నల్గొండ సభలో సీఎం రేవంత్ రెడ్డి ఫైర్.. బీఆర్ఎస్, బీజేపీలపై తీవ్ర విమర్శలు

• “2024 నుంచి 2034 వరకు కాంగ్రెస్‌దే అధికారం.. మూసీ ప్రక్షాళన చేసి తీరుతా”

శ్రీ బల భీమ న్యూస్ / కొడంగల్ : జూన్ 28 :

రాష్ట్ర రాజకీయాల్లో సంచలన వ్యాఖ్యలకు వేదికగా మారిన నల్గొండ బహిరంగ సభలో ముఖ్యమంత్రి రేవంత్ రెడ్డి ప్రతిపక్ష బీఆర్ఎస్, బీజేపీ పార్టీలపై తీవ్ర స్థాయిలో విరుచుకుపడ్డారు. తెలంగాణ ఉద్యమ త్యాగాలు, రాష్ట్ర అభివృద్ధి, సంక్షేమ కార్యక్రమాలు, రైతు సంక్షేమం, మూసీ ప్రక్షాళన, ఎస్‌ఎల్‌బీసీ ప్రాజెక్టు వంటి అంశాలపై విస్తృతంగా మాట్లాడిన ఆయన, గత బీఆర్ఎస్ ప్రభుత్వ పాలనపై ఘాటు విమర్శలు గుప్పించారు.

రాష్ట్రంలో రూ.13 వేల కోట్ల వ్యయంతో 6,300 కిలోమీటర్ల ఆర్ అండ్ బీ రోడ్ల నిర్మాణానికి శంకుస్థాపన చేస్తున్నామని ప్రకటించిన సీఎం, తెలంగాణ తొలి ఉద్యమంలో కొండా లక్ష్మణ్ బాపూజీ చేసిన త్యాగాలను, మలి తెలంగాణ ఉద్యమంలో కోమటిరెడ్డి వెంకటరెడ్డి చేసిన సేవలను గుర్తు చేశారు. తెలంగాణ రాష్ట్ర సాధన కోసం కోమటిరెడ్డి మంత్రి పదవికి రాజీనామా చేసి, ఆమరణ నిరాహార దీక్ష చేపట్టారని, నల్గొండ ప్రజలు గర్వంగా చెప్పుకునే నాయకుడు కోమటిరెడ్డి అని కొనియాడారు.

“త్యాగాలు అంటే ఏమిటో ప్రజలకు తెలుసు”

బీఆర్ఎస్ నాయకులు త్యాగాల పేరుతో రాజకీయాలు చేస్తున్నారని విమర్శించిన సీఎం, “రాజీనామాలు చేసి ఎన్నికలు తెచ్చుకోవడం, విరాళాలు సేకరించడం మాత్రమే త్యాగమా?” అని ప్రశ్నించారు. శ్రీకాంతాచారి, కానిస్టేబుల్ కిష్టయ్య, యాదయ్య, ఇషాన్ రెడ్డి, వేణుగోపాల్ రెడ్డి వంటి తెలంగాణ అమరవీరుల త్యాగాలను ప్రజలు మరవలేరన్నారు.

“వంద రూపాయల పెట్రోల్ తెచ్చి, పది పైసల అగ్గిపెట్టె దొరకలేదని చెప్పినవారు పదేళ్లు మంత్రి పదవులు అనుభవించారు” అంటూ పరోక్షంగా బీఆర్ఎస్ నేతలపై వ్యంగ్యాస్త్రాలు సంధించారు.

“తెలంగాణను అప్పుల ఊబిలోకి నెట్టారు”

గత పదేళ్లలో తెలంగాణ రాష్ట్రాన్ని రూ.8.11 లక్షల కోట్ల అప్పుల్లో ముంచారని ఆరోపించిన సీఎం, రాష్ట్రాన్ని శతాబ్ద కాలానికి సరిపడా విధ్వంసం చేశారని విమర్శించారు. “బావా-బామ్మర్దులు తోడేళ్లలా తిరుగుతూ మళ్లీ అధికారం వస్తుందని కలలు కంటున్నారు. తెలంగాణ సమాజం వారి కుటుంబాన్ని శాశ్వతంగా సామాజిక బహిష్కరణ చేసింది” అని తీవ్ర వ్యాఖ్యలు చేశారు.

బీఆర్ఎస్ పార్టీని రాజకీయంగా పూర్తిగా నిర్వీర్యం చేశామని, నల్గొండ ప్రజలు ఆ పార్టీకి భవిష్యత్తు లేదని స్పష్టం చేశారని అన్నారు. సూర్యాపేటలో మిగిలిన ఒక్క నాయకుడిని కూడా ప్రజలు తిరస్కరిస్తారని వ్యాఖ్యానించారు.

అసెంబ్లీలో చర్చకు సిద్ధం

బీఆర్ఎస్, బీజేపీ, కాంగ్రెస్ ప్రభుత్వాల పాలనపై ప్రత్యేక అసెంబ్లీ, శాసనమండలి సమావేశాలు నిర్వహించి చర్చించేందుకు తమ ప్రభుత్వం సిద్ధంగా ఉందని సీఎం ప్రకటించారు. గత పదేళ్ల బీఆర్ఎస్ పాలన, కేంద్రంలో 12 ఏళ్ల బీజేపీ పాలన, తమ రెండున్నరేళ్ల కాంగ్రెస్ పాలనపై సమగ్ర చర్చ జరగాలని పిలుపునిచ్చారు.

“ఎవరు ఏం చేశారో ప్రజల ముందు, అసెంబ్లీ వేదికగా తేల్చుకుందాం. ప్రతిపక్షాలు స్పీకర్, కౌన్సిల్ ఛైర్మన్‌కు లేఖ రాయాలి” అని సూచించారు.

మహిళా సంక్షేమంపై వ్యాఖ్యలు

గత ప్రభుత్వం ఐదేళ్లలో ఒక్క మహిళకు కూడా మంత్రి పదవి ఇవ్వలేదని ఆరోపించిన సీఎం, తమ ప్రభుత్వం మహిళల సంక్షేమానికి పెద్దపీట వేస్తోందని తెలిపారు. పండుగల సందర్భంగా ప్రభుత్వం అందిస్తున్న చీరల్లో మహిళలు పాలపిట్టల్లా కనిపిస్తున్నారని వ్యాఖ్యానించారు.

రేషన్ కార్డులు, సన్నబియ్యం పంపిణీపై వివరాలు

గత పదేళ్లలో ఒక్క రేషన్ కార్డు కూడా ఇవ్వలేదని ఆరోపించిన సీఎం, తమ ప్రభుత్వం లక్షలాది రేషన్ కార్డులు మంజూరు చేసిందని చెప్పారు. రూ.16 వేల కోట్ల వ్యయంతో 3.28 కోట్ల మందికి ఒక్కొక్కరికి 6 కిలోల చొప్పున సన్నబియ్యం అందిస్తున్నామని తెలిపారు.

“ఫామ్ హౌస్‌లో ఉన్నవారు ఏ బియ్యం తింటున్నారో, పేదల పిల్లలు కూడా అదే బియ్యం తింటున్నారు” అని పేర్కొన్నారు.

ఇందిరమ్మ ఇళ్లు పేదల ఆత్మగౌరవం

పేదల కోసం నాలుగున్నర లక్షల ఇందిరమ్మ ఇళ్లను మంజూరు చేశామని సీఎం వెల్లడించారు. గత ప్రభుత్వం పదేళ్లలో ఇళ్లు నిర్మించి ఉంటే 25 లక్షల మంది పేదలకు ఇళ్లు వచ్చేవని అన్నారు. “ఫామ్ హౌస్‌ల గురించి కలలు కన్నారే కానీ, పేదల ఇళ్ల గురించి ఆలోచించలేదు” అని విమర్శించారు.

రైతుల కోసం రూ.1.56 లక్షల కోట్లు

రైతు రుణమాఫీ, రైతు భరోసా, రైతు బోనస్ తదితర పథకాల కోసం రూ.1.56 లక్షల కోట్లు ఖర్చు చేశామని సీఎం తెలిపారు. రాష్ట్రంలో 80 లక్షల మెట్రిక్ టన్నుల ధాన్యం కొనుగోలు చేసి రికార్డు సృష్టించామని పేర్కొన్నారు.

కాళేశ్వరం ప్రాజెక్టుపై విమర్శలు చేస్తూ, “లక్ష కోట్లతో నిర్మించిన కాళేశ్వరం ఇప్పుడు కూలేశ్వరం అయింది” అని వ్యాఖ్యానించారు.

విద్య, ఉద్యోగాలపై కీలక ప్రకటనలు

ప్రభుత్వ పాఠశాలల్లో నర్సరీ నుంచి 12వ తరగతి వరకు విద్యా వ్యవస్థను ప్రవేశపెడుతున్నామని తెలిపారు. దళితులు, ఆదివాసీలు, గిరిజనులు, పేద పిల్లలకు నాణ్యమైన విద్య అందించడమే లక్ష్యమని చెప్పారు.

గత 30 నెలల్లో 70 వేల ప్రభుత్వ ఉద్యోగాలను భర్తీ చేశామని, నిరుద్యోగుల ఆత్మగౌరవాన్ని నిలబెట్టామని వెల్లడించారు. శతాబ్ద కాలంగా పెండింగ్‌లో ఉన్న ఎస్సీ వర్గీకరణ సమస్యకు శాశ్వత పరిష్కారం చూపామని పేర్కొన్నారు.

మూసీ ప్రక్షాళన, ఎస్‌ఎల్‌బీసీపై స్పష్టత

మూసీ నది కాలుష్యం వల్ల నల్గొండ ప్రాంత ప్రజలు తీవ్ర ఇబ్బందులు పడుతున్నారని, అందుకే మూసీ ప్రక్షాళన కార్యక్రమాన్ని చేపట్టామని సీఎం తెలిపారు. “మూసీ ప్రక్షాళనకు ఎవరు అడ్డువచ్చినా వెనక్కి తగ్గేది లేదు” అని స్పష్టం చేశారు.

అలాగే, పదేళ్లుగా నిర్లక్ష్యానికి గురైన ఎస్‌ఎల్‌బీసీ ప్రాజెక్టును పూర్తి చేసి మూడు లక్షల ఎకరాలకు సాగునీరు అందిస్తామని చెప్పారు. వచ్చే ఎన్నికల నాటికి ఎస్‌ఎల్‌బీసీ పనులు పూర్తి చేస్తామని హామీ ఇచ్చారు.

“2034 వరకు కాంగ్రెస్‌దే అధికారం”

ప్రసంగం ముగింపులో సీఎం రేవంత్ రెడ్డి, “2024 నుంచి 2034 వరకు తెలంగాణలో కాంగ్రెస్ పార్టీ అధికారంలో ఉంటుంది. ప్రజా పాలన కొనసాగుతుంది. ప్రజలు అభివృద్ధి, సంక్షేమాన్ని కోరుకుంటున్నారు. అబద్ధాల రాజకీయాలకు తెలంగాణలో స్థానం లేదు” అని స్పష్టం చేశారు. ఆయన ప్రసంగం సందర్భంగా కాంగ్రెస్ కార్యకర్తలు, నాయకులు భారీగా హర్షధ్వానాలు చేశారు.