పోక్సో కేసులో బండి భగీరథ్‌పై లుకౌట్ నోటీసులు

• అరెస్ట్‌కు రంగం సిద్ధం చేసిన పోలీసులు
•  హైకోర్టులో ముందస్తు బెయిల్‌కు ఊరట లభించలేదు
• హైదరాబాద్, కరీంనగర్, ఢిల్లీల్లో 4 ప్రత్యేక బృందాలతో గాలింపు ముమ్మరం
• బండి భగీరథ్‌పై లుకౌట్ నోటీసులు
• దేశం విడిచిపోకుండా విమానాశ్రయాలకు ఆదేశాలు
• 4 బృందాలతో పోలీసుల ముమ్మర వేట

శ్రీ బల భీమ న్యూస్ / కొడంగల్ :

మైనర్ బాలిక వేధింపుల నేపథ్యంలో నమోదైన సంచలన పోక్సో కేసులో నిందితుడిగా ఆరోపణలు ఎదుర్కొంటున్న బండి భగీరథ్‌పై పోలీసులు చర్యలను మరింత వేగవంతం చేశారు. కేసు తీవ్రతను దృష్టిలో ఉంచుకుని అతడు దేశం విడిచి పారిపోయే అవకాశాలున్నాయన్న అనుమానాలతో పోలీసులు కీలక నిర్ణయం తీసుకున్నారు. వెంటనే అతడిపై లుకౌట్ సర్క్యులర్ నోటీసులు జారీ చేస్తూ దేశవ్యాప్తంగా ఉన్న అన్ని అంతర్జాతీయ విమానాశ్రయాలు, సరిహద్దు తనిఖీ కేంద్రాలను అప్రమత్తం చేశారు.

ఇదే సమయంలో బండి భగీరథ్‌కు తెలంగాణ హైకోర్టులో కూడా ఊరట లభించలేదు. తనపై నమోదైన పోక్సో కేసులో ముందస్తు బెయిల్ మంజూరు చేయాలని, కనీసం అరెస్టు నుంచి తాత్కాలిక రక్షణ కల్పించాలని కోరుతూ అతడు దాఖలు చేసిన అత్యవసర పిటిషన్‌పై తెలంగాణ హైకోర్టు సుదీర్ఘంగా విచారణ జరిపింది. శుక్రవారం రాత్రి 9 గంటల నుంచి అర్ధరాత్రి వరకు దాదాపు మూడు గంటల పాటు సాగిన ఈ విచారణలో ఇరుపక్షాల న్యాయవాదుల మధ్య తీవ్ర వాదోపవాదాలు చోటుచేసుకున్నాయి.

ఈ కేసును విచారించిన జస్టిస్ టి. మాధవీదేవి, బాధితురాలి వాంగ్మూలం, పోలీసులు సేకరించిన ప్రాథమిక ఆధారాలను పరిశీలించిన అనంతరం.. ఈ దశలో నిందితుడికి ఎలాంటి ముందస్తు బెయిల్ గానీ, అరెస్టు నుంచి తాత్కాలిక రక్షణ గానీ ఇవ్వలేమని స్పష్టం చేసినట్లు సమాచారం. దీంతో బండి భగీరథ్‌కు కోర్టులో ఎదురుదెబ్బ తగిలినట్టైంది. అయితే పిటిషన్‌పై తుది నిర్ణయాన్ని కోర్టు వచ్చే వారానికి వాయిదా వేసింది.

మరోవైపు, భగీరథ్‌ను అదుపులోకి తీసుకునేందుకు పోలీసులు గాలింపును మరింత ముమ్మరం చేశారు. సిట్ ఆధ్వర్యంలో నాలుగు ప్రత్యేక పోలీస్ బృందాలను ఏర్పాటు చేసి హైదరాబాద్, కరీంనగర్, ఢిల్లీ ప్రాంతాల్లో విస్తృతంగా తనిఖీలు నిర్వహిస్తున్నారు. అతడి కదలికలపై ప్రత్యేక నిఘా పెట్టినట్లు తెలుస్తోంది. ఏ క్షణంలోనైనా అతడిని అదుపులోకి తీసుకునే అవకాశాలు ఉన్నాయని పోలీసు వర్గాల్లో చర్చ సాగుతోంది.

విచారణ సందర్భంగా బండి భగీరథ్ తరఫున హాజరైన సీనియర్ న్యాయవాది నిరంజన్ రెడ్డి పలు కీలక వాదనలు వినిపించారు. ఈ కేసులో రాజకీయ కోణం ఉందని, కావాలనే కఠినమైన పోక్సో సెక్షన్లు చేర్చారని ఆయన ఆరోపించారు. ఇరువురి మధ్య పరస్పర అంగీకారంతో సాగిన సంబంధాన్ని రాజకీయంగా మలిచి ఇప్పుడు కక్షసాధింపుగా కేసు పెట్టారని వాదించారు. దర్యాప్తుకు పూర్తి సహకారం అందిస్తామని, అప్పటి వరకు అరెస్టు చేయకుండా రక్షణ ఇవ్వాలని కోర్టును అభ్యర్థించారు.

అయితే ఈ వాదనలను ప్రభుత్వ తరఫు న్యాయవాది, పబ్లిక్ ప్రాసిక్యూటర్ పల్లె నాగేశ్వరరావు తీవ్రంగా ఖండించారు. జీహెచ్‌ఎంసీ అధికారిక జనన రికార్డుల ప్రకారం బాధితురాలి వయసు 18 ఏళ్ల లోపేనని, చట్టపరంగా ఆమె మైనర్ కిందికే వస్తుందని కోర్టుకు వివరించారు. బాధితురాలు మేజిస్ట్రేట్ ఎదుట ఇచ్చిన వాంగ్మూలం ఆధారంగానే కేసు తీవ్రతను దృష్టిలో ఉంచుకుని పోక్సో సెక్షన్లు చేర్చామని స్పష్టం చేశారు.

బాధితురాలి తరఫు న్యాయవాది పప్పు నాగేశ్వరరావు కూడా కోర్టులో కీలక అంశాలను ప్రస్తావించారు. నిందితుడి తండ్రి కేంద్ర మంత్రి కావడంతో బాధితురాలి కుటుంబంపై తీవ్ర ఒత్తిళ్లు, బెదిరింపులు వస్తున్నాయని ఆరోపించారు. కేసును వెనక్కి తీసుకోవాలని పలు మార్గాల్లో ఒత్తిడి తెస్తున్నారని కోర్టు దృష్టికి తీసుకువచ్చినట్లు సమాచారం.

ఈ విచారణ సందర్భంగా సామాజిక మాధ్యమాల్లో తనపై జరుగుతున్న అభ్యంతరకర ప్రచారాలపై కూడా జస్టిస్ మాధవీదేవి తీవ్ర ఆందోళన వ్యక్తం చేసినట్లు న్యాయవర్గాల్లో చర్చ సాగుతోంది. న్యాయవ్యవస్థపై అనవసర ఒత్తిడులు, దుష్ప్రచారాలు సరికాదని ఆమె వ్యాఖ్యానించినట్లు సమాచారం.

పోలీసులు ఇప్పటికే లుకౌట్ నోటీసులు జారీ చేయడం, హైకోర్టు నుంచి తాత్కాలిక రక్షణ లభించకపోవడం వంటి పరిణామాల నేపథ్యంలో బండి భగీరథ్ అరెస్ట్‌కు రంగం సిద్ధమైనట్లు కనిపిస్తోంది. ప్రస్తుతం రాష్ట్రవ్యాప్తంగా ఈ కేసు తీవ్ర చర్చనీయాంశంగా మారింది. రాజకీయ, న్యాయ, సామాజిక వర్గాల్లోనూ ఈ వ్యవహారం హాట్ టాపిక్‌గా మారింది.

కేసు దర్యాప్తు మరింత వేగవంతం అవుతుండగా, భగీరథ్‌ను పోలీసులు ఎప్పుడు అదుపులోకి తీసుకుంటారన్న దానిపై ఉత్కంఠ నెలకొంది. వచ్చే వారంలో హైకోర్టు తుది నిర్ణయం వెలువడనున్న నేపథ్యంలో ఈ కేసులో మరిన్ని కీలక పరిణామాలు చోటుచేసుకునే అవకాశాలు కనిపిస్తున్నాయి.