‘కాక్రోచ్ జనతా పార్టీ’ సోషల్ మీడియాలో సంచలనం

• యువత అసంతృప్తికి కొత్త వేదికగా మారిన వ్యంగ్య రాజకీయ ఉద్యమం

శ్రీ బల భీమ న్యూస్ / కొడంగల్ :

దేశ రాజకీయాల్లో, సోషల్ మీడియాలో ప్రస్తుతం తీవ్ర చర్చనీయాంశంగా మారిన పేరు — ‘కాక్రోచ్ జనతా పార్టీ’ (సీజేపీ). మొదట్లో సరదాగా, వ్యంగ్యంగా ప్రారంభమైన ఈ సోషల్ మీడియా ప్రచారం ఇప్పుడు యువత ఆవేదనకు, నిరాశకు, అసంతృప్తికి ప్రతీకగా మారింది. ముఖ్యంగా జెన్ జెడ్ యువతలో ఈ ఉద్యమానికి అపార స్పందన లభిస్తోంది. కొద్ది రోజుల్లోనే లక్షలాది ఫాలోవర్లను సంపాదించుకోవడం, దేశవ్యాప్తంగా చర్చకు దారితీయడం విశేషంగా మారింది.

ఈ వివాదానికి ఆరంభం భారత సుప్రీంకోర్టు ప్రధాన న్యాయమూర్తి జస్టిస్ సూర్యకాంత్ చేసిన వ్యాఖ్యలతో జరిగింది. సోషల్ మీడియాలో ప్రచారమైన ప్రకారం, యువతను బొద్దింకలు, పరాన్నజీవులతో పోల్చారనే ఆరోపణలు వెల్లువెత్తాయి. అయితే ఆ వ్యాఖ్యలను మీడియా వక్రీకరించిందని జస్టిస్ సూర్యకాంత్ తరువాత వివరణ ఇచ్చినా, అప్పటికే సోషల్ మీడియాలో ఆగ్రహావేశాలు చెలరేగిపోయాయి. ఇదే సమయంలో ‘కాక్రోచ్ జనతా పార్టీ’ పేరుతో వ్యంగ్య ప్రచారం మొదలైంది.

ఈ పార్టీ వ్యవస్థాపకుడు అభిజిత్ దీపక్. ఆయన మహారాష్ట్రలోని ఛత్రపతి శంభాజీ నగర్‌కు చెందిన యువకుడు. పుణెలో చదువుకున్న అనంతరం కొంతకాలం ఆమ్ ఆద్మీ పార్టీ కమ్యూనికేషన్ టీంలో పనిచేశారు. అనంతరం అమెరికాలోని బోస్టన్ విశ్వవిద్యాలయంలో ఉన్నత విద్య పూర్తి చేశారు. ప్రస్తుతం ఆయననే ‘కాక్రోచ్ జనతా పార్టీ’ కన్వీనర్‌గా పేర్కొంటున్నారు.

తాను ఈ ఉద్యమాన్ని ఎందుకు ప్రారంభించాల్సి వచ్చిందో వివరిస్తూ అభిజిత్ మాట్లాడుతూ, “యువత అభిప్రాయాలను వ్యక్తం చేసినందుకు వారిని బొద్దింకలతో పోల్చడం బాధాకరం. రాజ్యాంగాన్ని కాపాడాల్సిన స్థాయిలో ఉన్న వ్యక్తులు యువతను అవమానించడం సరైంది కాదు. అందుకే వ్యంగ్యంగా ‘మేమే బొద్దింకలం అయితే, మాకు మా పార్టీ ఉండాలి’ అనే ఆలోచనతో ఈ ఉద్యమాన్ని ప్రారంభించాం” అని చెప్పారు.

ఈ పార్టీకి సంబంధించిన వెబ్‌సైట్ కూడా రూపొందించారు. ఇన్‌స్టాగ్రామ్‌లో ఇప్పటికే దాదాపు 96 లక్షల మంది ఫాలోవర్లు ఉన్నట్లు చెబుతున్నారు. అంతేకాకుండా రెండు లక్షలకు పైగా సభ్యత్వ నమోదులు జరిగినట్లు సమాచారం. నాలుగు రోజుల వ్యవధిలోనే ఇంతటి భారీ స్పందన రావడం సోషల్ మీడియా చరిత్రలో అరుదైన పరిణామంగా విశ్లేషకులు భావిస్తున్నారు.

సీజేపీ మ్యానిఫెస్టో కూడా విపరీతంగా వైరల్ అవుతోంది. ఇందులో ప్రధానంగా న్యాయవ్యవస్థ స్వతంత్రత, మహిళల ప్రాతినిధ్యం, నిరుద్యోగ సమస్యలు, యువతకు అవకాశాల లేమి వంటి అంశాలను ప్రస్తావించారు. “న్యాయమూర్తులు పదవీ విరమణ తర్వాత ప్రభుత్వ ప్రయోజనాలు పొందడం ప్రజాస్వామ్యానికి ప్రమాదకరం” అని అభిజిత్ వ్యాఖ్యానించారు. మహిళలకు 33 శాతం కాకుండా 50 శాతం రిజర్వేషన్ ఇవ్వాలని కూడా ఆయన సూచించారు.

డిజిటల్ మార్కెటింగ్ నిపుణుల అభిప్రాయం ప్రకారం, ఇది కేవలం సోషల్ మీడియా ట్రెండ్ కాదు. దేశవ్యాప్తంగా యువతలో పెరుగుతున్న అసంతృప్తికి ఇది ప్రతిబింబం. నిరుద్యోగం, అవకాశాల కొరత, రాజకీయ వ్యవస్థపై విసుగు వంటి అంశాలు యువతను ఈ ఉద్యమం వైపు ఆకర్షిస్తున్నాయని వారు విశ్లేషిస్తున్నారు.

ఈ ఉద్యమానికి రాజకీయ, సామాజిక వర్గాల నుంచి కూడా స్పందన లభిస్తోంది. మాజీ క్రికెటర్, ఎంపీ కీర్తి ఆజాద్, టీఎంసీ ఎంపీ మహువా మొయిత్రా వంటి ప్రముఖులు ఈ ప్రచారానికి మద్దతు తెలిపినట్లు సమాచారం. దీంతో ఈ పార్టీ సోషల్ మీడియాలో మరింత చర్చనీయాంశమైంది.

భారతీయ జెన్ జెడ్ యువత గురించి అభిజిత్ ఆసక్తికర వ్యాఖ్యలు చేశారు. “మన యువత హింసను కాదు, వ్యంగ్యాన్ని ఆయుధంగా ఉపయోగిస్తోంది. బొద్దింకల వేషధారణలో యమునా నదిని శుభ్రం చేస్తూ వ్యవస్థపై వ్యంగ్యం చేస్తున్నారు. ఇది ఒక కొత్త తరహా నిరసన” అని ఆయన చెప్పారు. “ప్రస్తుత రాజకీయ వ్యవస్థతో యువత విసిగిపోయింది. వారు అభివృద్ధి, ఉపాధి, సాంకేతిక పురోగతిని కోరుకుంటున్నారు” అని అభిప్రాయపడ్డారు.

ఇప్పటికే ‘కాక్రోచ్ జనతా పార్టీ తెలంగాణ’ పేరుతో ప్రత్యేక సోషల్ మీడియా పేజీలు కూడా ప్రారంభమయ్యాయి. దేశంలోని వివిధ రాష్ట్రాల్లో ఈ ఉద్యమానికి మద్దతుగా పేజీలు, గ్రూపులు ఏర్పడుతున్నాయి.

రాజకీయ విశ్లేషకుల అభిప్రాయం ప్రకారం, ఇది ప్రస్తుతం వ్యంగ్య సోషల్ మీడియా ఉద్యమంగానే కనిపిస్తున్నప్పటికీ, యువత భావజాలాన్ని ప్రతిబింబించే పెద్ద వేదికగా మారే అవకాశాలు కనిపిస్తున్నాయి. రాబోయే కాలంలో ఇది నిజమైన రాజకీయ ఉద్యమంగా మారుతుందా? లేక సోషల్ మీడియా ట్రెండ్‌గానే మిగిలిపోతుందా? అన్నది ఆసక్తికరంగా మారింది.