జమిలి ఎన్నికలు.. డీలిమిటేషన్.. మహిళా రిజర్వేషన్ బిల్లు:

•  మోదీ సర్కార్ వ్యూహాత్మక అడుగులు..
• పార్లమెంట్ వర్షాకాల సమావేశాలపై దేశవ్యాప్తంగా ఉత్కంఠ

శ్రీ బల భీమ న్యూస్ / వికారాబాద్ :

దేశ రాజకీయాలను వచ్చే కొన్ని సంవత్సరాల పాటు ప్రభావితం చేసే కీలక నిర్ణయాలకు కేంద్ర ప్రభుత్వం రంగం సిద్ధం చేస్తున్నట్లు రాజకీయ వర్గాల్లో చర్చ జరుగుతోంది. ముఖ్యంగా “ఒకే దేశం – ఒకే ఎన్నిక” (జమిలి ఎన్నికలు), నియోజకవర్గాల పునర్విభజన (డీలిమిటేషన్), మహిళా రిజర్వేషన్ బిల్లు వంటి అంశాలను ప్రధాని నరేంద్ర మోదీ నాయకత్వంలోని కేంద్ర ప్రభుత్వం అత్యంత ప్రతిష్ఠాత్మకంగా తీసుకున్నట్లు సమాచారం. ఈ నేపథ్యంలో ఈ నెల 20వ తేదీ నుంచి ప్రారంభం కానున్న పార్లమెంట్ వర్షాకాల సమావేశాలు రాజకీయంగా అత్యంత కీలకంగా మారనున్నాయి.

ఆగస్టు 13 వరకు కొనసాగే అవకాశమున్న ఈ సమావేశాల్లో మొత్తం 19 పనిదినాల పాటు ఉభయ సభలు సమావేశం కానున్నాయి. ఈ సమావేశాల్లో కేంద్ర ప్రభుత్వం కీలక రాజ్యాంగ సవరణ బిల్లులతో పాటు అనేక సంస్కరణాత్మక బిల్లులను ప్రవేశపెట్టే అవకాశమున్నట్లు విశ్వసనీయ వర్గాలు చెబుతున్నాయి. మరోవైపు ప్రతిపక్ష ఇండియా కూటమి కూడా ప్రభుత్వాన్ని ఇరుకునపెట్టేందుకు పలు అంశాలను ఆయుధాలుగా సిద్ధం చేసుకుంటోంది.

డీలిమిటేషన్‌కు మోదీ ప్రభుత్వం ప్రాధాన్యం

దేశ రాజకీయాల్లో అత్యంత చర్చనీయాంశంగా మారిన అంశం నియోజకవర్గాల పునర్విభజన లేదా డీలిమిటేషన్. జనాభా ప్రాతిపదికన లోక్‌సభ, రాష్ట్ర శాసనసభల నియోజకవర్గాల పునర్విభజన చేపట్టే ప్రక్రియను కేంద్ర ప్రభుత్వం ముందుకు తీసుకెళ్లాలని నిర్ణయించినట్లు తెలుస్తోంది. ఈ ప్రక్రియ ద్వారా లోక్‌సభలోని సభ్యుల సంఖ్యను, రాష్ట్ర అసెంబ్లీల సభ్యుల సంఖ్యను సుమారు 50 శాతం వరకు పెంచే ప్రతిపాదనను కేంద్రం పరిశీలిస్తున్నట్లు సమాచారం.

డీలిమిటేషన్ అమలుకు సంబంధించి గతంలో రాజకీయంగా తీవ్ర విభేదాలు వ్యక్తమైనప్పటికీ, ప్రస్తుతం మారుతున్న రాజకీయ సమీకరణాలను దృష్టిలో ఉంచుకుని కేంద్ర ప్రభుత్వం కొత్త వ్యూహాలను సిద్ధం చేస్తున్నట్లు రాజకీయ విశ్లేషకులు భావిస్తున్నారు. ముఖ్యంగా 2029 లోక్‌సభ ఎన్నికలకు ముందే ఈ ప్రక్రియను పూర్తిచేయాలన్న లక్ష్యంతో ప్రభుత్వం అడుగులు వేస్తున్నట్లు సమాచారం.

మహిళా రిజర్వేషన్ బిల్లుపై కొత్త లెక్కలు

మహిళలకు శాసనసభలు, పార్లమెంట్‌లో 33 శాతం రిజర్వేషన్ కల్పించే మహిళా రిజర్వేషన్ బిల్లును అమలు చేయడానికి కేంద్ర ప్రభుత్వం కట్టుబడి ఉందని అధికార వర్గాలు చెబుతున్నాయి. ఈ బిల్లు అమలుకు అవసరమైన రాజకీయ, రాజ్యాంగపరమైన ప్రక్రియలను వేగవంతం చేసేందుకు కేంద్రం చర్యలు చేపడుతున్నట్లు తెలుస్తోంది.

మహిళా రిజర్వేషన్ అమలు కోసం డీలిమిటేషన్ ప్రక్రియ కీలకంగా మారడంతో ఈ రెండు అంశాలను కేంద్ర ప్రభుత్వం పరస్పర అనుసంధానంతో ముందుకు తీసుకెళ్లే అవకాశాలు కనిపిస్తున్నాయి. రాజకీయంగా మారుతున్న పరిస్థితులను అనుకూలంగా మలచుకుని ఈ బిల్లులకు పార్లమెంట్ ఆమోదం పొందాలని బీజేపీ నాయకత్వంలోని ఎన్డీఏ ప్రభుత్వం వ్యూహరచన చేస్తున్నట్లు సమాచారం.

జమిలి ఎన్నికలపై ముహూర్తం ఫిక్స్?

“ఒకే దేశం – ఒకే ఎన్నిక” లేదా జమిలి ఎన్నికల వ్యవస్థను అమలు చేయడం ప్రధాని నరేంద్ర మోదీ అత్యంత ప్రాధాన్యతగా తీసుకున్న అంశంగా భావిస్తున్నారు. దేశవ్యాప్తంగా లోక్‌సభ, రాష్ట్ర అసెంబ్లీ ఎన్నికలను ఒకేసారి నిర్వహించే విధానాన్ని అమలు చేయడానికి అవసరమైన రాజ్యాంగ సవరణలను కేంద్రం సిద్ధం చేస్తున్నట్లు తెలుస్తోంది.

జమిలి ఎన్నికల అమలు వల్ల ఎన్నికల ఖర్చులు తగ్గుతాయని, పరిపాలనా సామర్థ్యం పెరుగుతుందని, అభివృద్ధి కార్యక్రమాలకు అంతరాయం తగ్గుతుందని కేంద్ర ప్రభుత్వం వాదిస్తోంది. అయితే ప్రతిపక్షాలు మాత్రం దీనిపై భిన్నాభిప్రాయాలు వ్యక్తం చేస్తున్నాయి. అయినప్పటికీ రాజకీయంగా అనుకూల పరిస్థితులు ఏర్పడుతున్నాయని భావిస్తున్న కేంద్రం, వచ్చే పార్లమెంట్ సమావేశాల్లోనే దీనికి సంబంధించిన బిల్లును ప్రవేశపెట్టే అవకాశాలు కనిపిస్తున్నాయి.

మారుతున్న రాజకీయ సమీకరణాలు

ఇటీవలి రాజకీయ పరిణామాలు కేంద్ర ప్రభుత్వానికి అనుకూలంగా మారుతున్నాయని రాజకీయ విశ్లేషకులు అంచనా వేస్తున్నారు. తృణమూల్ కాంగ్రెస్ (టీఎంసీ), శివసేన (యూబీటీ) పార్టీల్లో అంతర్గత విభేదాలు, కొందరు ఎంపీలు ఎన్డీఏకు మద్దతు ప్రకటించే అవకాశాలు వంటి అంశాలు కేంద్ర ప్రభుత్వ ధైర్యాన్ని పెంచుతున్నట్లు తెలుస్తోంది.

లోక్‌సభలో ప్రస్తుతం ఎన్డీఏ కూటమికి 293 మంది సభ్యుల మద్దతు ఉండగా, రాజ్యసభలో 141 మంది సభ్యుల మద్దతు ఉంది. టీఎంసీ, డీఎంకే వంటి పార్టీలు ఓటింగ్‌కు దూరంగా ఉన్నా లేదా కొంతమంది సభ్యులు మద్దతు ప్రకటించినా కీలక రాజ్యాంగ సవరణ బిల్లులు ఆమోదం పొందే అవకాశాలు పెరుగుతాయని విశ్లేషకులు భావిస్తున్నారు.

అదేవిధంగా ఆమ్ ఆద్మీ పార్టీ, సమాజ్‌వాదీ పార్టీ వంటి పార్టీల వైఖరి కూడా ఈ బిల్లుల భవిష్యత్తును ప్రభావితం చేసే అవకాశం ఉంది. ఈ నేపథ్యంలో కేంద్ర హోంశాఖ రాజకీయ సమీకరణాలపై విస్తృతంగా అధ్యయనం చేసి తదుపరి వ్యూహాన్ని రూపొందిస్తున్నట్లు సమాచారం.

పార్లమెంట్‌లో ప్రవేశపెట్టే ఇతర కీలక బిల్లులు

ఈ వర్షాకాల సమావేశాల్లో కేంద్ర ప్రభుత్వం పలు కీలక బిల్లులను కూడా ప్రవేశపెట్టే అవకాశముంది. వీటిలో ప్రధానమంత్రి, ముఖ్యమంత్రులు, మంత్రులు అరెస్టై 30 రోజులకు పైగా జైలులో ఉంటే పదవులకు రాజీనామా చేయాల్సిన నిబంధనకు సంబంధించిన రాజ్యాంగ సవరణ బిల్లు కూడా ఉండవచ్చని రాజకీయ వర్గాలు చెబుతున్నాయి.

అదనంగా విదేశీ విరాళాల నియంత్రణ చట్టం (ఎఫ్‌సీఆర్‌ఏ) సవరణలు, వికసిత్ భారత్ శిక్షా అధిష్ఠాన్, యాంటీ డోపింగ్ సంస్కరణలు, సుప్రీంకోర్టు న్యాయమూర్తుల సంఖ్య పెంపు, కార్పొరేట్ చట్ట సంస్కరణలు, సెక్యూరిటీస్ మార్కెట్ కోడ్ వంటి కీలక బిల్లులను కూడా ప్రభుత్వం సభల్లో ప్రవేశపెట్టే అవకాశాలు కనిపిస్తున్నాయి.

ప్రతిపక్షాల చేతిలో సిద్ధమైన శస్త్రాస్త్రాలు

మరోవైపు కేంద్ర ప్రభుత్వాన్ని నిలదీయడానికి ప్రతిపక్ష ఇండియా కూటమి కూడా వ్యూహాత్మకంగా సిద్ధమవుతోంది. నీట్ ప్రశ్నపత్రం లీకేజీ వ్యవహారం, సీబీఎస్‌ఈ మార్కింగ్ విధానం, పెట్రోల్, డీజిల్ ధరల పెరుగుదల, ద్రవ్యోల్బణం, నిరుద్యోగం, రైతుల సమస్యలు, కరువు పరిస్థితులు, వరదల నిర్వహణలో ప్రభుత్వ వైఫల్యాలు వంటి అంశాలను ప్రధానంగా లేవనెత్తే అవకాశం ఉంది.

అదేవిధంగా అయోధ్య రామాలయానికి వచ్చిన విరాళాల నిర్వహణపై వస్తున్న ఆరోపణలు, ఎన్నికల కమిషన్ చేపడుతున్న ఓటర్ల జాబితాల ప్రత్యేక సవరణ ప్రక్రియపై కూడా ప్రతిపక్షాలు ప్రభుత్వాన్ని ఇరుకునపెట్టే ప్రయత్నం చేయనున్నాయి. ప్రజాస్వామ్య పరిరక్షణ పేరుతో సుప్రీంకోర్టుకు కూడా ఫిర్యాదులు చేయడం ద్వారా రాజకీయ పోరాటాన్ని మరింత ఉధృతం చేస్తున్నాయి.

రాజకీయంగా హాట్ హాట్‌గా మారనున్న వర్షాకాల సమావేశాలు

ప్రభుత్వం ప్రతిష్ఠాత్మకంగా తీసుకున్న జమిలి ఎన్నికలు, డీలిమిటేషన్, మహిళా రిజర్వేషన్ బిల్లులు ఒకవైపు, ప్రతిపక్షాల దూకుడు మరోవైపు ఉండటంతో ఈసారి పార్లమెంట్ వర్షాకాల సమావేశాలు అత్యంత వాడీవేడిగా సాగే అవకాశాలు కనిపిస్తున్నాయి. దేశ రాజకీయ భవిష్యత్తును ప్రభావితం చేసే కీలక నిర్ణయాలకు ఈ సమావేశాలు వేదిక కానున్నాయనే అభిప్రాయం రాజకీయ వర్గాల్లో వ్యక్తమవుతోంది.

– ఎం. రవీందర్
సీనియర్ జర్నలిస్ట్
సంప్రదింపు: 7901503777