్ధిలో భాగంగా థైరమ్ లేదా కార్బెండాజిమ్ వంటి ఫంగిసైడ్లను ఉపయోగించడం వల్ల విత్తనాల ద్వారా వ్యాపించే శిలీంధ్ర వ్యాధులు తగ్గుతాయని తెలిపారు. అదేవిధంగా రైజోబియం కల్చర్‌తో విత్తనాలను శుద్ధి చేయడం ద్వారా మొక్కల పెరుగుదల మెరుగుపడి, నేలలో నత్రజని స్థిరీకరణ జరిగి అధిక దిగుబడులు సాధించే అవకాశం ఉంటుందని చెప్పారు.

రైతులు శాస్త్రీయ పద్ధతులను పాటిస్తూ విత్తన శుద్ధి చేసి పంటను సాగు చేస్తే మంచి దిగుబడులతో పాటు అధిక ఆదాయం పొందగలరని శ్రీపతి రెడ్డి పేర్కొన్నారు. ప్రభుత్వం అందిస్తున్న నాణ్యమైన విత్తనాలను సద్వినియోగం చేసుకుని వ్యవసాయంలో మెరుగైన ఫలితాలు సాధించాలని రైతులకు పిలుపునిచ్చారు.