ఏసీబీ వలలో జలమండలి తిమింగలం

• కుప్పలుతెప్పలుగా నోట్ల కట్టలు.. విస్తుపోయే ఆస్తులు..!
• హైదరాబాద్‌లో సంచలనం సృష్టించిన ఏసీబీ దాడులు
•  కోట్ల ఆస్తుల బాగోతం బట్టబయలు

శ్రీ బల భీమ న్యూస్ / కొడంగల్ :

హైదరాబాద్ నగరంలో అవినీతి నిరోధక శాఖ (ఏసీబీ) మరో భారీ అవినీతి అధికారిని పట్టుకుని సంచలనం సృష్టించింది. ఆదాయానికి మించిన ఆస్తులు కూడబెట్టారన్న ఆరోపణలతో హైదరాబాద్ మెట్రోపాలిటన్ వాటర్ సప్లై అండ్ సీవరేజ్ బోర్డు (జలమండలి)లో కీలక బాధ్యతలు నిర్వహిస్తున్న జనరల్ మేనేజర్ ఎస్. అనంత లక్ష్మి కుమార్ నివాసాలపై ఏసీబీ అధికారులు మెరుపు దాడులు నిర్వహించారు. ఈ దాడుల్లో బయటపడిన నగదు, ఆస్తుల వివరాలు అధికారులను సైతం విస్తుపోయేలా చేశాయి.

మంగళవారం తెల్లవారుజాము నుంచే ఏసీబీ అధికారులు ప్రత్యేక బృందాలుగా విడిపోయి హైదరాబాద్‌లోని పలు ప్రాంతాల్లో ఏకకాలంలో సోదాలు చేపట్టారు. మల్లాపూర్‌లోని వెంకటరమణ కాలనీలో ఉన్న అనంత లక్ష్మి కుమార్ నివాసంతో పాటు ఆయన బంధువులు, సన్నిహితులకు చెందిన మొత్తం ఎనిమిది ప్రాంతాల్లో తనిఖీలు కొనసాగించగా భారీగా అక్రమ ఆస్తుల ఆధారాలు లభించాయి.

జలమండలిలో ప్రాజెక్ట్ డివిజన్-8, రెడ్ హిల్స్‌లో జనరల్ మేనేజర్ (ఇంజనీరింగ్)గా పనిచేస్తున్న కుమార్ తన అధికారాన్ని అడ్డం పెట్టుకుని కోట్లాది రూపాయల అక్రమ ఆస్తులు కూడబెట్టారన్న విశ్వసనీయ సమాచారం ఆధారంగా ఈ దాడులు నిర్వహించినట్లు ఏసీబీ వర్గాలు వెల్లడించాయి. ఏసీబీ డీఎస్పీ మజీద్ అలీ ఖాన్ ఆధ్వర్యంలో జరిగిన ఈ ఆపరేషన్ నగరవ్యాప్తంగా చర్చనీయాంశంగా మారింది.

ఇంట్లోనే రూ.1 కోటి నగదు..!

తనిఖీల సమయంలో కుమార్ నివాసంలో లభించిన నగదు చూసి ఏసీబీ అధికారులు షాక్‌కు గురయ్యారు. ఇంట్లోని బీరువాలు, గదుల్లో కుప్పలుగా నిల్వ చేసిన నోట్ల కట్టలు బయటపడినట్లు సమాచారం. ప్రాథమిక అంచనాల ప్రకారం కేవలం నివాసం నుంచే సుమారు రూ.1 కోటి నగదు స్వాధీనం చేసుకున్నట్లు తెలిసింది. నగదు పరిమాణం అధికంగా ఉండటంతో కౌంటింగ్ మెషీన్లను ప్రత్యేకంగా తెప్పించి లెక్కింపు చేపట్టినట్లు సమాచారం.

అంతేకాకుండా పలు బ్యాంక్ ఖాతాలకు సంబంధించిన డాక్యుమెంట్లు, స్థిరాస్తుల రిజిస్ట్రేషన్ పత్రాలు, విలువైన బంగారు ఆభరణాలు, పెట్టుబడుల వివరాలు కూడా ఏసీబీ స్వాధీనం చేసుకుంది. హైదరాబాద్ పరిసర ప్రాంతాలతో పాటు ఇతర జిల్లాల్లోనూ భూములు, ప్లాట్లు కొనుగోలు చేసినట్లు అనుమానాలు వ్యక్తమవుతున్నాయి.

బంధువుల ఇళ్లలోనూ సోదాలు

కేవలం అధికారిక నివాసమే కాకుండా ఆయనకు సంబంధించిన బంధువులు, సన్నిహితుల ఇళ్లలో కూడా ఏసీబీ బృందాలు సోదాలు నిర్వహిస్తున్నాయి. అక్రమ సంపాదనను బినామీ పేర్లతో దాచిపెట్టిన అవకాశాలపై అధికారులు దర్యాప్తు ముమ్మరం చేశారు. సోదాలు ఇంకా కొనసాగుతున్న నేపథ్యంలో బయటపడే ఆస్తుల విలువ మరింత పెరిగే అవకాశముందని అధికారులు భావిస్తున్నారు.

ప్రభుత్వ శాఖల్లో హాట్ టాపిక్

ప్రభుత్వ శాఖలో కీలక పదవిలో కొనసాగుతూ భారీగా అక్రమ సంపాదన చేసిన ఈ ఘటన ఇప్పుడు రాష్ట్రవ్యాప్తంగా చర్చనీయాంశంగా మారింది. ఒక సాధారణ ప్రభుత్వ ఉద్యోగి ఇంత భారీ స్థాయిలో ఆస్తులు ఎలా కూడబెట్టగలిగాడన్న ప్రశ్నలు వ్యక్తమవుతున్నాయి. జలమండలిలో జరుగుతున్న అవినీతి వ్యవహారాలపై కూడా అనుమానాలు వ్యక్తమవుతున్నాయి.

త్వరలో అధికారిక ప్రకటన

సోదాలు పూర్తయ్యాక స్వాధీనం చేసుకున్న నగదు, బంగారం, స్థిరాస్తుల మొత్తం విలువపై ఏసీబీ అధికారులు అధికారిక ప్రకటన విడుదల చేయనున్నారు. అక్రమ ఆస్తుల కేసులో అనంత లక్ష్మి కుమార్‌పై మరిన్ని చట్టపరమైన చర్యలు తీసుకునే అవకాశముంది. ఈ ఘటనతో ప్రభుత్వ అధికారుల్లో ఒక్కసారిగా కలకలం రేగింది.