అర్ధరాత్రి కొడంగల్‌లో టిప్పర్ బీభత్సం

• 12 విద్యుత్ స్తంభాలు ధ్వంసం 
• ఆరు గ్రామాలకు నిలిచిపోయిన విద్యుత్ సరఫరా
• బాధ్యులపై చర్యలు తీసుకోవాలని ప్రజల డిమాండ్

శ్రీ బల భీమ న్యూస్, కొడంగల్:

వికారాబాద్ జిల్లా కొడంగల్ నియోజకవర్గ కేంద్రంలో అర్ధరాత్రి చోటుచేసుకున్న టిప్పర్ బీభత్సం స్థానిక ప్రజల్లో తీవ్ర ఆందోళనకు గురి చేసింది. బుల్కాపూర్ గ్రామ శివారులో కొనసాగుతున్న డంపింగ్ యార్డ్ పనుల సమయంలో ఓ టిప్పర్ నిర్లక్ష్యంగా వ్యవహరించడంతో ఏకంగా 12 విద్యుత్ స్తంభాలు నేలమట్టమయ్యాయి. ఈ ఘటన కారణంగా చిట్లపల్లి, ఖాజా హైమత్‌పల్లి, పోచమ్మ తండా, మైసమ్మ తండా, బుల్కాపూర్, ఐనంపల్లి తదితర గ్రామాలకు అర్ధరాత్రి నుంచే విద్యుత్ సరఫరా పూర్తిగా నిలిచిపోయింది.

స్థానికులు తెలిపిన వివరాల ప్రకారం, డంపింగ్ యార్డ్‌లో మట్టి తవ్వకాలు చేపడుతున్న ఓ ప్రైవేట్ కంపెనీకి చెందిన టిప్పర్ రాత్రి వేళల్లో హైడ్రాలిక్ బాడీని పైకెత్తిన స్థితిలోనే రోడ్డుపైకి వచ్చింది. ఈ క్రమంలో విద్యుత్ వైర్లను ఢీకొట్టిన టిప్పర్, డ్రైవర్‌కు విషయం తెలియకపోవడంతో దాదాపు కిలోమీటర్ మేర అలాగే ముందుకు సాగింది. దీంతో వరుసగా ఉన్న 12 విద్యుత్ స్తంభాలు ఒక్కొక్కటిగా కూలిపోవడంతో పాటు విద్యుత్ తీగలు తెగిపోయాయి.

ఘటనతో ఒక్కసారిగా భారీ శబ్దాలు వినిపించడంతో గ్రామస్తులు భయాందోళనకు గురయ్యారు. పలుచోట్ల విద్యుత్ తీగలు రోడ్డుపై పడిపోవడంతో ప్రమాద పరిస్థితులు నెలకొన్నాయి. అదృష్టవశాత్తూ ఎటువంటి ప్రాణనష్టం జరగకపోయినా, పెద్ద ప్రమాదం తప్పిందని స్థానికులు చెబుతున్నారు.

విద్యుత్ సరఫరా నిలిచిపోవడంతో గ్రామాల్లో ప్రజలు తీవ్ర ఇబ్బందులు ఎదుర్కొన్నారు. వేసవి కాలంలో రాత్రంతా కరెంటు లేకపోవడంతో చిన్నపిల్లలు, వృద్ధులు తీవ్ర అసౌకర్యానికి గురయ్యారని గ్రామస్తులు ఆవేదన వ్యక్తం చేశారు. తాగునీటి సరఫరా కూడా ప్రభావితమైందని తెలిపారు.

సమాచారం అందుకున్న విద్యుత్ శాఖ అధికారులు వెంటనే సంఘటనా స్థలానికి చేరుకుని పరిస్థితిని పరిశీలించారు. అయితే ఈ విధ్వంసానికి కారణమైన టిప్పర్ ఏ కంపెనీకి చెందినదన్న విషయంపై మొదట స్పష్టత లేకపోవడంతో అధికారులు కొంత ఇబ్బందులు ఎదుర్కొన్నారు. అనంతరం బుల్కాపూర్ శివారులో డంపింగ్ యార్డ్ పనులు నిర్వహిస్తున్న ఓ కంపెనీకి చెందిన టిప్పర్ వల్లే ఈ ఘటన జరిగినట్లు ప్రాథమికంగా గుర్తించినట్లు సమాచారం.

విద్యుత్ శాఖ సిబ్బంది రాత్రి నుంచే మరమ్మతు పనులు చేపట్టి విద్యుత్ సరఫరాను పునరుద్ధరించేందుకు శ్రమించారు. భారీగా ధ్వంసమైన స్తంభాలను మార్చడం, తెగిపోయిన తీగలను పునరుద్ధరించడం వంటి పనులు అత్యవసరంగా నిర్వహించినట్లు అధికారులు తెలిపారు.

ఈ ఘటనపై విద్యుత్ శాఖ ఏఈ మాట్లాడుతూ, “బుల్కాపూర్ డంపింగ్ యార్డ్ పనుల్లో ఉన్న ఓ టిప్పర్ కారణంగానే ఈ ప్రమాదం జరిగినట్లు తెలుస్తోంది. పూర్తి స్థాయి విచారణ చేపట్టి బాధ్యులపై పోలీస్ స్టేషన్‌లో ఫిర్యాదు చేస్తాం” అని వెల్లడించారు.

ఇక స్థానిక ప్రజలు మాత్రం తీవ్ర ఆగ్రహం వ్యక్తం చేస్తున్నారు. రాత్రి వేళల్లో సరైన భద్రతా చర్యలు లేకుండా పనులు నిర్వహించడం వల్లే ఈ ఘటన జరిగిందని ఆరోపిస్తున్నారు. డంపింగ్ యార్డ్ పనులు చేస్తున్న కంపెనీపై కేసు నమోదు చేసి, నష్టపరిహారం వసూలు చేయాలని డిమాండ్ చేస్తున్నారు. అలాగే భవిష్యత్తులో ఇలాంటి ఘటనలు జరగకుండా అధికారులు కఠిన చర్యలు తీసుకోవాలని కోరుతున్నారు.