దేవాలయ అభివృద్ధికి తన వంతు కృషి చేస్తా

• తాండూరు ఎమ్మెల్యే బియ్యని మనోహర్ రెడ్డి
• సంగమేశ్వర దేవస్థానానికి నిర్మించిన సీసీ రోడ్డును ప్రారంభించిన ఎమ్మెల్యే

శ్రీ బల భీమ న్యూస్ / యాలాల్ :

తాండూరు నియోజకవర్గ పరిధిలోని యాలాల మండలంలోని కోకట్ గ్రామపంచాయతీ ఆధ్వర్యంలో ఉన్న ప్రసిద్ధ సంగమేశ్వర దేవస్థాన అభివృద్ధికి తన వంతు సహకారం అందిస్తానని తాండూరు ఎమ్మెల్యే బియ్యని మనోహర్ రెడ్డి పేర్కొన్నారు. గ్రామ ప్రజలకు, భక్తులకు మెరుగైన సౌకర్యాలు కల్పించేందుకు ప్రభుత్వం ప్రత్యేక దృష్టి సారిస్తోందని ఆయన తెలిపారు.

సంగమేశ్వర దేవస్థానానికి వెళ్లే భక్తులు గతంలో రహదారి సౌకర్యం లేక తీవ్ర ఇబ్బందులు ఎదుర్కొనేవారని, ముఖ్యంగా వర్షాకాలంలో రాకపోకలు చాలా కష్టంగా మారేవని స్థానిక ప్రజలు తెలిపారు. ఈ సమస్యను దృష్టిలో ఉంచుకుని సుమారు రూ.2.38 కోట్ల వ్యయంతో నిర్మించిన సీసీ రోడ్డును ఎమ్మెల్యే బియ్యని మనోహర్ రెడ్డి స్థానిక ప్రజాప్రతినిధులు, కాంగ్రెస్ పార్టీ నాయకులతో కలిసి ప్రారంభించారు.

ఈ సందర్భంగా ఎమ్మెల్యే మాట్లాడుతూ దేవాలయాలు ఆధ్యాత్మిక కేంద్రాలే కాకుండా గ్రామాల అభివృద్ధికి ప్రతీకలుగా నిలుస్తాయని అన్నారు. సంగమేశ్వర దేవస్థానానికి ప్రతి సంవత్సరం పెద్ద సంఖ్యలో భక్తులు వస్తుంటారని, వారికి మెరుగైన రవాణా సౌకర్యాలు, తాగునీరు, విద్యుత్, విశ్రాంతి కేంద్రాలు వంటి మౌలిక వసతులు కల్పించేందుకు కృషి చేస్తానని హామీ ఇచ్చారు. దేవాలయ పరిసర ప్రాంతాలను మరింత అభివృద్ధి చేసి భక్తులకు అనుకూల వాతావరణం కల్పిస్తామని పేర్కొన్నారు.

గ్రామ ప్రజలు కూడా ఈ సీసీ రోడ్డు నిర్మాణంపై హర్షం వ్యక్తం చేశారు. రహదారి పూర్తవడంతో దేవాలయానికి చేరుకోవడం సులభమైందని, భక్తులకు ఎంతో ఉపయోగకరంగా ఉంటుందని తెలిపారు. అభివృద్ధి పనులు చేపట్టిన ఎమ్మెల్యేకు గ్రామస్తులు కృతజ్ఞతలు తెలిపారు.

ఈ కార్యక్రమంలో కాంగ్రెస్ పార్టీ మండల అధ్యక్షులు మైపాల్ సంగం కుర్దు, మాజీ సర్పంచ్ కె. హనుమంతు, యాలాల పీఎస్‌సీఎస్ మాజీ చైర్మన్ సురేందర్ రెడ్డి, కాంగ్రెస్ పార్టీ మాజీ మండల అధ్యక్షులు ఏ. భీమయ్య, తాండూర్ మార్కెట్ కమిటీ వైస్ చైర్మన్ నర్సిరెడ్డి, కౌశల్ నెంబర్ మాజీ జిల్లా అధ్యక్షులు అక్బర్ బాబా, సంగం కుర్దు సర్పంచ్, వార్డు సభ్యులు, కాంగ్రెస్ పార్టీ నాయకులు, కార్యకర్తలు, గ్రామ పెద్దలు మరియు భక్తులు పెద్ద సంఖ్యలో పాల్గొన్నారు.

కార్యక్రమం సందర్భంగా స్థానిక నాయకులు మాట్లాడుతూ గ్రామీణ ప్రాంతాల్లో మౌలిక వసతుల అభివృద్ధికి ప్రభుత్వం ప్రాధాన్యత ఇస్తోందని తెలిపారు. ప్రజలకు అవసరమైన సదుపాయాలను కల్పించడంలో ఎమ్మెల్యే మనోహర్ రెడ్డి ముందుండి పనిచేస్తున్నారని కొనియాడారు. కార్యక్రమం అనంతరం దేవస్థానంలో ప్రత్యేక పూజలు నిర్వహించి ప్రజల శ్రేయస్సు కోరుతూ ప్రార్థనలు చేశారు.