- మాదకద్రవ్యాల నిర్మూలన, మహిళల భద్రత, రోడ్డు ప్రమాదాల నివారణపై ప్రజలకు పోలీసుల సూచనలు
శ్రీ బల భీమ న్యూస్ / దగదర్తి, అక్టోబర్ 19:
నెల్లూరు జిల్లా దగదర్తి మండలంలోని ఎస్సీ కాలనీలో దగదర్తి పోలీస్ స్టేషన్ ఎస్సై మహేంద్ర ఆధ్వర్యంలో పోలీసులు కార్డన్ సెర్చ్ నిర్వహించారు. ఈ సందర్భంగా కాలనీలోని పరిసరాలను క్షుణ్ణంగా పరిశీలించి, ప్రజల భద్రతకు సంబంధించిన అంశాలపై అవగాహన కల్పించారు. శాంతిభద్రతల పరిరక్షణతో పాటు నేరాల నివారణే లక్ష్యంగా పోలీసులు ఈ కార్యక్రమాన్ని చేపట్టారు.
‘ఆపరేషన్ త్రిశూల్‌’పై అవగాహన
జిల్లా పోలీస్ శాఖ చేపట్టిన ‘ఆపరేషన్ త్రిశూల్‌’ కార్యక్రమంలో భాగంగా ప్రజలకు పలు కీలక అంశాలపై పోలీసులు అవగాహన కల్పించారు. ముఖ్యంగా మాదకద్రవ్యాల నిర్మూలన, మహిళల భద్రత, రోడ్డు ప్రమాదాల నివారణపై ప్రజలకు పలు సూచనలు చేశారు.
మాదకద్రవ్యాలకు దూరంగా ఉండాలి: గంజాయి, ఇతర మత్తు పదార్థాలకు యువత దూరంగా ఉండాలని, మాదకద్రవ్యాల వినియోగం వల్ల కలిగే అనర్థాలను గుర్తించాలని పోలీసులు సూచించారు.
మహిళల భద్రతకు ప్రాధాన్యం: మహిళల పట్ల వేధింపులకు పాల్పడటం చట్టరీత్యా నేరమని తెలిపారు. మహిళల రక్షణకు ప్రతి ఒక్కరూ బాధ్యతగా వ్యవహరించాలని, మహిళల భద్రతకు సహకరించాలని కోరారు.
రోడ్డు భద్రతా నియమాలు పాటించాలి: వాహనదారులు ట్రాఫిక్ నిబంధనలను తప్పనిసరిగా పాటించాలని, ద్విచక్ర వాహనదారులు హెల్మెట్ ధరించాలని సూచించారు. రోడ్డు ప్రమాదాల నివారణకు ప్రతి ఒక్కరూ బాధ్యతాయుతంగా వ్యవహరించాలని తెలిపారు.
ప్రజల భద్రతే పోలీసుల లక్ష్యం
గ్రామాలు, కాలనీల్లో ప్రజలు అప్రమత్తంగా ఉండాలని, అనుమానాస్పద వ్యక్తులు లేదా కార్యకలాపాలు కనిపిస్తే వెంటనే పోలీసులకు సమాచారం అందించాలని ఎస్సై మహేంద్ర సూచించారు. శాంతిభద్రతల పరిరక్షణలో ప్రజల భాగస్వామ్యం ఎంతో ముఖ్యమని పేర్కొంటూ, నేరాల నియంత్రణకు పోలీసులకు సహకరించాలని కోరారు.
ప్రజల్లో భద్రతాభావాన్ని పెంపొందించడం, నేరాల నివారణపై అవగాహన కల్పించడం, శాంతియుత వాతావరణాన్ని కొనసాగించడం లక్ష్యంగా పోలీసులు ఇటువంటి కార్యక్రమాలు నిర్వహిస్తున్నారు.
ముత్యాల గిరి
సీనియర్ రిపోర్టర్
