కోటి మంది ఆడబిడ్డలను కోటీశ్వరులుగా తీర్చిదిద్దడమే నా లక్ష్యం!

• మహిళల ఆర్థిక స్వావలంబనకు ప్రజా ప్రభుత్వం పెద్దపీట – ముఖ్యమంత్రి రేవంత్ రెడ్డి
• మహిళా సంఘాల సభ్యులతో ముఖాముఖిలో కీలక ప్రకటన.. 2034 నాటికి కోటి మంది మహిళలను కోటీశ్వరులుగా తీర్చిదిద్దుతామని హామీ
• హకీంపేటలో పింఛన్ల పంపిణీ, మహిళా సంఘాలతో ఆత్మీయ సమావేశం.. పలు అభివృద్ధి పనులకు ప్రారంభోత్సవాలు

శ్రీ బల భీమ న్యూస్ / కొడంగల్ , నవంబర్ 08 :

కోటి మంది ఆడబిడ్డలను కోటీశ్వరులుగా తీర్చిదిద్దడమే తన ప్రధాన లక్ష్యమని, మహిళలు ఆర్థికంగా బలపడటంతో పాటు వ్యాపారవేత్తలుగా, పారిశ్రామికవేత్తలుగా ఎదగాలని రాష్ట్ర ముఖ్యమంత్రి ఎనుముల రేవంత్ రెడ్డి ఆకాంక్షించారు. మహిళల ఆర్థిక స్వావలంబన, సామాజిక భద్రత, కుటుంబాల అభ్యున్నతికి ప్రజా ప్రభుత్వం ప్రత్యేక ప్రాధాన్యతనిస్తూ ముందుకు సాగుతోందని స్పష్టం చేశారు. మహిళల ఆశీర్వాదంతోనే తాను ఈ స్థాయికి ఎదిగానని, వారి అభివృద్ధి కోసం తన శక్తివంచన లేకుండా కృషి చేస్తానని ముఖ్యమంత్రి భరోసా ఇచ్చారు.

కొడంగల్ నియోజకవర్గంలో ముఖ్యమంత్రి ఎనుముల రేవంత్ రెడ్డి చేపట్టిన మూడు రోజుల పర్యటనలో భాగంగా ఆదివారం దుద్యాల్ మండలం హకీంపేటలోని సెమినార్ ప్రాంగణంలో నిర్వహించిన పింఛన్ల పంపిణీ కార్యక్రమం, మహిళా స్వయం సహాయక సంఘాల సభ్యులతో ముఖాముఖి సమావేశంలో ఆయన పాల్గొన్నారు. ఈ సందర్భంగా మహిళలతో నేరుగా మాట్లాడి వారి సమస్యలు, అభిప్రాయాలు, ఆర్థిక అభివృద్ధికి సంబంధించిన అంశాలను తెలుసుకున్నారు. మహిళా సంఘాల సభ్యులు పెద్ద సంఖ్యలో పాల్గొన్న ఈ సమావేశం పండుగ వాతావరణాన్ని తలపించింది.

ప్రజలే నా కుటుంబం.. ఆడబిడ్డల ఆశీర్వాదమే నా బలం

ఈ సందర్భంగా ముఖ్యమంత్రి రేవంత్ రెడ్డి మాట్లాడుతూ.. ప్రజలే తన కుటుంబమని, ప్రజలే తన ఆత్మబంధువులని భావిస్తున్నానన్నారు. ముఖ్యంగా తెలంగాణ ఆడబిడ్డల ఆశీర్వాదంతోనే తాను ఈ ఉన్నత స్థానానికి చేరుకున్నానని పేర్కొన్నారు. తాను అడిగిన దానికంటే ఎక్కువగా ప్రజలు తనకు అందించారని, ఇక జీవితంలో తాను ఆశించేది ఏమీ లేదని భావోద్వేగంగా మాట్లాడారు.

ఆడబిడ్డల ఆశీర్వాదమే తనకు కొండంత బలమని, అందుకే తన జన్మదిన వేడుకలను వారి మధ్య జరుపుకోవాలని కొడంగల్‌కు వచ్చినట్లు తెలిపారు. దీపావళి పండుగ ఉన్నప్పటికీ తనకు జన్మదిన శుభాకాంక్షలు తెలియజేయడానికి పెద్ద సంఖ్యలో తరలివచ్చిన మహిళలందరికీ హృదయపూర్వక ధన్యవాదాలు తెలిపారు. ఈ జన్మదినాన్ని తన ఆడబిడ్డలకు అంకితం చేస్తున్నానని ప్రకటించారు.

2034 నాటికి కోటి మంది మహిళలను కోటీశ్వరులుగా తీర్చిదిద్దుతాం

రాష్ట్రంలో మహిళా స్వయం సహాయక సంఘాల ద్వారా మహిళల ఆర్థికాభివృద్ధికి ప్రభుత్వం విస్తృతంగా చర్యలు చేపడుతోందని ముఖ్యమంత్రి వెల్లడించారు. ప్రస్తుతం సుమారు 70 లక్షల మంది మహిళలు స్వయం సహాయక సంఘాల్లో సభ్యులుగా ఉన్నారని, 2034 నాటికి ఈ సంఖ్యను కోటికి చేర్చడంతో పాటు కోటి మంది మహిళలను కోటీశ్వరులుగా తీర్చిదిద్దడమే ప్రభుత్వ సంకల్పమని స్పష్టం చేశారు.

కుటుంబంలోని ప్రతి ఒక్కరి అవసరాలను ఎలాంటి స్వార్థం లేకుండా చూసుకునేది మహిళేనని, ఆడబిడ్డ చేతిలో కుటుంబ బాధ్యతలు ఉంటేనే ఆ కుటుంబం అభివృద్ధి చెందుతుందని అన్నారు. మహిళలకు ఆర్థిక స్వాతంత్ర్యం కల్పిస్తే కుటుంబాలతో పాటు సమాజం, రాష్ట్రం కూడా అభివృద్ధి చెందుతాయని పేర్కొన్నారు.

మహిళలను కేవలం సంక్షేమ పథకాల లబ్ధిదారులుగా మాత్రమే కాకుండా ఆర్థిక కార్యకలాపాల్లో భాగస్వాములుగా, ఉత్పత్తిదారులుగా, వ్యాపారవేత్తలుగా తీర్చిదిద్దేందుకు ప్రభుత్వం కృషి చేస్తోందన్నారు.

మహిళలకు ఉపాధి.. వ్యాపార అవకాశాలు

మహిళలకు ఉపాధి కల్పించడమే కాకుండా స్వయం ఉపాధి అవకాశాలను పెంపొందించేందుకు అనేక కార్యక్రమాలు అమలు చేస్తున్నామని ముఖ్యమంత్రి తెలిపారు. ప్రభుత్వ పాఠశాలల్లో విద్యార్థులకు అవసరమైన యూనిఫామ్‌ల కుట్టు పనులను మహిళా సంఘాలకు అప్పగించడం ద్వారా వారికి ఉపాధి కల్పిస్తున్నామని చెప్పారు.

ప్రతి సంవత్సరం మహిళలు రూ.15 కోట్ల నుంచి రూ.20 కోట్ల వరకు వ్యాపార కార్యకలాపాలు నిర్వహించే స్థాయికి ఎదుగుతున్నారని వివరించారు. మహిళలను పెట్రోల్ బంకుల నిర్వహణలో, సోలార్ విద్యుత్ ఉత్పత్తి రంగంలో భాగస్వాములను చేస్తున్నామని తెలిపారు.

రాష్ట్ర సచివాలయంతో పాటు వివిధ ప్రభుత్వ కార్యాలయాల్లో ఇందిరమ్మ క్యాంటీన్ల నిర్వహణ బాధ్యతలను మహిళా సంఘాలకు అప్పగించడం ద్వారా వారికి స్థిరమైన ఆదాయ మార్గాలను కల్పిస్తున్నామని చెప్పారు. మహిళలు కేవలం ఇంటి పనులకే పరిమితం కాకుండా వ్యాపార రంగంలోనూ తమ సత్తా చాటాలని ఆకాంక్షించారు.

34 నెలల్లో రూ.79 వేల కోట్ల బ్యాంకు లింకేజీ రుణాలు

మహిళా సంఘాల ఆర్థిక బలోపేతానికి బ్యాంకు లింకేజీ రుణాలు కీలకంగా ఉపయోగపడుతున్నాయని ముఖ్యమంత్రి తెలిపారు. గత 34 నెలల్లో మహిళా సంఘాలకు రూ.79 వేల కోట్ల బ్యాంకు లింకేజీ రుణాలు అందించినట్లు వెల్లడించారు. ఈ రుణాలను సద్వినియోగం చేసుకొని మహిళలు చిన్నచిన్న వ్యాపారాల నుంచి పెద్ద పారిశ్రామిక కార్యకలాపాల వరకు విస్తరించాలని సూచించారు.

మహిళలు ఆర్థికంగా ఎదిగితే వారి పిల్లలకు మెరుగైన విద్య, కుటుంబానికి మెరుగైన జీవన ప్రమాణాలు, సమాజానికి అభివృద్ధి సాధ్యమవుతుందని పేర్కొన్నారు.

4.5 లక్షల కొత్త పింఛన్లు.. మహిళలకు పెద్దపీట

రాష్ట్ర ప్రభుత్వం కొత్తగా 4.5 లక్షల పింఛన్లు మంజూరు చేయగా, వాటిలో సుమారు 3.5 లక్షల పింఛన్లు ఒంటరి మహిళలు, వితంతు మహిళలకు కేటాయించినట్లు ముఖ్యమంత్రి వెల్లడించారు. మహిళలకు సామాజిక భద్రత కల్పించాలనే ఉద్దేశంతో ఈ నిర్ణయం తీసుకున్నట్లు తెలిపారు.

ఈ సందర్భంగా మహిళా సంక్షేమం కోసం కృషి చేస్తున్న మంత్రి సీతక్కను ముఖ్యమంత్రి ప్రత్యేకంగా అభినందించారు. నేత, గీత కార్మికులకు కూడా కొత్త పింఛన్లను సాచ్యురేషన్ విధానంలో మంజూరు చేస్తున్నామని తెలిపారు.

మహిళల పేరుపై ఇందిరమ్మ ఇళ్లు.. రేషన్ కార్డులు

మహిళలకు కుటుంబంలో గౌరవప్రదమైన స్థానం కల్పించడంతో పాటు ఆర్థిక భద్రత కల్పించాలనే లక్ష్యంతో మహిళల పేరుపై ఇందిరమ్మ ఇళ్లు, రేషన్ కార్డులు అందిస్తున్నామని ముఖ్యమంత్రి పేర్కొన్నారు. అర్హులైన కుటుంబాలకు 200 యూనిట్ల వరకు ఉచిత విద్యుత్ అందిస్తున్నామని తెలిపారు.

మహిళల సంక్షేమానికి ప్రభుత్వం అమలు చేస్తున్న పథకాలు వారి జీవితాల్లో మార్పు తీసుకొస్తున్నాయని చెప్పారు. మహిళలకు ఆర్థిక భద్రత కల్పించడమే కాకుండా సమాజంలో గౌరవం, ఆత్మవిశ్వాసం పెంపొందించడమే తమ ప్రభుత్వ లక్ష్యమని వివరించారు.

ప్రతిరోజూ 37 లక్షల మంది మహిళలకు ఉచిత బస్సు ప్రయాణం

మహిళల ప్రయాణ భారాన్ని తగ్గించేందుకు రాష్ట్ర ప్రభుత్వం ఉచిత బస్సు ప్రయాణ సౌకర్యాన్ని కల్పించిందని ముఖ్యమంత్రి గుర్తు చేశారు. రాష్ట్రవ్యాప్తంగా ప్రతిరోజూ సుమారు 37 లక్షల మంది మహిళలు ఆర్టీసీ బస్సుల్లో ఉచితంగా ప్రయాణిస్తున్నారని తెలిపారు.

మహిళలకు ఉచిత ప్రయాణ సౌకర్యం కల్పించేందుకు ఇప్పటివరకు ఆర్టీసీకి రూ.13 వేల కోట్లు చెల్లించామని, ఈ చర్యలతో ఆర్టీసీ సంస్థను లాభాల బాటలోకి తీసుకువచ్చేందుకు ప్రభుత్వం కృషి చేసిందని పేర్కొన్నారు.

సన్న బియ్యం పంపిణీ ప్రజా ప్రభుత్వ ఘనత

పేద ప్రజలకు నాణ్యమైన ఆహారం అందించాలనే లక్ష్యంతో రాష్ట్ర ప్రభుత్వం సన్న బియ్యం పంపిణీ కార్యక్రమాన్ని అమలు చేస్తోందని ముఖ్యమంత్రి తెలిపారు. గతంలో ఏ ముఖ్యమంత్రికి సన్న బియ్యం పంపిణీ చేయాలనే ఆలోచన రాలేదని, ప్రజా ప్రభుత్వం అధికారంలోకి వచ్చిన తర్వాత పేదలకు సన్న బియ్యం అందిస్తున్నామని పేర్కొన్నారు.

బిడ్డలను బాగా చదివించండి.. చదువే జీవితాలను మారుస్తుంది

మహిళా సంఘాల సభ్యులకు ముఖ్యమంత్రి ప్రత్యేకంగా విద్య ప్రాధాన్యతను వివరించారు. తల్లులు తమ పిల్లలను ఉన్నత చదువులు చదివించాలని, తాము ఎదుర్కొన్న కష్టాలను తమ పిల్లలు ఎదుర్కోకుండా చూడాలని సూచించారు. చదువే జీవితాలను మార్చగలిగే గొప్ప ఆయుధమని పేర్కొన్నారు.

మీ పిల్లల చదువులపై మీకు ఎంత శ్రద్ధ ఉందో తనకు కూడా అంతే శ్రద్ధ ఉందని చెప్పారు. ఆడబిడ్డలను ఉన్నత చదువులు చదివిస్తామని తన జన్మదినం సందర్భంగా మాట ఇవ్వాలని మహిళలను కోరారు. పిల్లల విద్యాభివృద్ధికి తమ ప్రభుత్వం అన్ని విధాలుగా అండగా నిలుస్తుందని హామీ ఇచ్చారు.

మహిళలు వ్యాపారవేత్తలుగా, పారిశ్రామికవేత్తలుగా ఎదగాలని, ఆర్థికంగా ఎవరి మీదా ఆధారపడకుండా స్వతంత్రంగా జీవించే స్థాయికి చేరుకోవాలని ఆకాంక్షించారు. తాను ముఖ్యమంత్రిగా ఉన్న సమయంలోనే కోటి మంది మహిళలను కోటీశ్వరులుగా తీర్చిదిద్దగలిగితే తన జన్మ ధన్యమవుతుందని భావోద్వేగంగా వ్యాఖ్యానించారు.

మీ అన్నగా, మీ తమ్ముడిగా ప్రజలకు సేవ చేసే అవకాశాన్ని దేవుడు తనకు కల్పించాడని, ఆ అవకాశాన్ని సద్వినియోగం చేసుకుంటూ ప్రజల సంక్షేమం కోసం నిరంతరం పనిచేస్తానని తెలిపారు.

మహిళా సాధికారతే ప్రభుత్వ ప్రధాన లక్ష్యం: మంత్రి సీతక్క

ఈ కార్యక్రమంలో పాల్గొన్న పంచాయతీరాజ్, మహిళా శిశు సంక్షేమ శాఖ మంత్రి ధనసరి అనసూయ (సీతక్క) మాట్లాడుతూ మహిళల ఆర్థిక స్వావలంబన, సామాజిక భద్రత కోసం రాష్ట్ర ప్రభుత్వం నిరంతరం కృషి చేస్తోందన్నారు. మహిళా సాధికారతకు ప్రాధాన్యతనిస్తూ మహిళల పేరుతోనే అనేక సంక్షేమ పథకాలను అమలు చేస్తున్నట్లు తెలిపారు.

మహిళలు ఆర్థికంగా ఎదిగేందుకు ఒక్కో మహిళా సంఘానికి రూ.10 లక్షల వడ్డీలేని రుణాలు అందించే కార్యక్రమాన్ని ప్రభుత్వం చేపడుతోందని వివరించారు. మహిళా సంఘాలు పెట్రోల్ బంకులు, సోలార్ విద్యుత్ కేంద్రాలను ఏర్పాటు చేసుకునేందుకు అవసరమైన రుణ సదుపాయాలు కల్పిస్తున్నట్లు తెలిపారు.

వృద్ధాప్యంలో ఉన్న మహిళలకు తోడుగా ఉండాలనే ఉద్దేశంతో వారిని కూడా మహిళా సంఘాల్లో భాగస్వాములను చేస్తున్నామని చెప్పారు. మహిళా సంఘాల్లో సభ్యురాలు మరణించిన సందర్భంలో రూ.10 లక్షల పరిహారం అందించే సదుపాయం ఉందని, మహిళలు రుణాలు తీసుకున్న అనంతరం ఆకస్మికంగా మరణిస్తే రూ.2 లక్షల వరకు రుణ మాఫీ కల్పిస్తున్నట్లు మంత్రి వివరించారు.

మహిళల ఆర్థికాభివృద్ధి, కుటుంబాల భద్రత, సామాజిక గౌరవం పెంపొందించేందుకు ప్రభుత్వం అన్ని విధాలుగా సహకరిస్తుందని స్పష్టం చేశారు.

హకీంపేటలో పలు ప్రభుత్వ భవనాల ప్రారంభోత్సవం

మహిళా సంఘాల సమావేశం అనంతరం ముఖ్యమంత్రి రేవంత్ రెడ్డి దుద్యాల్ మండలం హకీంపేటలో పలు అభివృద్ధి కార్యక్రమాల్లో పాల్గొన్నారు. హకీంపేటలో నిర్మించిన జిల్లా పరిషత్ ఉన్నత పాఠశాల భవనం, ప్రభుత్వ జూనియర్ కళాశాల, పోలీస్ స్టేషన్, ప్రాథమిక ఆరోగ్య కేంద్రం, మండల సమీకృత కార్యాలయ భవనాలను ప్రారంభించారు.

ఈ భవనాల ప్రారంభంతో ఆయా ప్రాంతాల ప్రజలకు ప్రభుత్వ సేవలు మరింత చేరువ కానున్నాయి. విద్యార్థులకు మెరుగైన విద్యా సదుపాయాలు, ప్రజలకు మెరుగైన వైద్య సేవలు, పోలీస్ శాఖకు అవసరమైన మౌలిక వసతులు అందుబాటులోకి రానున్నాయి. ఒకే ప్రాంతంలో వివిధ ప్రభుత్వ కార్యాలయాల అందుబాటుతో ప్రజలకు పరిపాలనా సేవలు సులభతరం కానున్నాయి.

కొడంగల్, బొమ్మరాస్‌పేటలో పోలీస్ స్టేషన్ల ప్రారంభం

కొడంగల్ నియోజకవర్గ కేంద్రంలో నూతనంగా నిర్మించిన పోలీస్ స్టేషన్ భవనాన్ని ముఖ్యమంత్రి ప్రారంభించారు. అదేవిధంగా బొమ్మరాస్‌పేట పోలీస్ స్టేషన్ కార్యాలయాన్ని కూడా ప్రారంభించారు. పోలీసు వ్యవస్థను మరింత బలోపేతం చేయడంతో పాటు ప్రజలకు మెరుగైన భద్రత కల్పించడంలో భాగంగా ఈ భవనాలు ఉపయోగపడనున్నాయి.

పర్సాపూర్‌లో ఇందిరమ్మ ఇంటిని ప్రారంభించిన సీఎం

ముఖ్యమంత్రి తన పర్యటనలో భాగంగా కొడంగల్ మండలంలోని పర్సాపూర్ గ్రామంలో ఇందిరమ్మ ఇంటి లబ్ధిదారు గోరిపల్లి సుమిత్ర–శ్రీనివాస్ దంపతుల నూతన గృహాన్ని ప్రారంభించారు. గ్రామానికి చేరుకున్న ముఖ్యమంత్రికి స్థానిక ప్రజాప్రతినిధులు, మహిళలు ఘన స్వాగతం పలికారు.

గ్రామ సర్పంచ్ కన్నం రాధా శ్రీనివాస్ రెడ్డి ఆధ్వర్యంలో మహిళలు మంగళహారతులతో ముఖ్యమంత్రికి స్వాగతం పలికారు. అనంతరం ముఖ్యమంత్రి రిబ్బన్ కట్ చేసి ఇందిరమ్మ ఇంటిని ప్రారంభించారు. ఈ సందర్భంగా లబ్ధిదారుల కుటుంబ సభ్యులను ఆప్యాయంగా పలకరించి వారి యోగక్షేమాలను అడిగి తెలుసుకున్నారు. గోరిపల్లి సుమిత్ర–శ్రీనివాస్ దంపతులకు నూతన వస్త్రాలను బహుకరించి శుభాకాంక్షలు తెలిపారు.

ఇందిరమ్మ ఇంట్లో ముఖ్యమంత్రి కుటుంబ సభ్యుడిలా ఆత్మీయత

ఇందిరమ్మ ఇంటి ప్రారంభోత్సవం అనంతరం ముఖ్యమంత్రి రేవంత్ రెడ్డి లబ్ధిదారుల కుటుంబంతో కలిసి కొంత సమయం గడిపారు. ఈ సందర్భంగా శాసనసభ స్పీకర్ గడ్డం ప్రసాద్ కుమార్, మంత్రులు సీతక్క, జూపల్లి కృష్ణారావు, దామోదర రాజనర్సింహ, ఎంపీ వేం నరేందర్ రెడ్డి, పలువురు ఎమ్మెల్యేలు ముఖ్యమంత్రితో కలిసి లబ్ధిదారుల ఇంట్లో సన్న బియ్యంతో వండిన భోజనం చేశారు.

సాధారణ కుటుంబంలో నిర్మించిన ఇందిరమ్మ ఇంట్లో ముఖ్యమంత్రి, రాష్ట్ర మంత్రులు, ప్రజాప్రతినిధులు కలిసి భోజనం చేయడం స్థానికంగా ప్రత్యేక ఆకర్షణగా నిలిచింది. ప్రభుత్వ సంక్షేమ పథకాల ద్వారా పేద కుటుంబాలకు ఇళ్ల కల నెరవేరుతోందనే సందేశాన్ని ఈ కార్యక్రమం చాటిచెప్పింది.

పలు అభివృద్ధి కార్యక్రమాలతో కొడంగల్ పర్యటనకు ప్రత్యేక ప్రాధాన్యత

ముఖ్యమంత్రి రేవంత్ రెడ్డి కొడంగల్ నియోజకవర్గ పర్యటనలో భాగంగా రైతు మేళా, మహిళా సంఘాల సమావేశం, పింఛన్ల పంపిణీ, వివిధ ప్రభుత్వ భవనాల ప్రారంభోత్సవాలు, అభివృద్ధి పనులకు శంకుస్థాపనలు వంటి కార్యక్రమాల్లో పాల్గొన్నారు. మహిళా సాధికారతకు సంబంధించి చేసిన ప్రకటనలు, కోటి మంది మహిళలను కోటీశ్వరులుగా తీర్చిదిద్దాలనే లక్ష్యం ఈ పర్యటనలో ప్రధాన ఆకర్షణగా నిలిచాయి.

కార్యక్రమంలో పాల్గొన్న ప్రముఖులు

ఈ కార్యక్రమాల్లో రాష్ట్ర శాసనసభ స్పీకర్ గడ్డం ప్రసాద్ కుమార్, వ్యవసాయ శాఖ మంత్రి తుమ్మల నాగేశ్వరరావు, మహిళా శిశు సంక్షేమ శాఖ మంత్రి ధనసరి అనసూయ సీతక్క, ఆరోగ్య శాఖ మంత్రి దామోదర రాజనర్సింహ, అబ్కారీ, పర్యాటక శాఖ మంత్రి జూపల్లి కృష్ణారావు, బీసీ సంక్షేమ శాఖ మంత్రి వాకాటి శ్రీహరి, ప్రభుత్వ సలహాదారులు సుదర్శన్ రెడ్డి, రాజ్యసభ సభ్యుడు వేం నరేందర్ రెడ్డి, సెర్ప్ సీఈఓ దివ్య దేవరాజన్, వికారాబాద్ జిల్లా కలెక్టర్ దీపక్ తివారీ, నారాయణపేట జిల్లా కలెక్టర్ ప్రియాంక, ఎమ్మెల్యేలు బుయ్యాని మనోహర్ రెడ్డి, టి.రామ్మోహన్ రెడ్డి, మహిళా సమాఖ్య జిల్లా అధ్యక్షురాలు జానకి, వివిధ శాఖల ఉన్నతాధికారులు, ప్రజాప్రతినిధులు, సర్పంచులు, మహిళా స్వయం సహాయక సంఘాల సభ్యులు, స్థానిక నాయకులు తదితరులు పాల్గొన్నారు.