జాతీయ టీకాకరణ కార్యక్రమాన్ని ఆకస్మికంగా పరిశీలించిన జిల్లా వైద్యాధికారి

• వర్షాకాలంలో ప్రజలు అప్రమత్తంగా ఉండాలి
•  డెంగ్యూ, మలేరియా నివారణకు పరిశుభ్రతే ప్రధాన ఆయుధమని సూచన

శ్రీ బల భీమ న్యూస్ /కొడంగల్, జూలై 22:

కొడంగల్ పట్టణంలోని బాలాజీ నగర్ బస్తీ దవాఖానలో నిర్వహిస్తున్న జాతీయ టీకాకరణ కార్యక్రమాన్ని జిల్లా వైద్యాధికారి డాక్టర్ సుధాకర్ లాల్ ఆకస్మికంగా పరిశీలించారు. ఈ సందర్భంగా జిల్లా అసిస్టెంట్ మలేరియా అధికారి సత్యంతో కలిసి టీకాకరణ ప్రక్రియను నిశితంగా పరిశీలించి, చిన్నారులకు అందిస్తున్న వైద్య సేవలపై ఆరా తీశారు. టీకాల నిల్వ విధానం, కోల్డ్ చైన్ నిర్వహణ, లబ్ధిదారుల నమోదు, వ్యాక్సినేషన్ రికార్డుల నిర్వహణ తదితర అంశాలను పరిశీలించి వైద్య సిబ్బందికి పలు సూచనలు, సలహాలు అందించారు.

ఈ సందర్భంగా జిల్లా వైద్యాధికారి మాట్లాడుతూ, జాతీయ టీకాకరణ కార్యక్రమం ప్రతి చిన్నారి ఆరోగ్యానికి రక్షణ కవచమని, ఒక్కరు కూడా టీకాలకు దూరం కాకుండా చూడాల్సిన బాధ్యత వైద్య సిబ్బందితో పాటు ప్రతి తల్లిదండ్రులపై ఉందన్నారు. ప్రభుత్వం అందిస్తున్న ఉచిత టీకాలను ప్రతి అర్హుడికి సకాలంలో అందించేందుకు ప్రత్యేక చర్యలు తీసుకోవాలని సూచించారు.

అనంతరం వైద్య సిబ్బంది, ఆశా కార్యకర్తలతో కలిసి బాలాజీ నగర్ పరిసర ప్రాంతాల్లో ఫీవర్ సర్వే, లార్వా సర్వే నిర్వహించారు. ఇంటింటికి వెళ్లి ప్రజల ఆరోగ్య పరిస్థితులను తెలుసుకోవడంతో పాటు జ్వరంతో బాధపడుతున్న వారు ఎవరైనా ఉన్నారా అనే వివరాలను సేకరించారు. అలాగే ఇళ్ల పరిసరాల్లో దోమల లార్వా పెరిగే అవకాశమున్న నీటి నిల్వలను పరిశీలించి, అవసరమైన చోట నివారణ చర్యలు చేపట్టాలని సూచించారు.

వర్షాకాలంలో అంటువ్యాధులు వేగంగా వ్యాపించే అవకాశం ఉన్నందున ప్రజలు మరింత అప్రమత్తంగా ఉండాలని జిల్లా వైద్యాధికారి సూచించారు. ఇంటి పరిసరాలను పరిశుభ్రంగా ఉంచడం, పాత టైర్లు, కొబ్బరి చిప్పలు, ప్లాస్టిక్ డబ్బాలు, కుండీలు, కూలర్లు వంటి వాటిలో నీరు నిల్వ ఉండకుండా తరచూ పరిశీలించాలని చెప్పారు. దోమల ఉత్పత్తిని అరికట్టేందుకు ప్రతి కుటుంబం తమ పరిసరాలను శుభ్రంగా ఉంచడం అత్యంత అవసరమన్నారు.

అలాగే వైద్య సిబ్బంది ప్రతి రోజు ఫీవర్ సర్వేలు, లార్వా సర్వేలు క్రమం తప్పకుండా నిర్వహించాలని, జ్వర లక్షణాలు కనిపించిన వెంటనే బాధితులకు అవసరమైన వైద్య పరీక్షలు నిర్వహించి చికిత్స అందించాలని ఆదేశించారు. గ్రామాలు, బస్తీలు, కాలనీలలో ప్రజలకు ఆరోగ్య అవగాహన కార్యక్రమాలు నిర్వహిస్తూ, వ్యాధుల నివారణ చర్యలపై విస్తృత ప్రచారం చేయాలని సూచించారు.

డెంగ్యూ, మలేరియా, చికున్‌గున్యా, వైరల్ ఫీవర్లు, వాంతులు, విరేచనాలు వంటి వ్యాధులు వర్షాకాలంలో ఎక్కువగా ప్రబలే అవకాశం ఉన్నందున ప్రజలు స్వీయ జాగ్రత్తలు పాటించాలని ఆయన తెలిపారు. జ్వరం వచ్చిన వెంటనే స్వయంగా మందులు వాడకుండా సమీప ప్రభుత్వ ఆసుపత్రి లేదా బస్తీ దవాఖానను సంప్రదించాలని సూచించారు. దోమల నివారణ కోసం దోమతెరలు వినియోగించడం, పూర్తి చేతుల దుస్తులు ధరించడం, తాగునీటిని పరిశుభ్రంగా ఉంచుకోవడం వంటి జాగ్రత్తలు తప్పనిసరిగా పాటించాలని పేర్కొన్నారు.

జిల్లా వైద్య శాఖ ఆధ్వర్యంలో వ్యాధుల నివారణ కోసం చేపడుతున్న ప్రత్యేక చర్యల్లో ప్రజలు కూడా భాగస్వాములు కావాలని కోరారు. ఆరోగ్య సిబ్బంది ఇంటింటికి వచ్చినప్పుడు వారికి పూర్తి సహకారం అందించాలని, ఆరోగ్య సంబంధిత సమాచారం నిజాయితీగా తెలియజేయాలని సూచించారు. ప్రజల భాగస్వామ్యంతోనే అంటువ్యాధులను సమర్థవంతంగా నియంత్రించవచ్చని ఆయన పేర్కొన్నారు.

జిల్లాలో ప్రతి బస్తీ దవాఖాన, ప్రాథమిక ఆరోగ్య కేంద్రం, ఉప ఆరోగ్య కేంద్రంలో టీకాకరణ కార్యక్రమాలు నిరంతరంగా కొనసాగుతున్నాయని, అర్హులైన ప్రతి చిన్నారికి ప్రభుత్వం నిర్దేశించిన షెడ్యూల్ ప్రకారం టీకాలు అందేలా ప్రత్యేక పర్యవేక్షణ కొనసాగుతోందని తెలిపారు.

ఈ కార్యక్రమంలో జిల్లా ప్రోగ్రాం మేనేజర్ మహేష్, బస్తీ దవాఖాన వైద్యాధికారి డాక్టర్ అమృత, కొడంగల్ సబ్ యూనిట్ మలేరియా అధికారులు వెంకటేశ్వర్లు, పకీరప్ప, ఏఎన్ఎం వినోద, ఆశా కార్యకర్తలు రేఖ, మంజుల, యాదమ్మతో పాటు ఇతర వైద్య సిబ్బంది పాల్గొన్నారు.