రోడ్డు ప్రమాదాల నివారణకు జీబ్రా క్రాసింగ్‌లు ఏర్పాటు

ఎంఈఓ రామ్‌రెడ్డి (ఇంచార్జ్)

శ్రీ బల భీమ న్యూస్ / కొడంగల్

కొడంగల్ మండల నియోజకవర్గ కేంద్రంలో రోడ్డు విస్తరణ పనులలో భాగంగా రోడ్డు ప్రమాదాలను తగ్గించే దిశగా ముఖ్యమైన చర్యలు చేపట్టినట్లు మండల ఇంచార్జ్ ఎంఈఓ రామ్‌రెడ్డి తెలిపారు. ముఖ్యంగా పాఠశాలల సమీప ప్రాంతాల్లో విద్యార్థుల భద్రతను దృష్టిలో ఉంచుకొని ప్రధాన రహదారులపై జీబ్రా క్రాసింగ్‌లు మరియు సిగ్నల్ గుర్తులు ఏర్పాటు చేయడం జరిగిందని ఆయన వెల్లడించారు.

కొడంగల్ మండలంలోని పలు ప్రైవేట్ మరియు ప్రభుత్వ పాఠశాలల వద్ద రహదారులపై వాహనాలు అధిక వేగంతో ప్రయాణించడం వల్ల విద్యార్థులు రోడ్డు దాటే సమయంలో ప్రమాదాలకు గురయ్యే పరిస్థితులు ఏర్పడుతున్నాయని తెలిపారు. ముఖ్యంగా పాఠశాల సమయాల్లో విద్యార్థులు గుంపులుగా రోడ్డు దాటే సమయంలో వాహనదారులు నిర్లక్ష్యంగా వ్యవహరించడం ప్రమాదాలకు దారితీస్తోందని ఆయన ఆవేదన వ్యక్తం చేశారు.

ఇటీవల కొడంగల్ ఆర్టీసీ బస్టాండ్ సమీపంలో, హైదరాబాద్–బీజాపూర్ ప్రధాన రహదారిపై జరిగిన విషాద ఘటనను ఆయన ప్రస్తావించారు. ఒక లారీ అతివేగంగా వచ్చి రోడ్డు దాటుతున్న 8 సంవత్సరాల బాలికను ఢీకొట్టడంతో ఆ బాలిక అక్కడికక్కడే మృతి చెందిన సంఘటన ప్రజలను కలచివేసిందని అన్నారు. ఇలాంటి దుర్ఘటనలు మరల పునరావృతం కాకుండా ఉండేందుకు తక్షణ చర్యలు తీసుకోవాల్సిన అవసరం ఉందని ఆయన పేర్కొన్నారు.

ఈ నేపథ్యంలో, పాఠశాలల దగ్గర రహదారులపై జీబ్రా క్రాసింగ్‌లను స్పష్టంగా గుర్తించే విధంగా పెయింటింగ్ చేయించడం, అవసరమైన చోట ట్రాఫిక్ హెచ్చరిక బోర్డులు ఏర్పాటు చేయడం, వాహనదారులకు అవగాహన కల్పించడం వంటి చర్యలు చేపట్టినట్లు తెలిపారు. విద్యార్థుల భద్రత కోసం పాఠశాల యాజమాన్యాలు కూడా సహకరించాలని, విద్యార్థులకు రోడ్డు భద్రతపై అవగాహన కార్యక్రమాలు నిర్వహించాలని సూచించారు.

ఇప్పటికైనా ఆర్ అండ్ బి (రోడ్స్ అండ్ బిల్డింగ్స్) శాఖ అధికారులు స్పందించి, ముఖ్య రహదారులపై శాశ్వత సిగ్నలింగ్ వ్యవస్థలు, స్పీడ్ బ్రేకర్లు, ట్రాఫిక్ నియంత్రణ చర్యలు చేపట్టాలని ఎంఈఓ రామ్‌రెడ్డి కోరారు. ప్రజల ప్రాణ భద్రతకు సంబంధించి అన్ని శాఖలు సమన్వయంతో పనిచేయాల్సిన అవసరం ఉందని ఆయన అభిప్రాయపడ్డారు.

ఈ కార్యక్రమంలో నబిన్ ఆదర్శ పాఠశాల ప్రిన్సిపల్ నరేష్, శ్రీవిద్య పాఠశాల ప్రిన్సిపాల్ మైపాల్, కృష్ణవేణి పాఠశాల ప్రిన్సిపాల్ మసూద్ అలీతో పాటు ఇతర ఉపాధ్యాయులు, సిబ్బంది మరియు స్థానికులు పాల్గొన్నారు.

మొత్తంగా, రోడ్డు ప్రమాదాలను నివారించేందుకు తీసుకుంటున్న ఈ చర్యలు విద్యార్థుల ప్రాణాలను కాపాడటానికి ఎంతో ఉపయోగపడతాయని స్థానికులు అభిప్రాయపడుతున్నారు.