బండి భగీరథ్‌ పోక్సో కేసు.. హైకోర్టులో లాయర్ల మధ్య వాగ్వాదం.. జడ్జి తీవ్ర ఆగ్రహం

• బండి భగీరథ్‌ పోక్సో కేసులో వాదనలు
• హైకోర్టులో లాయర్ల మధ్య గొడవ
• లాయర్ల తీరుపై జడ్జి తీవ్ర ఆగ్రహం 

శ్రీ బల భీమ న్యూస్ / కొడంగల్ :

తెలంగాణ హైకోర్టులో బండి భగీరథ్‌కు సంబంధించిన పోక్సో కేసు విచారణ సందర్భంగా తీవ్ర ఉద్రిక్త పరిస్థితులు నెలకొన్నాయి. ముందస్తు బెయిల్ పిటిషన్‌పై విచారణ జరుగుతున్న వేళ ఇరుపక్షాల లాయర్లు కోర్టులోనే పరస్పరం వాగ్వాదానికి దిగడం కలకలం రేపింది. ఈ పరిణామంతో న్యాయమూర్తి తీవ్ర అసహనం వ్యక్తం చేస్తూ.. కోర్టు మర్యాదలు పాటించాలని గట్టిగా హెచ్చరించారు. లాయర్లు సంయమనంతో వ్యవహరించకపోతే కేసును మరో బెంచ్‌కు బదిలీ చేయాల్సి వస్తుందని జడ్జి వ్యాఖ్యానించారు. దీంతో కొంతసేపు కోర్టు వాతావరణం ఉద్రిక్తంగా మారింది.

బండి భగీరథ్‌పై నమోదైన పోక్సో కేసులో ముందస్తు బెయిల్ కోరుతూ హైకోర్టులో పిటిషన్ దాఖలైంది. ఈ పిటిషన్‌పై విచారణ సందర్భంగా బాధితురాలి తరఫున వాదనలు వినిపిస్తున్న పబ్లిక్ ప్రాసిక్యూటర్ నాగేశ్వరరావు.. బండి భగీరథ్‌ను “క్రిమినల్” అని సంబోధించారు. ఈ వ్యాఖ్యలపై వెంటనే బండి భగీరథ్ తరఫున వాదనలు వినిపిస్తున్న సీనియర్ లాయర్ నిరంజన్ రెడ్డి తీవ్ర అభ్యంతరం వ్యక్తం చేశారు.

కేసులో నేరం ఇంకా రుజువు కాలేదని.. కేవలం ఆరోపణల ఆధారంగా ఒక వ్యక్తిని నేరస్థుడిగా పేర్కొనడం సరైంది కాదని ఆయన కోర్టు దృష్టికి తీసుకెళ్లారు. “చట్టపరంగా నేరం రుజువు అయ్యే వరకు ఎవరినీ క్రిమినల్‌గా పరిగణించరాదు” అని స్పష్టం చేశారు. ఈ వ్యాఖ్యలతో ఇరువురు లాయర్ల మధ్య వాదోపవాదాలు తీవ్రరూపం దాల్చాయి.

కోర్టు హాల్‌లోనే ఇద్దరు లాయర్లు ఒకరిపై ఒకరు వ్యాఖ్యలు చేసుకోవడంతో పరిస్థితి ఉద్రిక్తంగా మారింది. ఈ సమయంలో జోక్యం చేసుకున్న న్యాయమూర్తి.. కోర్టు గౌరవాన్ని కాపాడాల్సిన బాధ్యత న్యాయవాదులపై ఎక్కువగా ఉంటుందని గుర్తుచేశారు. న్యాయస్థానం ముందు పరస్పరం ఆరోపణలు చేసుకోవడం సరైన పద్ధతి కాదని తీవ్రంగా మందలించారు.

అంతేకాకుండా.. విచారణలో ఉన్న కేసుల్లో నేరం నిర్ధారణ కాకముందే ఎవరినైనా “నేరస్థుడు”గా సంబోధించడం చట్టపరంగా సరికాదని జడ్జి స్పష్టం చేశారు. కోర్టులో వాదనలు చట్టపరమైన అంశాలకే పరిమితం కావాలని.. వ్యక్తిగత విమర్శలు చేయరాదని సూచించారు. లాయర్లు సంయమనంతో లేకపోతే ఈ కేసును మరో బెంచ్‌కు బదిలీ చేస్తామని హెచ్చరించారు. దీంతో ఇరువురు లాయర్లు శాంతించి వాదనలు కొనసాగించారు.

ఇదిలా ఉండగా.. కేసులో కీలక అంశంగా బాధితురాలి వయసు అంశం మారింది. బండి భగీరథ్ తరఫు లాయర్ నిరంజన్ రెడ్డి.. బాధితురాలు ప్రస్తుతం 18 ఏళ్లకు పైబడే ఉంటుందని కోర్టులో వాదించారు. 2021లో ర్యాష్ డ్రైవింగ్ కేసులో ఆమెను పోలీసులు పట్టుకున్నప్పుడు.. ఆమె వయసు 15 సంవత్సరాలుగా ఛార్జిషీట్‌లో పేర్కొన్నారని తెలిపారు. ఆ లెక్కన ప్రస్తుతం ఆమె వయసు 20 సంవత్సరాల వరకు ఉండవచ్చని కోర్టు దృష్టికి తీసుకెళ్లారు.

ఈ సందర్భంగా బాధితురాలి జనన తేదీకి సంబంధించిన పత్రాల్లో భిన్నతలు ఉన్నాయని కూడా కోర్టుకు తెలియజేశారు. పోలీసుల ఛార్జిషీట్‌లో ఒక తేదీ ఉండగా.. సమర్పించిన బర్త్ సర్టిఫికెట్లలో వేరే తేదీలు ఉన్నట్లు పేర్కొన్నారు. దీంతో ఈ అంశంపై హైకోర్టు సీరియస్‌గా స్పందించింది.

బాధితురాలి అసలు పుట్టిన తేదీ ఏదో నిర్ధారించేందుకు అందుబాటులో ఉన్న అన్ని బర్త్ సర్టిఫికెట్లను సమగ్రంగా పరిశీలించాలని పోలీసులకు హైకోర్టు ఆదేశాలు జారీ చేసింది. అవసరమైతే సంబంధిత అధికారుల నుంచి ధృవీకరణ తీసుకోవాలని సూచించింది. కేసు విచారణలో వయస్సు కీలక అంశమని.. దానిపై స్పష్టత రావాల్సిన అవసరం ఉందని ధర్మాసనం అభిప్రాయపడింది.

ఈ కేసు ప్రస్తుతం తెలంగాణ వ్యాప్తంగా చర్చనీయాంశంగా మారింది. హైకోర్టులో జరిగిన వాగ్వాదం, జడ్జి ఆగ్రహం, బాధితురాలి వయస్సుపై తలెత్తిన సందేహాలు కేసును మరింత ఆసక్తికరంగా మార్చాయి. ఇక ఈ కేసులో తదుపరి విచారణ ఎలా సాగుతుందన్న దానిపై అందరి దృష్టి నిలిచింది.