మంత్రాలయం వద్ద తుంగభద్రలో విషాదం

• ఈతకు వెళ్లిన ఐదుగురు గల్లంతు
•  ఒకరి మృతదేహం లభ్యం
• మిగిలిన వారి కోసం కొనసాగుతున్న గాలింపు చర్యలు

శ్రీ బల భీమ న్యూస్ /కర్నూలు జిల్లా, మంత్రాలయం:
కర్నూలు జిల్లా మంత్రాలయం సమీపంలో తుంగభద్ర నదిలో ఆదివారం విషాదకర ఘటన చోటుచేసుకుంది. సరదాగా ఈతకు వెళ్లిన ఐదుగురు వ్యక్తులు నదిలో గల్లంతుకావడంతో వారి కుటుంబాల్లో తీవ్ర ఆందోళన నెలకొంది. ఈ ఘటన స్థానికంగా కలకలం రేపగా, గల్లంతైన వారిని గుర్తించేందుకు పోలీసులు, రెవెన్యూ సిబ్బంది, మత్స్యకారులు సంయుక్తంగా గాలింపు చర్యలు చేపట్టారు.

సమాచారం ప్రకారం, హైదరాబాద్‌కు చెందిన యువన్ చంద్ర (5), సతీష్ (35), మంత్రాలయానికి చెందిన రాఘవేంద్ర (25), ధను (23), ఉరవకొండకు చెందిన సంధ్య (22) తుంగభద్ర నదిలో గల్లంతైన వారిగా గుర్తించారు. వీరంతా బంధువులుగా తెలిసింది.

మంత్రాలయంలోని ఓ ఇంట్లో నిర్వహించిన శ్రీ సత్యనారాయణ స్వామి వ్రత మహోత్సవానికి బంధువులు, కుటుంబ సభ్యులు హాజరయ్యారు. పూజా కార్యక్రమాలు ముగిసిన అనంతరం అందరూ కలిసి సమీపంలోని తుంగభద్ర నది తీరానికి వెళ్లారు. అక్కడ కొందరు నదిలో ఈత కొట్టేందుకు దిగారు. అయితే నదిలో నీటి లోతు ఎక్కువగా ఉండటం, ప్రవాహ తీవ్రతను అంచనా వేయకపోవడం వల్ల ప్రమాదం సంభవించినట్లు అధికారులు భావిస్తున్నారు.

ఈ ఘటనలో ఆదోనికి చెందిన అపర్ణ అనే యువతి అప్రమత్తంగా వ్యవహరించి సురక్షితంగా ఒడ్డుకు చేరుకున్నట్లు అధికారులు తెలిపారు. ఆమె తెలిపిన వివరాల ఆధారంగా ప్రమాద సమాచారం వెంటనే పోలీసులకు చేరింది. సమాచారం అందుకున్న మంత్రాలయం పోలీసులు సంఘటన స్థలానికి చేరుకుని సహాయక చర్యలు ప్రారంభించారు.

స్థానిక మత్స్యకారుల సహకారంతో నదిలో గాలింపు చేపట్టగా, ఇప్పటివరకు ఒక మృతదేహం లభ్యమైనట్లు అధికారులు వెల్లడించారు. అయితే ఆ మృతదేహం ఎవరిదనే విషయాన్ని నిర్ధారించేందుకు ప్రయత్నాలు కొనసాగుతున్నాయి. గల్లంతైన మిగతా వారి కోసం రాత్రింబవళ్లు గాలింపు చర్యలు కొనసాగుతున్నాయి.

ఈ విషాద ఘటనతో మంత్రాలయం ప్రాంతంలో విషాద ఛాయలు అలుముకున్నాయి. గల్లంతైన వారి కుటుంబ సభ్యులు నది తీరానికి చేరుకుని కన్నీరుమున్నీరుగా విలపిస్తున్నారు. ప్రమాదం జరిగిన ప్రాంతంలో భద్రతా చర్యలు మరింత బలోపేతం చేయాలని స్థానికులు కోరుతున్నారు.

ప్రతి సంవత్సరం మంత్రాలయానికి లక్షలాది మంది భక్తులు వస్తుండటంతో నదిలో స్నానాలు, ఈతలు చేసే సమయంలో తగిన జాగ్రత్తలు తీసుకోవాలని అధికారులు సూచించారు. నీటి లోతు తెలియని ప్రాంతాల్లోకి వెళ్లకుండా ఉండాలని, హెచ్చరిక బోర్డులను తప్పనిసరిగా పాటించాలని విజ్ఞప్తి చేశారు.

ఈ ఘటనకు సంబంధించి పూర్తి వివరాలు తెలియాల్సి ఉండగా, గల్లంతైన వారిని గుర్తించే వరకు సహాయక చర్యలు కొనసాగుతాయని పోలీసులు తెలిపారు.