• బెల్ట్ షాపులకు అధికారుల అండదండలా..?
• కొడంగల్ నియోజకవర్గంలో విచ్చలవిడిగా అక్రమ మద్యం విక్రయాలు
• యువత భవిష్యత్తు చీకట్లోకి.. కుటుంబాలు ఆర్థిక కష్టాల్లోకి.. ప్రమాదాలకు పెరుగుతున్న మద్యం ముప్పు

శ్రీ బల భీమ న్యూస్ / కొడంగల్ :
వికారాబాద్ జిల్లాలోని కొడంగల్ నియోజకవర్గంలో అక్రమ బెల్ట్ షాపుల వ్యవహారం రోజురోజుకు పెరుగుతూ ప్రజలను తీవ్ర ఆందోళనకు గురి చేస్తోంది. గ్రామాలు, తండాలు, కాలనీలు, గల్లీలు అనే తేడా లేకుండా ఎక్కడ చూసినా బెల్ట్ షాపులు దర్శనమిస్తున్నాయి. ప్రభుత్వ అనుమతులు లేకుండా నిర్వహిస్తున్న ఈ అక్రమ మద్యం విక్రయ కేంద్రాలు ఇప్పుడు బార్లను తలపిస్తున్నాయనే విమర్శలు వినిపిస్తున్నాయి. ఉదయం వేకువజామున నుంచి అర్ధరాత్రి వరకు మద్యం విక్రయాలు జరుగుతుండగా సంబంధిత శాఖ అధికారులు మాత్రం చూసీ చూడనట్లు వ్యవహరిస్తున్నారనే ఆరోపణలు ప్రజల నుంచి వెల్లువెత్తుతున్నాయి.

గ్రామీణ ప్రాంతాల్లో సాధారణ కిరాణా దుకాణాలు, టీ స్టాళ్లు, ఇళ్ల వెనుక గదులు, పొలాల వద్ద గుడిసెలు కూడా బెల్ట్ షాపులుగా మారిపోవడం గమనార్హం. ప్రభుత్వానికి కోట్ల రూపాయల ఆదాయం వచ్చేలా లైసెన్స్ తీసుకుని నిబంధనల ప్రకారం నడపాల్సిన మద్యం దుకాణాలకు భిన్నంగా, గ్రామాల్లో మాత్రం ఎలాంటి నియంత్రణ లేకుండా మద్యం అమ్మకాలు జరుగుతున్నాయి. దీంతో గ్రామీణ యువత మద్యం బారిన పడుతూ తమ భవిష్యత్తును నాశనం చేసుకుంటున్నారనే ఆవేదన తల్లిదండ్రుల నుంచి వ్యక్తమవుతోంది.

వేకువజాము నుంచి అర్ధరాత్రి వరకు మద్యం విక్రయాలు

ప్రభుత్వ అనుమతితో నడిచే మద్యం షాపులు ఉదయం 10 గంటల నుంచి రాత్రి 10 గంటల వరకు మాత్రమే కొనసాగాలి అనే నిబంధనలు ఉన్నప్పటికీ, బెల్ట్ షాపులు మాత్రం ఎలాంటి సమయ పరిమితులు లేకుండా 24 గంటలు మద్యం విక్రయాలు నిర్వహిస్తున్నాయనే విమర్శలు ఉన్నాయి. గాంధీ జయంతి, ఎన్నికల పోలింగ్ రోజు, ఓట్ల లెక్కింపు రోజు వంటి ప్రత్యేక సందర్భాల్లో కూడా అధికారిక మద్యం దుకాణాలు మూసివేస్తుండగా బెల్ట్ షాపులు మాత్రం యథేచ్ఛగా కొనసాగుతున్నాయనే ఆరోపణలు వినిపిస్తున్నాయి.

కొంతమంది మద్యం అలవాటు పడిన వారు ఉదయం నిద్రలేవగానే నేరుగా బెల్ట్ షాపులకు వెళ్లి “90 ఎంఎల్”తో రోజును ప్రారంభిస్తున్నారని గ్రామస్థులు చెబుతున్నారు. వ్యవసాయ పనులకు వెళ్లే కూలీలు, డ్రైవర్లు, యువకులు, కూలీ కార్మికులు ఇలా అనేక మంది రోజుకు పలుమార్లు మద్యం సేవిస్తూ ఆరోగ్యాన్ని పాడు చేసుకుంటున్నారు.

గల్లీ గల్లీకి బెల్ట్ షాపులు

కొడంగల్ నియోజకవర్గంలోని పలు మండలాల్లో గ్రామానికి వెళ్లిన ప్రతిచోటా బెల్ట్ షాపులు దర్శనమిస్తున్నాయని ప్రజలు చెబుతున్నారు. గ్రామాల్లో చిన్నచిన్న గుడిసెలు, పాన్ షాపులు, హోటళ్లు, కిరాణా దుకాణాలు కూడా మద్యం విక్రయ కేంద్రాలుగా మారిపోయాయి.

కొన్ని ప్రాంతాల్లో బహిరంగంగానే కుర్చీలు, టేబుళ్లు ఏర్పాటు చేసి బార్‌ల తరహాలో మద్యం సేవించే వాతావరణం కల్పిస్తున్నారని స్థానికులు ఆరోపిస్తున్నారు. పాఠశాలల సమీపంలో, కాలనీల వద్ద, ప్రధాన రహదారుల పక్కన కూడా మద్యం సేవించడం సాధారణమైపోయిందని ప్రజలు ఆందోళన వ్యక్తం చేస్తున్నారు.

అధిక ధరలకు మద్యం విక్రయాలు

ప్రభుత్వ మద్యం దుకాణాల్లో నిర్ణయించిన ధరలకు మద్యం విక్రయాలు జరుగుతుండగా, బెల్ట్ షాపుల నిర్వాహకులు మాత్రం అదనపు ధరలు వసూలు చేస్తున్నారని మందుబాబులు ఆరోపిస్తున్నారు. ఒక క్వార్టర్‌పై రూ.20 నుంచి రూ.50 వరకు అదనంగా తీసుకుంటున్నారని సమాచారం.

పండుగలు, శుభకార్యాలు, గ్రామోత్సవాలు, చావు కార్యక్రమాలు వంటి సందర్భాల్లో మద్యం డిమాండ్ పెరిగినప్పుడు మరింత అధిక ధరలకు విక్రయాలు జరుగుతున్నాయని చెబుతున్నారు. గ్రామీణ ప్రాంతాల్లో మద్యం సులభంగా దొరుకుతుండటంతో చాలామంది అప్పులు చేసి తాగుతున్నారని, కుటుంబాలు అప్పుల పాలవుతున్నాయని మహిళలు వాపోతున్నారు.

మైనర్లకూ మద్యం విక్రయాలా..?

ప్రభుత్వ నిబంధనల ప్రకారం 21 సంవత్సరాలు నిండని వారికి మద్యం విక్రయాలు చేయకూడదు. అయితే కొడంగల్ నియోజకవర్గంలోని పలు గ్రామాల్లో చిన్నపిల్లలకు, ఇంటర్ చదువుతున్న యువకులకు కూడా ఎలాంటి విచారణ లేకుండా మద్యం విక్రయాలు చేస్తున్నారనే ఆరోపణలు వినిపిస్తున్నాయి.

దీంతో యువత చెడు అలవాట్లకు గురై చదువులను నిర్లక్ష్యం చేస్తున్నారని తల్లిదండ్రులు ఆందోళన వ్యక్తం చేస్తున్నారు. గ్రామాల్లో సాయంత్రం వేళ యువకులు గుంపులుగా చేరి మద్యం సేవించడం పెరిగిపోవడంతో గొడవలు, అసాంఘిక కార్యకలాపాలు కూడా పెరుగుతున్నాయని ప్రజలు చెబుతున్నారు.

రోడ్డు ప్రమాదాలకు కారణమవుతున్న మద్యం

గ్రామాల్లో విచ్చలవిడిగా మద్యం లభించడంతో డ్రైవర్లు మద్యం సేవించి వాహనాలు నడుపుతున్న ఘటనలు పెరుగుతున్నాయని ప్రజలు చెబుతున్నారు. ట్రాక్టర్ డ్రైవర్లు, ఆటో డ్రైవర్లు, లారీ డ్రైవర్లు మద్యం సేవించి రోడ్లపైకి రావడంతో ప్రమాదాలు ఎక్కువవుతున్నాయని ఆరోపణలు ఉన్నాయి.

కొంతమంది మద్యం సేవిస్తూ రోడ్డు పక్కనే వాహనాలు ఆపి తాగడం, అనంతరం నిర్లక్ష్యంగా డ్రైవింగ్ చేయడం వల్ల ప్రమాదాలు చోటుచేసుకుంటున్నాయని గ్రామస్తులు చెబుతున్నారు. రాత్రి వేళల్లో మద్యం మత్తులో వాహనాలు నడపడం వల్ల నిరపరాధుల ప్రాణాలు ప్రమాదంలో పడుతున్నాయని ప్రజలు ఆవేదన వ్యక్తం చేస్తున్నారు.

కుటుంబాల్లో పెరుగుతున్న కలహాలు

మద్యం అలవాటు కారణంగా పేద కుటుంబాలు ఆర్థికంగా కుదేలవుతున్నాయని మహిళలు వాపోతున్నారు. రోజంతా కూలీ చేసి సంపాదించిన డబ్బంతా మద్యానికి ఖర్చు చేయడంతో ఇంట్లో పిల్లల చదువులు, ఆహారం, వైద్యం వంటి అవసరాలు నిర్లక్ష్యానికి గురవుతున్నాయని చెబుతున్నారు.

మద్యం మత్తులో భార్యలను వేధించడం, ఇంట్లో గొడవలు పెట్టడం, కుటుంబ సభ్యులపై దాడులు చేయడం వంటి ఘటనలు కూడా పెరుగుతున్నాయని సమాచారం. కొన్ని కుటుంబాల్లో భార్యాభర్తల మధ్య విభేదాలు పెరిగి విడాకుల వరకు వెళ్తున్నాయని గ్రామ పెద్దలు చెబుతున్నారు.