శ్రీ మహాలక్ష్మి వెంకటేశ్వర స్వామి ఆలయ పునర్నిర్మాణ పనులు వేగవంతం

• సీఎం రేవంత్ రెడ్డి ప్రత్యేక చొరవతో శరవేగంగా అభివృద్ధి కార్యక్రమాలు
• ఆలయ సమీపంలో నాలుగు ఎకరాల స్థలం లీజుకు తీసుకుని శిల్ప పనులకు శ్రీకారం
• మున్సిపల్ చైర్మన్ నందారం ప్రశాంత్

శ్రీ బల భీమ న్యూస్ / కొడంగల్ :

వికారాబాద్ జిల్లా కొడంగల్ నియోజకవర్గంలో పేదల పెన్నిధిగా, భక్తుల ఆరాధ్య దైవంగా ప్రసిద్ధి చెందిన శ్రీ మహాలక్ష్మి వెంకటేశ్వర స్వామి ఆలయ పునర్నిర్మాణ పనులు శరవేగంగా కొనసాగుతున్నాయి. రాష్ట్ర ముఖ్యమంత్రి A. Revanth Reddy ప్రత్యేక చొరవతో, కాంగ్రెస్ పార్టీ నియోజకవర్గ ఇన్‌చార్జి తిరుపతి రెడ్డి నేతృత్వంలో ఆలయ అభివృద్ధి కార్యక్రమాలు వేగం పుంజుకున్నాయి. ఆలయాన్ని అత్యాధునిక సౌకర్యాలతో, ఆధ్యాత్మిక వైభవాన్ని ప్రతిబింబించేలా తీర్చిదిద్దేందుకు అధికారులు, కాంట్రాక్టర్లు ప్రత్యేక ప్రణాళికలతో ముందుకు సాగుతున్నారు.

ఈ నేపథ్యంలో శనివారం ఆలయ పునర్నిర్మాణ పనులకు సంబంధించి కీలకమైన స్థల పరిశీలన కార్యక్రమం నిర్వహించారు. ఆలయ నిర్మాణంలో ఉపయోగించనున్న భారీ శిలలు, స్తంభాలు, ప్రతిమల తయారీ పనులను నిర్వహించేందుకు అనువైన ప్రదేశాన్ని ఎంపిక చేసే దిశగా కాంట్రాక్టర్ బృందం ఆలయ పరిసర ప్రాంతాలను పరిశీలించింది. శ్రీవారి ఆలయ సమీపంలోని బైపాస్ రోడ్డుకు ఆనుకుని ఉన్న సుమారు నాలుగు ఎకరాల విస్తీర్ణంలో స్థలాన్ని లీజుకు తీసుకుని అక్కడే శిల్ప నిర్మాణ పనులు చేపట్టాలని నిర్ణయించారు.

ఈ స్థలాన్ని మున్సిపల్ చైర్మన్ నందారం ప్రశాంత్ కాంట్రాక్టర్‌తో కలిసి ప్రత్యక్షంగా పరిశీలించారు. అనంతరం ఆయన మాట్లాడుతూ ఆలయ పునర్నిర్మాణం కొడంగల్ ప్రాంతానికి ఆధ్యాత్మికంగా, సాంస్కృతికంగా ఎంతో ప్రాధాన్యత కలిగిన అంశమని తెలిపారు. సుమారు 400 మందికి పైగా శిల్పులు, కార్మికులు ఆలయ స్తంభాలు, విగ్రహాలు, శిలా నిర్మాణ పనుల్లో పాల్గొననున్నట్లు వెల్లడించారు. ఆలయ నిర్మాణం సంప్రదాయ శైలిలో, అత్యంత నాణ్యతతో చేపట్టాలని ప్రభుత్వం ప్రత్యేక ఆదేశాలు ఇచ్చిందన్నారు.

అలాగే ఆలయ పనులను నిర్ణీత గడువులోపు పూర్తి చేయాలని కాంట్రాక్టర్‌కు సూచించినట్లు తెలిపారు. ఒక సంవత్సరం లోపే ఆలయ పునర్నిర్మాణ కార్యక్రమాన్ని పూర్తి చేసి భక్తులకు అందుబాటులోకి తీసుకురావడమే లక్ష్యమని పేర్కొన్నారు. ఆలయాన్ని దర్శించేందుకు వచ్చే భక్తులకు మెరుగైన సౌకర్యాలు కల్పించేందుకు పార్కింగ్, తాగునీరు, విశ్రాంతి మండపాలు, విద్యుత్ సదుపాయాలు వంటి మౌలిక వసతుల అభివృద్ధిపైనా దృష్టి సారిస్తున్నట్లు చెప్పారు.

మరో మూడు రోజుల్లో స్థలాన్ని పూర్తిగా చదును చేసి శిలలను తరలించే పనులు ప్రారంభిస్తామని కాంట్రాక్టర్ వెల్లడించారు. అనంతరం శిల్పులను తీసుకువచ్చి ఆలయ పరిసర ప్రాంతాల్లోనే స్తంభాలు, ప్రతిమలు, ఇతర శిలా నిర్మాణ పనులు చేపడతామని తెలిపారు. ఆలయ పునర్నిర్మాణం పూర్తయిన తర్వాత ఈ ప్రాంతం ప్రముఖ ఆధ్యాత్మిక కేంద్రంగా మారుతుందని స్థానిక ప్రజలు ఆశాభావం వ్యక్తం చేస్తున్నారు.