నంబర్ ఒక్కటే.. లారీలు రెండు..!

• ఆంధ్ర టు కొడంగల్ అక్రమ ఇసుక రవాణాకు తెరలేపుతున్న వ్యాపారులు
• పోలీసుల కనుసైగల్లోనే సాగుతున్న అక్రమ ఇసుక దందా..?
• ఆర్టీవో సీజ్ చేసిన 24 గంటల్లోనే అదే నెంబర్‌తో మరో లారీ ప్రత్యక్షం
• ఆందోళన వ్యక్తం చేసిన లారీ అసోసియేషన్ సభ్యులు – తహసీల్దార్‌కు వినతిపత్రం

శ్రీ బల భీమ న్యూస్ / కొడంగల్, జూలై 2:

కొడంగల్ పట్టణంలో అక్రమ ఇసుక రవాణా వ్యవహారం రోజురోజుకు సంచలనంగా మారుతోంది. ఒకే నెంబర్ ప్లేట్‌తో రెండు వేర్వేరు లారీలు అక్రమ ఇసుక రవాణాకు పాల్పడుతున్నాయనే ఆరోపణలు ప్రస్తుతం స్థానికంగా తీవ్ర చర్చనీయాంశంగా మారాయి. ముఖ్యంగా, ఆర్టీవో అధికారులు భారీ జరిమానా విధించి సీజ్ చేసిన లారీ నెంబర్‌తోనే కేవలం 24 గంటల వ్యవధిలో మరో లారీ అక్రమ ఇసుక రవాణాలో కనిపించడం పలు అనుమానాలకు తావిస్తోంది.

వివరాల్లోకి వెళ్తే, ఆంధ్రప్రదేశ్‌కు చెందిన కొందరు అక్రమ ఇసుక వ్యాపారులు, కొడంగల్‌కు చెందిన కొంతమంది స్థానిక వ్యాపారులతో చేతులు కలిపి భారీ స్థాయిలో అక్రమ ఇసుక రవాణా వ్యాపారాన్ని కొనసాగిస్తున్నట్లు ఆరోపణలు వెల్లువెత్తుతున్నాయి. ఈ అక్రమ రవాణాకు రాజకీయ అండదండలు, అధికారుల సహకారం కూడా ఉన్నట్లు స్థానిక వర్గాలు పేర్కొంటున్నాయి. ఆంధ్రప్రదేశ్ నుంచి తెలంగాణలోని కొడంగల్ ప్రాంతానికి ఎలాంటి సరైన అనుమతులు లేకుండానే ఇసుకను తరలించి, స్థానిక డంపింగ్ యార్డుల్లో నిల్వ చేస్తున్నట్లు సమాచారం.

ఈ వ్యవహారంలో అత్యంత సంచలనంగా మారిన అంశం ఏమిటంటే, రెండు రోజుల క్రితం ఆంధ్రప్రదేశ్‌కు చెందిన AP 39 WE 1346 నెంబర్ గల లారీ తాండూర్ రోడ్డులోని ఒక డంపింగ్ యార్డులో ఎలాంటి సరైన బిల్లులు, అనుమతులు లేకుండానే ఇసుకను అన్‌లోడ్ చేస్తుండగా, కొడంగల్ లారీ అసోసియేషన్ సభ్యులు గుర్తించి అడ్డుకోవడం జరిగింది. అనంతరం వారు ఈ విషయాన్ని స్థానిక పోలీసుల దృష్టికి తీసుకెళ్లినట్లు తెలిపారు.

అయితే, ఈ సందర్భంగా పోలీసులు జోక్యం చేసుకుని, ఆ లారీకి అన్ని అనుమతులు ఉన్నాయని, లారీని వదిలేయాలని లారీ అసోసియేషన్ సభ్యులపై ఒత్తిడి తెచ్చినట్లు వారు ఆరోపిస్తున్నారు. దీంతో అసంతృప్తి చెందిన లారీ అసోసియేషన్ సభ్యులు నేరుగా ఆర్టీవో అధికారులకు ఫిర్యాదు చేయగా, వారు రంగంలోకి దిగి సంబంధిత పత్రాలను పరిశీలించారు. అనంతరం ఆ లారీకి సరైన అనుమతులు లేవని నిర్ధారించి, సుమారు రూ.1,75,000 భారీ జరిమానా విధించి కేసు నమోదు చేసినట్లు సమాచారం.

అయితే ఈ ఘటన మరుగునపడకముందే, ఆర్టీవో అధికారులు సీజ్ చేసిన లారీ నెంబర్ ప్లేట్‌తోనే మరుసటి రోజున మరో లారీ అక్రమ ఇసుక రవాణాలో కనిపించడం స్థానికంగా సంచలనం సృష్టించింది. ఈ విషయాన్ని గమనించిన లారీ అసోసియేషన్ సభ్యులు మరోసారి డంపింగ్ యార్డుకు వెళ్లి పరిశీలించగా, పట్టుబడిన లారీ నెంబర్ ప్లేట్‌ను మరో లారీకి అమర్చి ఇసుక డంపింగ్ చేస్తున్నట్లు గుర్తించినట్లు వారు వెల్లడించారు.

దీంతో వెంటనే స్థానిక పోలీసులకు సమాచారం అందించినప్పటికీ, పోలీసులు ఆలస్యంగా వచ్చారని, అంతేకాకుండా తమతో దురుసుగా ప్రవర్తించారని లారీ అసోసియేషన్ సభ్యులు ఆరోపించారు. ఈ సందర్భంగా స్థానిక ఎస్సై వ్యవహారశైలిపై వారు తీవ్ర అసంతృప్తి వ్యక్తం చేశారు. ఆంధ్రప్రదేశ్ నుంచి అక్రమంగా వస్తున్న ఇసుక రవాణాలో కొందరు అధికారులకు సంబంధాలున్నాయా అనే అనుమానాలను కూడా వారు వ్యక్తం చేశారు.

లారీ అసోసియేషన్ సభ్యుల ప్రకారం, తెలంగాణలో ప్రభుత్వ అనుమతులతో, అధికారిక బిల్లులు మరియు రవాణా అనుమతులతో ఇసుక రవాణా చేస్తున్న వ్యాపారులు తీవ్ర నష్టాలను ఎదుర్కొంటున్నారని తెలిపారు. ప్రభుత్వ నిబంధనలు పాటిస్తూ వ్యాపారం చేస్తున్న వారిని ఇలాంటి అక్రమ రవాణాదారులు మోసం చేస్తున్నారని, ఇది చట్టవ్యతిరేక చర్య మాత్రమే కాకుండా ప్రభుత్వ ఆదాయానికి కూడా భారీ నష్టం కలిగిస్తోందని వారు ఆరోపించారు.

ఈ నేపథ్యంలో, లారీ అసోసియేషన్ అధ్యక్షుడు బాల్‌రెడ్డి ఆధ్వర్యంలో సభ్యులందరూ సమావేశమై, అక్రమ ఇసుక రవాణాను పూర్తిగా అరికట్టాలని డిమాండ్ చేశారు. ముఖ్యంగా తాండూర్ రోడ్డులోని డంపింగ్ యార్డును వెంటనే సీజ్ చేయాలని, అక్రమ ఇసుక వ్యాపారంలో పాల్గొంటున్న వారిపై కఠిన చర్యలు తీసుకోవాలని, ఒకే నెంబర్ ప్లేట్‌తో రెండు లారీలు ఎలా నడుస్తున్నాయో సమగ్ర విచారణ జరపాలని డిమాండ్ చేస్తూ తహసీల్దార్ రాంబాబుకు వినతిపత్రాన్ని సమర్పించారు.

ఈ సందర్భంగా తహసీల్దార్ రాంబాబు స్పందిస్తూ, లారీ అసోసియేషన్ సభ్యుల ఫిర్యాదును పరిశీలించి, వెంటనే సంబంధిత శాఖలతో విచారణ జరిపించి తగిన చర్యలు తీసుకుంటామని హామీ ఇచ్చినట్లు లారీ అసోసియేషన్ సభ్యులు తెలిపారు.

ఇక కొడంగల్ ప్రాంతంలో జరుగుతున్న అక్రమ ఇసుక రవాణాపై అధికారులు సమగ్ర దర్యాప్తు చేపట్టాలనే డిమాండ్ ప్రజల నుంచి కూడా వ్యక్తమవుతోంది. ఒకే నెంబర్ ప్లేట్‌తో రెండు లారీలు ఎలా సంచరిస్తున్నాయి? దీనికి వెనుక ఉన్న అసలు సూత్రధారులు ఎవరు? అధికారుల పాత్ర ఏమిటి? అనే అంశాలపై పూర్తి స్థాయి విచారణ జరిపి, బాధ్యులపై కఠిన చర్యలు తీసుకోవాలని ప్రజలు కోరుతున్నారు.