కొడంగల్ మండల కాంగ్రెస్ పార్టీ నూతన కమిటీ ఏకగ్రీవం

• మండల అధ్యక్షుడిగా కనకంటి సంజీవరెడ్డి నియామకం
•  పార్టీ బలోపేతానికి మరింత కృషి చేస్తానని హామీ

శ్రీ బల భీమ న్యూస్ / కొడంగల్, ఆగస్టు 7 :

తెలంగాణ రాష్ట్ర ముఖ్యమంత్రి శ్రీ ఎ. రేవంత్ రెడ్డి సొంత నియోజకవర్గమైన కొడంగల్‌లో కాంగ్రెస్ పార్టీ సంస్థాగత బలోపేతానికి కీలకమైన అడుగు పడింది. కొడంగల్ మండల కాంగ్రెస్ పార్టీ నూతన కమిటీని శుక్రవారం జిల్లా కాంగ్రెస్ కమిటీ అధ్యక్షుడు ధారా సింగ్ ఆధ్వర్యంలో ఏకగ్రీవంగా ఎన్నుకున్నారు. ఈ సందర్భంగా పెద్ద నందిగామ గ్రామానికి చెందిన సీనియర్ కాంగ్రెస్ నాయకుడు కనకంటి సంజీవరెడ్డిని కొడంగల్ మండల కాంగ్రెస్ పార్టీ అధ్యక్షుడిగా ఏకగ్రీవంగా ఎన్నుకోవడం జరిగింది. అలాగే కొడంగల్ టౌన్ కాంగ్రెస్ అధ్యక్షుడిగా నయుంను మరోసారి కొనసాగిస్తూ పార్టీ నిర్ణయం తీసుకుంది.

మండల అధ్యక్షునిగా కనకంటి సంజీవరెడ్డి 

కొత్త కమిటీ ఎంపిక సందర్భంగా పార్టీ నాయకులు, కార్యకర్తలు, ప్రజాప్రతినిధులు, గ్రామాల వారీగా వచ్చిన కాంగ్రెస్ శ్రేణులు పెద్ద ఎత్తున పాల్గొని నూతనంగా ఎన్నికైన నాయకులకు శుభాకాంక్షలు తెలియజేశారు. ఈ సందర్భంగా పార్టీ నాయకులు మాట్లాడుతూ, కాంగ్రెస్ పార్టీని గ్రామస్థాయి నుంచి మరింత బలోపేతం చేయడమే లక్ష్యంగా సంస్థాగత మార్పులు చేపట్టినట్లు పేర్కొన్నారు.

కనకంటి సంజీవరెడ్డి గత రెండు దశాబ్దాలుగా కాంగ్రెస్ పార్టీకి అంకితభావంతో సేవలందిస్తున్న నాయకుడని పార్టీ నేతలు కొనియాడారు. ముఖ్యంగా 2009 సంవత్సరం నుంచి ఇప్పటి వరకు ముఖ్యమంత్రి రేవంత్ రెడ్డి నాయకత్వంలో కొడంగల్ నియోజకవర్గంలో పార్టీ కార్యక్రమాలను ప్రజల్లోకి తీసుకెళ్లడంలో ఆయన కీలక పాత్ర పోషించారని తెలిపారు. ఎన్నికల సమయంలోనూ, ఉద్యమాల సమయంలోనూ, ప్రజా సమస్యల పరిష్కారంలోనూ ఆయన నిరంతరం ప్రజల మధ్య ఉంటూ పార్టీ బలోపేతానికి విశేషంగా కృషి చేశారని గుర్తు చేశారు.

కొడంగల్ పట్టణ అధ్యక్షుడు నయుమ్

ప్రజా సమస్యలపై నిరంతరం స్పందిస్తూ గ్రామాల అభివృద్ధి, రైతుల సంక్షేమం, యువతకు ఉపాధి అవకాశాలు, ప్రభుత్వ పథకాల అమలులో ప్రజలకు సహకారం అందించడంలో సంజీవరెడ్డి ముందుంటారని నాయకులు పేర్కొన్నారు. పార్టీ పట్ల ఆయనకు ఉన్న నిబద్ధత, క్రమశిక్షణ, నాయకత్వ లక్షణాలను గుర్తించిన అధిష్టానం మండల అధ్యక్ష బాధ్యతలు అప్పగించడం సముచిత నిర్ణయమని అభిప్రాయపడ్డారు.

ఇంతకుముందు మండల కాంగ్రెస్ పార్టీ అధ్యక్షుడిగా బాధ్యతలు నిర్వహించిన నందారం ప్రశాంత్ ఇటీవల కొడంగల్ మున్సిపల్ చైర్మన్‌గా బాధ్యతలు స్వీకరించిన నేపథ్యంలో మండల అధ్యక్ష పదవి ఖాళీ అయింది. ఆ బాధ్యతలను సమర్థవంతంగా నిర్వహించగల నాయకుడిగా కనకంటి సంజీవరెడ్డిని ఎంపిక చేయడం ద్వారా పార్టీకి మరింత బలం చేకూరుతుందని కాంగ్రెస్ నాయకులు విశ్వాసం వ్యక్తం చేశారు.

కొడంగల్ నియోజకవర్గంలో కాంగ్రెస్ పార్టీ మరింత విస్తరించేలా గ్రామ కమిటీలు, బూత్ కమిటీలు, అనుబంధ విభాగాలను పటిష్టం చేయడం, పార్టీ సిద్ధాంతాలను ప్రజల్లోకి తీసుకెళ్లడం, ప్రభుత్వ సంక్షేమ పథకాలపై అవగాహన కల్పించడం వంటి కార్యక్రమాలకు కొత్త కమిటీ ప్రత్యేక కార్యాచరణ రూపొందించనున్నట్లు సమాచారం.

ఈ సందర్భంగా నూతన మండల అధ్యక్షుడు కనకంటి సంజీవరెడ్డి మాట్లాడుతూ, తనపై నమ్మకం ఉంచి ఈ కీలక బాధ్యతలను అప్పగించిన ముఖ్యమంత్రి శ్రీ రేవంత్ రెడ్డి, కొడంగల్ నియోజకవర్గ ఇన్‌చార్జి తిరుపతి రెడ్డి, జిల్లా కాంగ్రెస్ అధ్యక్షుడు ధారా సింగ్, కొడంగల్ మున్సిపల్ చైర్మన్ నందారం ప్రశాంత్, పార్టీ సీనియర్ నాయకులు, కార్యకర్తలు, గ్రామ ప్రజలకు హృదయపూర్వక కృతజ్ఞతలు తెలిపారు.

తనకు అప్పగించిన బాధ్యతలను పూర్తి నిబద్ధతతో నిర్వర్తిస్తానని, పార్టీని ప్రతి గ్రామంలో మరింత బలోపేతం చేయడానికి కృషి చేస్తానని ఆయన స్పష్టం చేశారు. ముఖ్యమంత్రి రేవంత్ రెడ్డి నాయకత్వంలో రాష్ట్ర ప్రభుత్వం అమలు చేస్తున్న సంక్షేమ, అభివృద్ధి కార్యక్రమాలను ప్రజల్లోకి తీసుకెళ్లేందుకు పార్టీ శ్రేణులతో సమన్వయం చేసుకుంటూ పనిచేస్తానని తెలిపారు.

ప్రభుత్వం అమలు చేస్తున్న రైతు సంక్షేమం, మహిళా సాధికారత, విద్య, వైద్యం, మౌలిక వసతుల అభివృద్ధి, ఉపాధి కల్పన వంటి కార్యక్రమాలను గ్రామ స్థాయిలో ప్రతి కుటుంబానికి చేరేలా కృషి చేస్తామని పేర్కొన్నారు. ప్రజల సమస్యలను ప్రభుత్వ దృష్టికి తీసుకెళ్లి వాటి పరిష్కారానికి నిరంతరం శ్రమిస్తానని హామీ ఇచ్చారు.

ఈ సందర్భంగా పలువురు కాంగ్రెస్ నాయకులు మాట్లాడుతూ, పార్టీ కోసం నిస్వార్థంగా పనిచేసే ప్రతి కార్యకర్తకు భవిష్యత్తులో తగిన గుర్తింపు, బాధ్యతలు లభిస్తాయని విశ్వాసం వ్యక్తం చేశారు. కార్యకర్తలే పార్టీకి వెన్నెముక అని, వారి కృషితోనే కాంగ్రెస్ పార్టీ కొడంగల్ నియోజకవర్గంలో మరింత బలోపేతం అవుతుందని పేర్కొన్నారు.

నూతన కమిటీ ఏర్పాటుతో కొడంగల్ మండల కాంగ్రెస్ పార్టీకి కొత్త ఉత్సాహం వచ్చినట్లు నాయకులు అభిప్రాయపడ్డారు. రానున్న స్థానిక సంస్థల ఎన్నికలు, పార్టీ కార్యక్రమాలు, ప్రభుత్వ సంక్షేమ పథకాల ప్రచారంలో ఈ కమిటీ కీలక పాత్ర పోషిస్తుందని ఆశాభావం వ్యక్తం చేశారు.